ក្រុមហ៊ុន Sennheiser ចង់លក់អាជីវកម្ម Consumer Audio Business របស់ខ្លួនទៅអោយក្រុមហ៊ុន Google

Sennheiser គឺជាក្រុមហ៊ុនផលិតឧបករណ៍សំឡេងដ៏មានប្រជាប្រិយភាពមួយរបស់ប្រទេសអាល្លឺម៉ង ហើយក៏ជាក្រុមហ៊ុនដែលមានអាជីវកម្មផលិតផលឧបកណ៍សំឡេងចម្រុះមួយផងដែរដូចជាការផលិតកាសស្តាប់ត្រចៀកគ្រប់ប្រភេទ បង្កើតប្រព័ន្ធបច្ចេកវិទ្យា Hi-Fi systems, Studio microphones, conferencing systems, និង amplifiers ជាដើម។ ហើយឥលូវនេះក្រុមហ៊ុនអាល្លឺម៉ងមួយនេះបាននិយាយថាខ្លួនចង់លក់អាជីវកម្ម Consumer Audio Business របស់ខ្លួន។

 នៅក្នុងសេចក្តីថ្លែងការណ៍ផ្លូវការមួយដែលបានចេញផ្សាយនៅថ្ងៃនេះលោក Andreas Sennheiser និងលោក Daniel Sennheiser ដែលជាសហនាយកប្រតិបត្តិនៃស្លាកយីហោអូឌីយ៉ូ (Audio Brand) និងចៅប្រុសរបស់ស្ថាបនិក Sennheiser បានបង្ហាញថាពួកគេកំពុងស្វែងរកដៃគូដែលនឹងវិនិយោគនៅក្នុងអាជីវកម្ម Consumer Audio Business របស់ពួកគេ ព្រោះថាពួកគេត្រូវផ្តោតទៅលើការប្រមូលធនធានរបស់ពួកគេសម្រាប់ធ្វើការវិនិយោគទៅលើអាជីវកម្មចំនួនបីផ្សេងទៀត។ អាជីវកម្មរបស់ក្រុមហ៊ុន Sennheiser បែងចែកជាបួនប្រភេទផ្សេងគ្នាក្នុងនោះមានដូចជា អាជីវកម្ម  Pro Audio, Business Communications, Neumann, និង Consumer Electronics។

សម្រាប់អាជីវកម្ម Consumer Audio Business របស់ក្រុមហ៊ុនអាល្លឺម៉ង់នេះ គឺផ្តោតសំខាន់ទៅលើការផលិតកាសស្តាប់ត្រចៀក និងឧបករណ៍បំពងសំឡេង Soundbars ហើយ Sennheiser បាននិយាយថាខ្លួនចង់បានដៃគូដែលអាចពង្រឹងភាពរឹងមាំនៃស្លាកយីហោផលិតផលរបស់ខ្លួនដែលត្រូវបានគេស្គាល់ថាជាការផ្តល់នូវឧបករណ៍សម្លេងដែលល្អបំផុត និងផ្តល់នូវបទពិសោធន៍សំឡេងដ៏ប្លែកបំផុតខុសពីគេ។ Sennheiser បានមានប្រសាសន៍ថា ខ្លួននឹងជូបពិភាក្សាជាមួយក្រុមហ៊ុនដែលមានសក្តានុពលមួយរបស់ពិភពលោកក្នុងពេលឆាប់ៗនេះ ប៉ុន្តែមិនបានបញ្ជាក់ពីឈ្មោះក្រុមហ៊ុនដែលខ្លួនត្រូវជូបពិភាក្សាក្នុងការចាប់ដៃគូសហការដើម្បីពង្រីកអាជីវកម្ម Consumer Audio Business របស់ខ្លួននោះទេ។ទោះជាយ៉ាងណា ប្រភពមួយចំនួនបានបង្ហើបថា Sennheiser នឹងជូបពិភាក្សាជាមួយនឹងក្រុមហ៊ុន Google សម្រាប់ការពង្រីកវិសាលភាពក្នុងអាជីវកម្មមួយនេះ។

ប្រភពផ្សេងៗទៀតបានលើកឡើងថា នេះជាឱកាសដ៏ល្អមួយដែលក្រុមហ៊ុន Search Engine យក្សរបស់អាមេរិកមួយនេះកំពុងស្វែងរកដើម្បីបង្កើតជាអាជីវកម្មឧបករណ៍សំឡេងផ្ទាល់ខ្លួនដូចដែលក្រុមហ៊ុន Apple បានទិញយកក្រុមហ៊ុន Beats Electronics ក្នុងឆ្នាំ 2014 អីចឹងដែរ។ ហើយប្រសិនបើ Google បានក្លាយជាដៃគូសហការសម្រាប់អាជីវកម្ម Consumer Audio Business របស់ក្រុមហ៊ុន Sennheiser ពិតមែននោះ គឺវាអាចនឹងជួយអោយក្រុមហ៊ុន Giant Search Engine មួយនេះ មានលទ្ធភាពក្នុងការបង្កើនអាជីវកម្ម Audio Business របស់ខ្លួន ខណៈដែរ បច្ចុប្បន្នក្រុមហ៊ុនអាមេរិកមួយនេះបានបង្កើតឡើងនៅឧបករណ៍បំពងសម្លេងឆ្លាតវៃ Google Home Smart Speaker និងកាសស្តាប់ត្រចៀក Pixel Buds រួចហើយដែរ។

ជាងនេះទៅទៀតក្រុមហ៊ុន Google ក៏នឹងអាចពង្រីកវិសាលភាពនៃទីផ្សារសេវាកម្មរបស់ខ្លួនទៅជាផលិតផលកាន់តែច្រើនទៅតាមប្រភេទ និងតម្លៃផ្សេងៗពីគ្នាថែមទៀតផង។ ហើយយើងក៏រំពឹងដែរថា នឹងអាចបានឃើញបច្ចេកវិទ្យាថ្មីៗរបស់ Sennheiser នៅក្នុងឧបករណ៍ Google Pixel ទាំងឡាយនាពេលអនាគត៕