ក្រុមហ៊ុន HMD Global នឹងមានវត្តមានៅក្នុងព្រឹត្តិការណ៍ IFA 2019 ខាងមុខនេះ ដើម្បីប្រកាសបង្ហាញនូវវត្តមានស្មាតហ្វូនស៊េរីថ្មីរបស់ខ្លួននៅថ្ងៃទី 5 ខែកញ្ញាខាងមុខនេះ។ មានការរំពឹងថា Nokia 7.2 នឹងក្លាយជាស្មាតហ្វូនមួយនៅក្នុងចំណោមស្មាតហ្វូនជាច្រើនដែលនឹងបង្ហាញខ្លួនក្នុងព្រឹត្តិការណ៍ IFA 2019 នេះ។ ព័ត៌មានថ្មីបំផុតដែលចែករំលែកដោយ Nokia Power User ក៏ទម្លាយអំពីតម្លៃ និងពណ៌របស់ស្មាតហ្វូននេះផងដែរ។ សម្រាប់ព័ត៌មានលម្អិតរបស់ស្មាតហ្វូននេះគឺមានការបែកធ្លាយចេញពីទិន្នន័យ Database របស់អ្នកចែកចាយដែលទម្លាយថា Nokia 7.2 នេះមានលេខម៉ូឌែល TA-1196 ហើយវាមាន 3 ពណ៌សម្រាប់ធ្វើការជ្រើសរើសគឺ Charcoal Black, Ice Blue និង Forest Green ។
ស្មាតហ្វូន Nokia 7.2 ត្រូវបានគេដឹងថា គឺបានបង្ហាញខ្លួននៅលើបញ្ជីរបស់គេហទំព័រលក់រាយចិនហើយនៅក្នុងតម្លៃត្រឹមតែ $274 ខណៈពេលដែលហាងផ្សេងទៀតដាក់លក់នៅក្នុងតម្លៃ $249។ សម្រាប់តម្លៃរបស់ Nokia 7.2 អាចនឹងមានតម្លៃផ្សេងៗគ្នាដោយផ្អែកទៅលើទីតាំងផ្សេងៗគ្នានោះ។ សង្ឃឹមថា ការបែកធ្លាយថ្មីនេះគឺមានតម្លៃពិតរបស់ស្មាតហ្វូននេះទៅចុះ។ ពាក្យចចាមអារ៉ាមជាច្រើនទម្លាយថា ស្មាតហ្វូន Nokia 7.2 នេះនឹងមានអេក្រង់ទំហំ 6.3-inch display ជាមួយនឹង waterdrop notch ។ វាទ្រទ្រង់នូវអេក្រង់ដែលមានកម្រិតភាពច្បាស់ full HD+ ។ស្មាតហ្វូននេះប្រើប្រាស់នូវបន្ទះឈីប Snapdragon 710 ឬ 660។ វាមានទំហំ 4GB+64GB storage និង 6GB+128GB។
សម្រាប់ផ្នែកខាងក្រោយរបស់ស្មាតហ្វូន Nokia 7.2 នេះគឺមានកាមេរ៉ាដែលមានរូបរាងជារង្វង់ដែលមានភ្ជាប់ជាមួយនឹងកាមេរ៉ា ៣ គ្រាប់។ វាមានកាមេរ៉ាប្រភេទ 48-megapixel ZEISS optics lens និង wide-angle lens ជាមួយនឹង 120-degree field-of-view ។ ស្មាតហ្វូននេះមានថាមពលថ្មទំហំ 3,500mAh ដែលទ្រទ្រង់ទៅលើបច្ចេកវិទ្យា 18W fast charging ផងដែរ។ ក្រុមហ៊ុន HMD Global ត្រូវគេរំពឹងថា នឹងបង្ហាញនូវស្មាតហ្វូន Nokia 6.2 និង Nokia 5.2 ផងដែរនៅក្នុងព្រឹត្តិការណ៍ IFA 2019 នេះ។ ក្រុមហ៊ុនបច្ចេកវិទ្យារបស់ហ្វាំងឡង់នេះក៏ត្រៀមខ្លួនក្នុងការប្រកាសបង្ហាញនូវទូរស័ព្ទ Feature Phone ជាច្រើនម៉ូឌែលទៀតផងដែរនៅក្នុងព្រឹត្តិការណ៍នេះ៕