ស្លាកសញ្ញាស្មាតហ្វូន “Reno” ថ្មីរបស់ក្រុមហ៊ុន Oppo គឺជាប្រធានបទក្តៅមួយដែលបណ្តាលព័ត៌មានក្នុងស្រុក និងក្រៅស្រុកមានការចាប់អារម្មណ៍ខ្លាំងហើយក៏មានការតាមដាននៃការវវិឌ្ឍន៍ជាបន្តបន្ទាប់ស្តីពីស្មាតហ្វូនស៊េរីថ្មីពាក់ឈ្មោះថ្មីមួយនេះផងដែរ។ ក្នុងរយះពេលជិតមួយសប្តាហ៍មុនថ្ងៃស្មាតហ្វូននេះបង្ហាញខ្លួនផ្លូវការណ៍មានបណ្តាសារព័ត៌មានជាច្រើនបានតាមដានព្រមទាំងបានធ្វើការចុះផ្សាយទាក់ទងនឹងការរចនារូបរាង និងគុណសម្បត្តិទូទៅរបស់ស្មាតហ្វូនម៉ាក Reno នេះជាច្រើន។
ហើយពេលនេះព័ត៌មានចចាមអារាមទាំងឡាយត្រូវបានបញ្ចប់ដោយសារតែពេលនេះ Oppo បានធ្វើការដាក់បង្ហាញចេញទូរស័ព្ទស្មាតហ្វូនស៊េរីថ្មីពាក់ឈ្មោះថ្មីរបស់ខ្លួនជាផ្លូវការណ៍នៅក្នុងព្រឹត្តិការណ៍មួយក្នុងទីក្រុងបេកាំងប្រទេសចិនដែលមានរហូតដល់ទៅពីរម៉ូដែលឯណោះគឺ Oppo Reno និង Reno 10x Zoom Edition។
-Oppo Reno 10x Zoom Edition:
យើងអាចនិយាយបានថា Reno 10x zoom Edition គឺជាគូប្រជែងទៅលើប្រព័ន្ធកាមេរ៉ាជាមួយនឹង Huawei P30 Pro ដោយសារតែម៉ូដែលថ្មីមួយនេះត្រូវបានក្រុមហ៊ុន Oppo ធ្វើការបំពាក់មកជាមួយនូវប្រព័ន្ធកាមេរ៉ាថតរូបដែលមានសមត្ថខ្ពស់ដែលអាចធ្វើការពង្រីកប្លង់ថតបានដល់ 10 ដងជាមួយមុខងារ Hybrid zoom ដោយប្រើលែនកាមេរ៉ាប្រភេទ Periscope ទំហំ 13MP ជាមួយទំហំ aperture ធំបំផុតកម្រិត f/3.0 ហើយបើយើងធ្វើការប្រៀបធៀបទៅឃើញថាលែន Periscope របស់ Reno 10x zoom Edition មានកម្រិតរីសូលូហ្ស៊ីនខ្ពស់ជាង និងទំហំ aperture ធំទូលាយជាងលែន Periscope របស់ Huawei P30 Pro។ ហើយសម្រាប់លែនកាមេរ៉ាមេវិញមានទំហំ 48MP មានកម្រិត aperture f/1.7 និងលែនកាមេរ៉ា Ultra-wide មានទំហំ 8.0MP មានកម្រិត aperture f/2.2 មានសមត្ថភាពថតប្លង់ទូលាយបានក្នុងកម្រិតមុំ 120 ដឺក្រេ។ ប្រព័ន្ធកាមេរ៉ាខាងក្រោយទាំងបីគ្រាប់របស់ស្មាតហ្វូនស៊េរីថ្មីនេះអមដោយអំពូលភ្លើង LED Flash មួយគ្រាប់ប្រភេទ Laser autofocus PDAF មានមុខងារ OIS និងអាចថតវីដេអូបានដល់ 4K ក្នុងល្បឿនលោតដល់ 60fps។
ងាកមកកាមេរ៉ាសែលហ្វីវិញគឺជាការវិវឌ្ឍន៍ថ្មីប្លែកពីកាមេរ៉ាស្មាតហ្វូនដទៃដោយសារតែវាប្រើប្រាស់នូវ Module camera ថ្មីបង្កប់ក្នុងគែមខាងលើរួចលូតចេញបែបផ្តេកចំហៀង ដូចរបាំងការពារសុវត្ថិភាពផ្លូវរថភ្លើងងីចឹងដោយ Oppo ហៅថា “ Shark Fin-Style Selfie camera” ដោយវានឹងងើបចេញពីគែមនៅពេលដំណើរការថតរូបសែលហ្វី និងដោះសោរដោយការស្កែនទម្រង់មុខ។ កាមេរ៉ានេះប្រើប្រាស់សែនស័រទំហំ 16MP ជាមួយកម្រិត aperture f/2.0 និងអាចថតរូបសែលហ្វីក្នុងប្លង់ទូលាយបានក្នុងកម្រិត 79.3 ដឺក្រេ។ Reno 10x zoom Edition បំពាក់នូវបន្ទះអេក្រង់ទំហំ 6.6” ប្រភេទអេក្រង់ AMOLED លាតពេញផ្ទៃគ្មានគែមឆក និងអាចបង្ហាញរូបភាព-វីដេអូបានក្នុងកម្រិត Full-HD+ នៅលើផ្ទៃបង្ហាញចេញសរុប 93.1%។
