បន្ទាប់ពីការស៊ើបអង្កេតទៅលើសកម្មភាពរំលោភបំពានដែលមានការចែកចាយនៅលើអ៊ីនធើណិតរបស់ក្រុមហ៊ុន Huawei ពេលនេះប្រធានអាជ្ញាធររបស់ប្រទេសម៉ាឡេស៊ី បានអះអាងថា ប្រទេសនេះ នៅតែមានជំហរក្នុងការប្រើប្រាស់នូវឧបករណ៍ 5G របស់ក្រុមហ៊ុន Huawei។ សម្រាប់ប្រទេសជាច្រើនទៀតនៅក្នុងបណ្តាប្រទេសលោកខាងលិច ក៏បន្តចោទប្រកាន់ថា ឧបករណ៍របស់ក្រុមហ៊ុន Huawei អាចនាំអោយមានការបែកធ្លាយទិន្នន័យរបស់អ្នកប្រើប្រាស់។
ប្រទេសម៉ាឡេស៊ីនៅតែគាំទ្រដល់ក្រុមហ៊ុន Huawei ចាប់តាំងពីមានការចាប់ផ្តើមនៃការហាមឃាត់ពីសហរដ្ឋអាមេរិកថែមទៀត។ លោកនាយករដ្ឋមន្ត្រី Dr Mahathir របស់ប្រទេសម៉ាឡេស៊ី អះអាងកាលពីដើមឆ្នាំនេះថា ការស្រាវជ្រាវរបស់ក្រុមហ៊ុន Huawei គឺឆ្ងាយធំជាងសមត្ថភាពរបស់ប្រទេសម៉ាឡេស៊ី។ យើងនឹងប្រើប្រាស់នូវបច្ចេកវិទ្យារបស់ពួកគេ តាមអ្វីដែលអាចធ្វើទៅបាន។ គាត់បន្ថែមថា ក្រុមហ៊ុន Huawei គឺមានបច្ចេកវិទ្យាខ្ពស់ជឿនលឿនខ្លាំងជាងបច្ចេកវិទ្យារបស់សហរដ្ឋអាមេរិក។
លោកស្រី Nur Sulyna មកពី MCMC និយាយថា គ្រប់គ្នាកំពុងតែប្រកួតប្រជែងនៅក្នុងបច្ចេកវិទ្យា 5G ។ នៅក្នុងប្រទេសម៉ាឡេស៊ី គ្រប់គ្នាចង់ដឹងអំពីសក្តានុពលរបស់ខ្លួន តើយើងនឹងប្រើប្រាស់វាយ៉ាងម៉េច ដើម្បីសម្រួលដល់ចរាចរណ៍លឿន ការពង្រឹងទៅលើសុវត្ថិភាពនៅក្នុងផ្នែកកសិកម្ម និងសុខភាពនោះ នៅក្នុងសន្និសិទមួយនៅក្នុងកិច្ចប្រជុំតុមូលអាស៊ីប៉ាស៊ីហ្វិកលើកទី 33 ដែលរៀបចំឡើងដោយ វិទ្យាស្ថានការសិក្សាយុទ្ធសាស្ត្រ និងការសិក្សាអន្តរជាតិរបស់ប្រទេសម៉ាឡេស៊ី។ បើនិយាយអំពីហានិភ័យសុវត្ថិភាពនោះ វាមិនមែនផ្តាច់មុខសម្រាប់តែបច្ចេកវិទ្យារបស់ក្រុមហ៊ុន Huawei នោះទេ ប៉ុន្តែវាគឺសម្រាប់ឧបករណ៍ទាំងអស់ដែលមានសមត្ថភាពអាចតភ្ជាប់ជាមួយនឹងប្រព័ន្ធ Wi-Fi នោះ៕