យើងបានដឹងហើយអំពីដំណើរការនៃបន្ទះឈីបកម្រិតខ្ពស់នេះ កម្រិតនៃដង់ស៊ីតេនៃត្រង់ស៊ីស្ទ័រនៅក្នុងបន្ទះឈីបនេះ ខណៈពេលដែលវានឹងនាំយកនូវការដំណើរការកាន់តែល្អជាងមុន និងមុខងារកាន់តែឆ្លាតវៃក្នុងការប្រើប្រាស់។ ថ្មីៗនេះ មានការបញ្ជាក់ថា iPhone 2020 អាចនឹងប្រើប្រាស់នូវដំណើរការឈីប 5nm SoC (A14)។
បន្ទះឈីប Apple A14 នេះ ត្រូវបានគេដឹងថា បានធ្វើការផលិតដោយប្រើប្រាស់នូវដំណើរការ 45nm ដោយទើបតែមានរយៈពេលប៉ុន្មានឆ្នាំប៉ុណ្ណោះ ឧស្សាហកម្មនេះ បានឈានដល់កម្រិតមួយដែលមិនធ្លាប់មាននោះទេ។ ឥលូវនេះ ក្រុមហ៊ុនគឺកំពុងតែប្រើប្រាស់នូវស្មាតហ្វូនជាច្រើនដែលមានឈីប 7nm ដែលមានដូចជាឈីប Qualcomm Snapdragon 855 ឈីប Kirin 980 និងឈីប Apple A13 ជាដើម។ កន្លងមកយើងប្រាកដជាធ្លាប់បានលឺពាក្យចចាមអារ៉ាមជាច្រើន ដែលបានបញ្ជាក់ថា បន្ទះឈីប Kirin 985 ជំនាន់បន្ទាប់នេះនឹងប្រើប្រាស់នូវដំណើរការ EUV ជាលើកដំបូងបំផុតសម្រាប់ធ្វើការឌីស្សាញទៅលើ IC Layout ដែលកាន់តែត្រឹមត្រូវ និងបង្កើនទៅលើដំណើរការកាន់តែមានប្រសិទ្ធិភាពថែមទៀតផង។
បន្ថែមពីនេះទៀត តាមការបញ្ជាក់នៃរបាយការណ៍ជាច្រើនកាលពីពេលមុននេះ TSMC ក៏មានគម្រោងក្នុងការចាប់ផ្តើមនូវការផលិតទ្រង់ទ្រាយធំផងដែរទៅលើដំណើរការនូវបន្ទះឈីប 5nm នៅក្នុងត្រីមាសទី 1 នៅឆ្នាំក្រោយនេះដែរ។ ទិន្នន័យនេះ មានការបង្ហាញថា ចំនួននៃត្រង់ស៊ីស្ទ័រនឹងមានការកើនឡើង 1.8 ដង និងកម្លាំងម៉ាស៊ីននឹងមានការកើនឡើងដល់ទៅ 15% បើធៀបជាមួយនឹងត្រង់ស៊ីស្ទ័រ 7nm នោះ។ សម្រាប់ iPhone នៅក្នុងឆ្នាំនេះ នឹងបន្តប្រើប្រាស់នូវបន្ទះឈីប A13 ដែលផ្អែកទៅលើដំណើរការនៃ 7nm នេះ ដែលជាធម្មតា ក្រុមហ៊ុនគ្រាន់តែធ្វើការ Upgrades ទៅលើកម្លាំងម៉ាស៊ីន AI និងលក្ខណៈសម្បត្តិជាច្រើនតែប៉ុណ្ណោះ។
នៅក្នុងពេលបច្ចុប្បន្ននេះ យើងនៅមិនទាន់មានព័ត៌មានអំពីការពង្រឹងទៅលើកម្លាំងម៉ាស៊ីនរបស់វាកម្រិតណា នៅលើដំណើរការនៃ 5nm នេះនោះទេ។ ទោះជាយ៉ាងណាក៏ដោយ មានរឿងមួយដែលច្បាស់នោះ គឺថាក្រុមហ៊ុន Apple មានគម្រោងក្នុងការប្រើប្រាស់នូវឈីប 5nm ដំបូងបំផុតនៅលើ iPhone 2020 ៕
