ថ្មីៗនេះ ក្រុមហ៊ុន Samsung បានប្រកាសចេញនូវស្មាតហ្វូន Galaxy S-series flagship ម៉ូឌែលចុងក្រោយបំផុតដែលមានដូចជា Galaxy S20, S20 Pusនិង S20 Ultra ដោយក្រុមហ៊ុននេះ មានការរំពឹងខ្ពស់សម្រាប់ស្មាតហ្វូនទាំងនេះណាស់។ អ្នកវិភាគលោក Ming-Chi Kuo ហាក់ដូចជាមិនសូវជឿជាក់ខ្លាំងនោះទេសម្រាប់ស្មាតហ្វូននេះ។ នៅក្នុងការព្យាករណ៍របស់គាត់នោះ ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ នឹងលក់ស្មាតហ្វូន Galaxy S20 series បានចំនួន 32 លានគ្រឿង នៅក្នុងឆ្នាំនេះ ដែលធៀបជាមួយនឹងម៉ូឌែលមុននេះគឺមិនសូវខុសគ្នាច្រើននោះទេ។
លោក Kuo បានបន្ថែមថា ក្រុមហ៊ុន Samsung បានលក់ស្មាតហ្វូន Galaxy S10 ប្រហែលជាចន្លោះពី 36-38 លានគ្រឿងកាលពីឆ្នាំមុននេះ។ គាត់អះអាងថា វាគឺនៅខ្វះនូវភាពអស្ចារ្យនៃបច្ចេកវិទ្យាជាច្រើនសម្រាប់អ្នកប្រើប្រាស់នៅលើស្មាតហ្វូនស៊េរីថ្មីនេះបើទោះបីជាលើកនេះក្រុមហ៊ុនធ្វើការ upgrade ខ្លាំងទៅលើផ្នែក Hardware របស់វាក៏ដោយនោះ។ ចាប់តាំងពីក្រុមហ៊ុន Samsung គឺប្រកាសនូវការកាត់បន្ថយតម្លៃសម្រាប់ស្មាតហ្វូន Galaxy S10 series នេះដែលពេលនេះគឺមានតម្លៃត្រឹមតែ $599 នោះ ក្រុមហ៊ុនបច្ចេកវិទ្យានេះគឺមិនមានការខាតបង់ច្រើននោះទេសម្រាប់ប្រាក់ចំណេញរបស់ខ្លួននោះ។ ការខាតបង់ទៅលើប្រាក់ចំណូលនេះ គឺដោយសារតែស្មាតហ្វូនស៊េរីថ្មី Galaxy S20នេះហើយដែលធ្វើអោយតម្លៃរបស់ស្មាតហ្វូនម៉ូឌែលជំនាន់មុនៗនេះមានការធ្លាក់ចុះខ្លាំងបែបនេះ។
អ្វីដែលគួរអោយចាប់អារម្មណ៍នោះ របាយការណ៍មួយចេញពីលោក Ming-Chi Kuo គឺផ្ទុយពីអ្វីដែលជាការព្យាករណ៍របស់របាយការណ៍ពី Counterpoint Research។ ក្រុមហ៊ុននេះ បាននិយាយថាស្មាតហ្វូនស៊េរីថ្មី Galaxy S20 នេះនឹងលក់កើនឡើងខ្លាំងលើសពីស្មាតហ្វូនជំនាន់មុនរបស់វាជាក់ជាមិនខាន។ សម្រាប់តម្លៃរបស់ស្មាតហ្វូន Samsung Galaxy S20 series គឺមានតម្លៃចាប់ផ្តើមពី $1000 នៅក្នុងសហរដ្ឋអាមេរិកដែលខ្ពស់ជាងតម្លៃរបស់ Apple iPhone 11 ដែលមានតម្លៃត្រឹមតែ $700 ប៉ុណ្ណោះ។ សម្រាប់ស្មាតហ្វូន S20 Plus និង S20 Ultra គឺមានតម្លៃ $1200 និង $1400 ខណៈពេលដែលស្មាតហ្វូន iPhone 11 Pro និង 11 Pro Max គឺមានតម្លៃចាប់ផ្តើមពី $1000 និង $1100 ប៉ុណ្ណោះ៕