យើងឃើញថាក្នុងឆ្នាំ 2019 នេះ ក្រុមហ៊ុនបច្ចេកវិទ្យាយក្សកូរ៉េខាងត្បូង បានធ្វើការកែប្រែច្នៃប្រឌិតដ៏អស្ចារនៅលើស្រឡាយស្មាតហ្វូនជំនាន់ថ្មីរបស់ខ្លួនទាំងស្មាត ហ្វូនធុនកណ្តាល និងស្មាតហ្វូនថ្នាក់កំពូលរបស់។ និយាយពីកំពូលស្មាតហ្វូនជំនាន់ថ្មី Galaxy S10 ស៊េរីពិតជាទទួលបានការចាប់អារម្មណ៍ និងគាំទ្រខ្លាំងពីសំណាក់អ្នកប្រើប្រាស់ជាមួយការប្រើបន្ទះអេក្រង់ថ្មី បច្ចេកវិទ្យាដោះសោរក្រោមអេក្រង់ថ្មី ប្រព័ន្ធកាមេរ៉ាក្រោយថ្មី និងបច្ចេកវិទ្យាប្រើប្រាស់ទំនើបៗចុងក្រោយដ៏សម្បូរបែប ដោយឡែកសម្រាប់ស្រឡាយស្មាតហ្វូនធុនកណ្តាល Galaxy A វិញក៏មានការផ្លាស់ប្តូរខ្លាំងផងដែរដូចជាការប្រើប្រាស់អេក្រង់មានឆកអក្សរ “U” ហៅថា “AMOLED Infinity-U” ប្រព័ន្ធកាមេរ៉ាក្រោយឡើងដល់ 3 គ្រាប់ និងមានម៉ូដែលខ្លះប្រើប្រាស់នូវបច្ចេកវិទ្យាដោះសោរដោយការស្កែនក្រយ៉ៅម្រាមដៃលើអេក្រង់បានថែមទៀតផងដូចជា Galaxy A50 ជាដើម។
យ៉ាងណាមិញងាកមកមើល Galaxy A ស៊េរីថ្មីមួយម៉ូដែលទៀតដែលទើបនឹងចេញមកក្តៅៗនេះវិញពិតជាមានភាពទំនើបមិនធម្មតាឡើយនោះគឺ Galaxy A80។ ចឹងអ្វីដែលជាភាពទាក់ទាញដំបូងបំផុតសម្រាប់ស្មាតហ្វូន Galaxy A80 នេះគឺការបំពាក់នូវអេក្រង់លាតគ្មានឆកអ្វីទាំងអស់ ហើយក៏សូមអរគុណដ៏ប្រព័ន្ធកាមេរ៉ាថ្មីហៅថា “rotation pop up camera” ដែលធ្វើអោយអេក្រង់ស្មាតហ្វូននេះលាតសន្ធឹងម៉ាអស់ដៃដូច្នេះ។ ប្រព័ន្ធកាមេរ៉ាលូតចេញនេះគឺវាមានលក្ខណះស្រដៀងគ្នាទៅនឹងស្មាតហ្វូន Honor Magic 2 ដែរ ប៉ុន្តែវាមានភាពទំនើបជាងត្រង់ថាវាលូនចេញមកភ្ជាប់នូវលែនកាមេរ៉ាបង្វិល។ និយាយអោយខ្លីទៅគឺវាបង្វិលនៅពេលយើងធ្វើការឆ្លាស់ប្រព័ន្ធកាមេរ៉ាថតរូបខាងក្រោយ និងថតសែលហ្វី។
ប្រព័ន្ធកាមេរ៉ាថ្មីដ៏ទំនើប
