កាលពីម្សិលមិញនេះ រូបភាពរបស់ស្មាតហ្វូន ASUS ROG Phone 4/5 បានបែកធ្លាយនៅលើ Weibo។ រូបភាពនេះ មានការបង្ហាញថា ផ្នែកខាងក្រោយរបស់ស្មាតហ្វូននេះ មិនមានភ្ជាប់ជាមួយនឹងឡូហ្គោ RGB-lit ROG នោះទេ ហើយសម្រាប់អេក្រង់ថ្មីដែលជាប្រភេទកញ្ចក់។ នៅថ្ងៃនេះ ប្រភពដែលជឿជាក់បាន Digital Chat Station ក៏បានចែករំលែកវីដេអូរបស់ស្មាតហ្វូន ROG Phone 5 ផងដែរ។ វីដេអូនេះ មានការបង្ហាញថា ផ្នែកខាងក្រោយរបស់ស្មាតហ្វូននេះ គឺមានអេក្រង់ទី 2 ផងដែរ។
ផ្នែកខាងក្រោយរបស់ស្មាតហ្វូន ROG Phone 5 នេះ មានការបង្ហាញថា ហ្គេមីងហ្វូនថ្មីនេះ មានកាមេរ៉ា 3 គ្រាប់ជាមួយនឹងភ្លើង LED flash ថែមទៀតផង។ អេក្រង់ទី 2 នេះ មានការបង្ហាញអំពីព័ត៌មានក្នុងការលេងហ្គេម និងសារជាច្រើនទៀតដូចជាការខលជាដើម។ សម្រាប់លេខ “05” ដែលនៅជាប់នឹងអេក្រង់ទី 2 នេះគឺអាចបញ្ជាក់ថា ហ្គេមីងហ្វូននេះ គឺមានឈ្មោះហៅថា ROG Phone 5 មិនមែនជាហ្គេមីងហ្វូន ROG Phone 4 នោះទេ។
កាលពីសប្តាហ៍មុននេះ ក្រុមហ៊ុន ដែលមានមូលដ្ឋាននៅក្នុងតៃវ៉ាន់នេះ បានចែករំលែកនូវរូបភាពរបស់ស្មាតហ្វូន ROG ជំនាន់ថ្មីនេះផងដែរ។ មានការបញ្ជាក់ថា ស្មាតហ្វូននេះ គឺមានការឌីស្សាញអេក្រង់កាន់តែល្អជាងមុន ជាមួយនឹងគែមស្តើងថែមទៀត។ នៅក្នុងវីដេអូដែលមានការបែកធ្លាយជាច្រើននេះ មានការបង្ហាញថា វាមិនមានការផ្លាស់ប្តូរទៅលើការឌីស្សាញអេក្រង់របស់ស្មាតហ្វូន ROG Phone 5 នោះទេ។ ស្មាតហ្វូននេះ មានគែមស្តើងនៅផ្នែកខាងឆ្វេង និងខាងស្តាំរបស់វាថែមទៀត។
របាយការណ៍ជាច្រើនទម្លាយថា ហ្គេមីងហ្វូន ROG Phone 5 នឹងមានអេក្រង់ OLED ដែលមានទំហំ 6.6 inches ជាមួយនឹងកម្រិត refresh rate ខ្ពស់។ ស្មាតហ្វូននេះមានបន្ទះឈីប Snapdragon 888 SoC និងថាមពលថ្មទំហំ 6,000mAh ដែលមានភ្ជាប់នូវបច្ចេកវិទ្យា 65W rapid charging technology រួមជាមួយនិងកាមេរ៉ាគោលទំហំ 64-megapixel ថែមទៀតផង៕