ក្រុមហ៊ុនបច្ចេកវិទ្យាយក្ស Huawei ត្រៀមខ្លួនក្នុងការបង្ហាញនូវស្មាតហ្វូនស៊េរីថ្មីរបស់ខ្លួននោះគឺ Huawei Mate 30 នៅក្នុងរយៈពេលប៉ុន្មានខែខាងមុខនេះ។ ថ្ងៃនេះមានរបាយការណ៍មួយបែកធ្លាយនៅលើអនឡាញបង្ហាញអំពីការឌីស្សាញរូបរាងដ៏ស្រស់ស្អាតរបស់ស្មាតហ្វូននេះហើយ។ របាយការណ៍នេះ គឺចេញពីក្រុមហ៊ុនសង្វាក់ផ្គត់ផ្គង់របស់ក្រុមហ៊ុននេះផ្ទាល់ដោយបានបញ្ជាក់ថា ស្មាតហ្វូននេះ នឹងមានតួខ្លួនយ៉ាងងស្រស់ស្អាតធ្វើពីកញ្ចក់ហើយគ្មានគែមលោហធាតុថែមទៀត។ ក្រុមហ៊ុន Huawei ជឿជាក់ថា ការឌីស្សាញប្រភេទនេះ គឺពិតជាអស្ចារ្យបំផុតសម្រាប់ស្មាតហ្វូននាពេលអនាគត។
នៅដើមឆ្នាំនេះ ក្រុមហ៊ុនបច្ចេកវិទ្យាចិន vivo ក៏បានប្រកាសបង្ហាញនូវស្មាតហ្វូនស៊េរីថ្មី Concept Phone ដែលមានការឌីស្សាញជាមួយនឹងតួខ្លួនធ្វើពីកញ្ចក់ផងដែរ។ ដូចជានេះ វាពិតជាអាចទៅរួចដែលថា ក្រុមហ៊ុន Huawei ត្រៀមខ្លួនបញ្ចេញនូវស្មាតហ្វូនមួយដែលមានការឌីស្សាញជាមួយនឹងតួខ្លួនធ្វើពីកញ្ចក់នោះ។ប្រសិនបើវាមិនមានរន្ធប្រហោងនៅលើអេក្រង់នោះទេ វាក៏អាចនឹងមានបញ្ហជាច្រើនកើតឡើងពាក់ព័ន្ធទៅនឹងរន្ធសម្រាប់ដាក់ស៊ីមផងដែរ។ របាយការណ៍នេះនិយាយថា ក្រុមហ៊ុនបច្ចេកវិទ្យានេះនឹងធ្វើការផ្លាស់ប្តូរទៅជាប្រើប្រាស់នូវ eSIM technology ជាជាងការប្រើប្រាស់ស៊ីម SIM Card ធម្មតា។
សម្រាប់ប៊ូតុងជាច្រើនដូចជាប៊ូតុងបិទបើកទូរស័ព្ទ (Power Button) និងប៊ូតុងឡើងចុះសំឡេង (Volume Keys) មានការនិយាយថា ក្រុមហ៊ុនបច្ចេកវិទ្យានេះនឹងប្រើប្រាស់នូវបច្ចេកវិទ្យា pressure-sensitive ថែមទៀត។ សម្រាប់ការបញ្ចូលថាមពលថ្មវិញនោះ ស្មាតហ្វូននេះគឺប្រើប្រាស់នូវបច្ចេកវិទ្យា Fast Charging។ ទោះជាយ៉ាងណាក៏ ដោយនេះ គឺគ្រាន់តែជាព័ត៌មានបែកធ្លាយតែប៉ុណ្ណោះ ហើយក៏មានភស្តុតាងតិចតួចប៉ុណ្ណោះ ដែលថាស្មាតហ្វូន Mate 30 នឹងប្រើប្រាស់នូវកញ្ចប់ស្រោបតួខ្លួនទាំងស្រុងរបស់វានោះ ប៉ុន្តែវាក៏អាចទៅរួចផងដែរ៕