វាមិនមែនជារឿងថ្មីតែវាជាចំនីចាប់អារម្មណ៍ថ្មីសម្រាប់ប្រព័ន្ធកាមេរ៉ាដែលលូនចេញពីតួរខ្លួន។ ក៏ប៉ុន្តែម្តងនេះវាមិនត្រឹមតែលូនចេញបាននោះទេតែវាអាចបង្វិលខ្លួនបានថែមទៀតផង។ ប្រព័ន្ធកាមេរ៉ាដែលបំពាក់នូវលើ Galaxy A80 ជាប្រព័ន្ធកាមេរ៉ា Rotation Pup up Camera ដែលលូតចេញ និងបង្វិលកាមេរ៉ាបាននៅពេលយើងឆ្លាស់កាមេរ៉ាថតប្លង់ខាងក្រោយ និងថតសែលហ្វី។ ហើយកាមេរ៉ាប្រភេទនេះយើងក៏ធ្លាប់បានឃើញនៅលើស្មាតហ្វូន Oppo N1 ដែលចេញកាលពីឆ្នាំ 2013 ម្តងរួចទៅហើយ ប៉ុន្តែកាមេរ៉ា Oppo N1 មិនមែនជា Module camera លូនចេញដូច Galaxy A80 នោះទេពោលគឺវាមានលទ្ធភាពអាចត្រឹមបង្វិលបានសម្រាប់ការឆ្លាស់កាមេរ៉ាមុខក្រោយប៉ុណ្ណោះ។ Module Camera ថ្មីនេះមានភ្ជាប់នូវលែនកាមេរ៉ាចំនួន 3 គ្រាប់ដោយលែនដើមមានទំហំឡើងដល់ 48MP ជាមួយកម្រិត aperture f/2.0 ភ្ជាប់នូវមុខងារ Super Steady mode ដូចកាមេរ៉ាកំពូលស្មាតហ្វូន Galaxy S10 ដែរ។
គ្រាប់ទី 2 មានទំហំ 8.0MP មានកម្រិត aperture f/2.2 ជាប្រភេទ Ultra –wide lens សម្រាប់ថតរូបភាពប្លង់ទូលាយបានក្នុងកម្រិតមុំ 123 ដឺក្រេជាមួយមុខងារ Fixed focus និងដើរតួរជាលែន Depth Sensor សម្រាប់ផលិតរូបភាពព្រាលផ្ទៃ រីគ្រាប់ទី 3 ជាលែន TOF 3D (Time of Flight) សម្រាប់ជំនួយបន្ថែមក្នុងការផលិតរូបភាពព្រាលផ្ទៃអោយកាន់តែមានលក្ខណះផុសអណ្តែត និងកាត់គែមរូបភាពបានត្រឹមត្រូវដាច់ស្អាត។ កាមេរ៉ាទាំងបីគ្រាប់នេះអមមកជាមួយអំពូលភ្លើង LED Flash មួយគ្រាប់ និងមានសមត្ថភាពផលិតសាច់វីដេអូបានក្នុងកម្រិត 4K ក្នុងល្បឿន 30fps។ ហើយដោយសារតែវាប្រើប្រាស់ Module Camera បង្វិលបានដូច្នោះវាមិនមានកាមេរ៉ាសែលហ្វីនោះទេគឺវាប្រើប្រព័ន្ធកាមេរ៉ាក្រោយក្នុងការថតរូបសែលហ្វីតែម្តង ដូច្នេះយើងនឹងទទួលបានរូបភាពសែលហ្វីដែលមានគុណភាពខ្ពស់ចេញពីប្រព័ន្ធកាមេរ៉ារបស់ Galaxy A80 ទោះថតក្នុងលក្ខខណ្ឌណាក៏ដោយ។
កំលាំងម៉ាស៊ីនខ្លាំងល្មមប្រើការ