ស្មាតហ្វូននេះមានកំលាំងម៉ាស៊ីនអូសដោយកំពូលឈីប Qualcomm Snapdragon 855 ជាមួយរ៉េម និងទំហំផ្ទុកពីរជម្រើសគឺ 6GB RAM/128GB storage និង 8GB RAM/ 256GB Storage។ ហើយសម្រាប់ប្រតិបត្តិការវិញគឺវាដំឡើងមកជាមួយ Android Pie ស្រោបដោយ Color OS6 ចេញពីប្រអប់។ ជាមួយគ្នានេះដែរវាមានថ្មទំហំ 4,065mAh ទ្រទ្រង់នូវបច្ចេកវិទ្យាសាកបញ្ចូលល្បឿនលឿន WOOC3.0 និងទ្រទ្រង់នូវបច្ចេកវិទ្យាដោះសោរដោយការស្កែនក្រយ៉ៅម្រាមដៃដោយផ្ទាល់នៅលើអេក្រង់ថែមទៀតផង។ Reno 10x Zoom Edition មានពីរពណ៌គឺបៃតងហៅថា “Fog Sea Green” និងខ្មៅហៅថា “Extreme Night Black”។ សម្រាប់តម្លៃរបស់វាវិញគឺខ្ទង់ CNY3,999 ឬប្រហែល $595 សម្រាប់ម៉ូដែលមានរ៉េមទំហំ 6GB និងទំហំផ្ទុក 128GB និងខ្ទង់ CNY4,499 ឬប្រហែល $670 សម្រាប់ម៉ូដែលមានរ៉េមទំហំ 8GB និងទំហំផ្ទុក 256GB។
-Oppo Reno
សម្រាប់ម៉ូដែលនេះវិញគឺស្ថិតក្នុងលំដាប់ស្មាតហ្វូនធុនកណ្តាល “Mid-range” ដោយសារតែវាបានបំពាក់មកជាមួយនូវបន្ទះឈីបធុនកណ្តាលរបស់ Qualcomm ស៊េរី Snapdragon 710 SoC។ សម្រាប់ម៉ូដែល Reno នេះគឺបំពាក់នូវបន្ទះអេក្រង់កម្រិត Full-HD+ ទំហំ 6.4” ប្រភេទអេក្រង់បង្ហាញ AMOLED Display ដែលមានបង្កប់បច្ចេកវិទ្យាស្កែនក្រយ៉ៅម្រាមដៃផងដែរ។ ស្មាតហ្វូនធុនកណ្តាលក្នុងគ្រួសារថ្មីនេះប្រើប្រាស់ប្រព័ន្ធកាមេរ៉ាសែលហ្វីលាក់ខ្លួនទំហំ 16MP ដូចបងធំរបស់វា Reno 10x Zoom ដែរ ប៉ុន្តែវាមានកាមេរ៉ាក្រោយតែពីរគ្រាប់ប៉ុណ្ណោះជាមួយនឹងលែនគោលមានទំហំ 48MP មាន aperture f/1.7 និងកាមេរ៉ាជំនួយទំហំ 5.0MP ជា Depth Sensor សម្រាប់ផលិតរូបភាពព្រាលផ្ទៃខាងក្រោយ។ សម្រាប់ថ្មវិញគឺមានទំហំតូចជាងបងរបស់វាជាមួយទំហំ 3,765 mAh និងទ្រទ្រង់នូវបច្ចេកវិទ្យាសាកចូលល្បឿនលឿន WOOC3.0 ដូចគ្នា។
Oppo Reno មានបីម៉ូដែលសម្រាប់ជម្រើសរើសគឺម៉ូដែល 6GB RAM/128GB/256GB Storage និង 8GB RAM/256GB Storage។ រីឯប្រតិបត្តិការវិញគឺដូចគ្នាជាមួយនឹងបងធំរបស់វាដែរគឺ Android Pie ជាមួយ ColorOS6 ចេញពីប្រអប់។ ស្មាតហ្វូននេះមានជម្រើសពណ៌ដូចជាបៃតង “Fog Sea Green”, ផ្កាឈូក “Mist Pink”, ស្វាយ “Nebula Purple”, និងខ្មៅ “Extreme Night Black”។ ចំនែកតម្លៃរបស់វិញគឺខ្ទង់ CNY2,999 ($446) សម្រាប់ម៉ូដែល 6GB/128GB, ខ្ទង់ CNY3,299 ($491) សម្រាប់ម៉ូដែល 6GB/256GB និងខ្ទង់ CNY3,599 ($536) សម្រាប់ម៉ូដែល 8GB/256GB។ OPPO នឹងចេញលក់ម៉ូដែល Reno នៅក្នុងទីផ្សារប្រទេសចិននាថ្ងៃទី 19 ក្នុងខែមេសានេះ និងម៉ូដែល Reno 10x Zoom Edition នឹងចេញលក់នាពាក់កណ្តាលខែឧសភា ហើយស្មាតហ្វូនទាំងពីរនាក់បងប្អូននេះនឹងមានលក់ក្នុងទីផ្សារសកលនៅថ្ងៃទី 24 ក្នុងខែមេសា ឆ្នាំ 2019 ឆាប់ៗខាងមុខ៕