Samsung Electronics ក្រុមហ៊ុនបច្ចេកវិទ្យាយក្សដ៏ធំរបស់ប្រទេសកូរ៉េខាងត្បូង នឹងមានកាមេរ៉ាថតរូបកម្រិតខ្ពស់បំផុតជាងដៃគូរប្រជែងនៅពេលខាងមុខនេះ បន្ទាប់ពីការប្រកាសបង្ហាញនូវសេនស័ររូបភាពកម្រិតភាពច្បាស់ខ្ពស់បំផុតនៅលើពិភពលោកជាមួយនឹងទំហំរហូតដល់ទៅ 64 megapixels សម្រាប់ស្មាតហ្វូនជាច្រើន ដើម្បីជាការឆ្លើយតប ក៏ដូចជាបំពេញនូវតម្រូវការកើនឡើងនៃស្មាតហ្វូនដែលមានគុណភាពរូបភាពកាន់តែប្រសើរជាងមុន។
ក្រុមហ៊ុននេះ បានបង្ហាញនូវសេនស័ររូបភាព 0.8-micrometer pixel image sensorsចំនួន 2 គឺ 64mp Isocell Bright GW1 និង 48mp Isocell Bright GM2 ជាមួយនឹងការពង្រីកទៅលើសេនស័រ 0.8μm image sensor របស់ខ្លួនដែលបច្ចុប្បន្ននេះ គឺមានទំហំភិចសែលតូចជាងគេបំផុតមានវត្តមានហើយនៅលើទីផ្សារនោះ។
ក្រុមហ៊ុននាំចេញស្មាតហ្វូនធំជាងគេបំផុតនៅលើពិភពលោកនេះគឺផ្តោតទៅលើការពង្រឹងទៅលើមុខងារកាមេរ៉ានៅលើស្មាតហ្វូនជាច្រើនរបស់ខ្លួន ហើយមនុស្សជាច្រើនគិតថាគុណភាពរូបភាពគឺជាផ្នែកមួយដ៏សំខាន់នៅពេលដែលពួកគេទិញស្មាតហ្វូននោះ។
លោក Park Yong-in អនុប្រធានប្រតិបត្តិនៃក្រុមហ៊ុន Sensor នៅក្រុមហ៊ុន Samsung Electronics បាននិយាយថា "នៅក្នុងរយៈពេលប៉ុន្មានឆ្នាំកន្លងមកនេះ មានកាមេរ៉ាទូរស័ព្ទដៃជាច្រើន បានក្លាយជាឧបករណ៍សំខាន់សម្រាប់ថត និងចែកចាយពេលវេលាប្រចាំថ្ងៃរបស់យើង" ។ "ជាមួយនឹងភីកសែល និងបច្ចេកវិទ្យា ភីកសែល កម្រិតខ្ពស់នោះ Samsung Isocell Bright GW1 និង GM2 នឹងនាំមកនូវកម្រិតរូបភាពថ្មីមួយដល់ទូរស័ព្ទជាច្រើននាពេលបច្ចុប្បន្ននេះ។ "
ក្រុមហ៊ុន Samsung និយាយថាសេនស័រចាប់រូបភាពពីរនេះ បច្ចុប្បន្នកំពុងត្រូវបានគេធ្វើតេស្ត៍ ហើយត្រូវបានគេរំពឹងថា នឹងធ្វើការផលិតទ្រង់ទ្រាយធំនៅក្នុងឆមាសទី 2 ឆ្នាំនេះ៕