យើងដឹងហើយថាគ្រួសារស្មាតហ្វូន Galaxy A របស់ Samsung គឺជាស្មាតហ្វូនធុនកណ្តាលបន្ទាប់ពីកំពូលស្មាតហ្វូនត្រកូល Galaxy S និង Note ដូច្នេះកំលាំងម៉ាស៊ីនរបស់ពួកវាគឺស្ថិតនៅក្នុងតារាងស្មាតហ្វូនធុនកណ្តាលផងដែរ។ Samsun Galaxy A80 ប្រតិបត្តិការលើបន្ទះឈីប Qualcomm Snapdragon 730 ខ្នាត 8nm អូសដោយអង្គគណនាចំនួន 8-core ដោយ 2-Core អូសបានល្បឿន 2.2GHz និង 6-core អូសបានល្បឿន 1.7GHz ដោយរត់លើប្រព័ន្ធ Kryo 470។ កំលាំងឈីបរបស់វាគាំទ្រល្បឿនរត់ដោយរ៉េមទំហំ 8GB ជាមួយអង្គក្រាហ្វិច Adreno 618។ ស្មាតហ្វូនមួយនេះមានទំហំផ្ទុកទិន្នន័យស្រាប់ក្នុងម៉ាស៊ីនទំហំ 128GB តែមិនអាចដាក់បន្ថែមទំហំផ្ទុកបានទេ។
វាមានថ្មកំលាំង 3,700mAh ទ្រទ្រង់នូវបច្ចេកវិទ្យាសាកចូលល្បឿនលឿន Super-Fast Charging ជាមួយដុំឆ្នាំងសាកកំលាំង 25 វ៉ាត់សាកចូលតាមរយះរន្ធចម្លងប្រភេទ USB-C2.0។ Galaxy A80 ប្រើប្រាស់បានស៊ីមកាតពីរទ្រទ្រង់នូវប្រព័ន្ធ 4G LTE Cat.12 និងបច្ចេកវិទ្យា Bluetooth v5.0។ Galaxy A80 ត្រូវបានដំឡើងមកជាមួយនូវប្រព័ន្ធប្រតិបត្តិការ Android 9.0 Pie ស្រោបដោយផ្ទៃ One UI ដូចកំពូលស្មាតហ្វូន Galaxy S10 ដែរ។
ការរចនារូបរាងដ៏ប្រណិតជាមួយបន្ទះអេក្រង់លាតពេញផ្ទៃគ្មានឆក
សម្រាប់រូបរាង និងការរចនាខាងក្រៅរបស់ Galaxy A80 មានភាពស្រស់ស្អាតប្រណិតមិនចាញ់កំពូលស្មាតហ្វូន Galaxy S10 ប៉ុន្មានឡើយដោយសារតែវាមានផ្ទៃមុខក្រោយស្រោបដោយកញ្ចក់ និងព័ទ្ធវិញរតួរដោយស៊ុមលោហះដ៏រឹងមាំ។ ស្មាតហ្វូននេះមានទំហំវិមាត្ររួម 165.2 x 76.5 មម ជាមួយកម្រាស់ 9.3ម.ម។ ផ្ទៃខាងមុខរបស់ Galaxy A80 បំពាក់នូវបន្ទះអេក្រង់លាតពេញផ្ទៃធំទូលាយគ្មានគែមឆកទំហំ 6.7” ប្រភេទបន្ទះបង្ហាញ Super AMOLED Display ទ្រទ្រង់ការបង្ហាញចេញកម្រិត Full-HD+ ទំហំ 1080x2400px នៅលើផ្ទៃបង្ហាញសរុប85.8% ជាមួយកម្រិតភាពច្បាស់ 393ppi។
លក្ខណះពិសេស និងទំនើបបំផុតនៅលើអេក្រង់របស់ Galaxy A80 គឺការប្រើប្រាស់នូវប្រព័ន្ធដោះសោរសុវត្ថិភាព Biometric Tech បង្កប់ក្រោមកញ្ចក់អេក្រង់ដែលធ្វើអោយការប្រើប្រាស់កាន់តែទំនើប និងមានសុវត្ថិភាពខ្ពស់។ Samsung Galaxy A80 មានជម្រើសពណ៍ដូចជាទឹកមាស “Angel Gold”, ពណ៌ស “Ghost White”, និងខ្មៅ “Phantom Black”៕
