យើងធ្លាប់ទទួលបានរបាយការណ៍មួយដែលចេញផ្សាយដោយបណ្តាញសារព័ត៌មាន The Elec ដែលបានចុះផ្សាយកាលពីខែធ្នូ ឆ្នាំ 2020 កន្លងទៅ ដោយបាននិយាយថា ក្រុមហ៊ុន OPPO, vivo, Xiaomi និង Google នឹងប្រកាសចេញស្មាតហ្វូនអេក្រង់បត់ដំបូងរបស់ខ្លួននៅឆ្នាំ 2021 នេះ។ ប៉ុន្តែ ក្នុងរបាយការណ៍ដែលចេញផ្សាយក្នុងថ្ងៃនេះវិញ គឺមិនបាននិយាយពីក្រុមហ៊ុន vivo នោះឡើយ ដោយនៅក្នុងរបាយការណ៍រាយការណ៍ថា ក្រុមហ៊ុន Samsung បាននឹងកំពុងធ្វើការអភិវឌ្ឍន៍ផលិតបន្ទះអេក្រង់បត់សម្រាប់ផ្គត់ផ្គង់អោយក្រុមហ៊ុន Google, OPPO និង Xiaomi។ នៅក្នុងរបាយការណ៍ថ្មីនេះក៏បានពណ៌នា លក្ខណៈសម្បត្តិខ្លះៗនៃបន្ទះអេក្រង់បត់របស់ក្រុមហ៊ុន OEM ទាំងនេះ រួមទាំងបញ្ជាក់ពីទំហំអេក្រង់របស់ក្រុមហ៊ុននិមួយៗផងដែរ។
ដំបូងចាប់ផ្តើមនិយាយពីក្រុមហ៊ុន OPPO ទៅ ដោយក្រុមហ៊ុនផលិតស្មាតហ្វូនរបស់ចិនមួយនេះត្រូវបានប្រភពបានបញ្ជាក់ថា សម្រាប់បន្ទះអេក្រង់ Foldable Display ដែលក្រុមហ៊ុនបានអោយ Samsung ផលិតអោយនោះគឺហៅថា Clamshell Display ដែលមានស្ទីលបត់ពីលើមកក្រោម (ដូចរូបដែលបានបង្ហាញ) និងមានប្រវែងវែងនៅពេលពន្លាចេញ។ ប្រភពបញ្ជាក់ទៀតថា OPPO ក៏បានធ្វើការជាមួយនឹង Samsung, BOE និង Visionor សម្រាប់ការអភិឌ្ឍន៍ផលិតបន្ទះអេក្រង់បត់ទំហំ 7.7 អ៊ីញរួចហើយ។
ងាកមកក្រុមហ៊ុន Xiaomi វិញ ត្រូវបានគេដឹងថានឹងប្រើបន្ទះក្រង់បត់ស្ទាយដូច Galaxy Z Fold Series ដែរ។ ហើយបើតាមរូបភាពគំរូអេក្រង់បត់ដែលផលិតដោយ Visionor គឺបញ្ជាក់ថាមានទំហំ 7.92 អ៊ីញ។ ប៉ុន្តែ Xiaomi ក៏នឹងធ្វើការជាមួយក្រុមហ៊ុន Samsung និង CSOT ក្នុងការបង្កើតបន្ទះអេក្រង់បត់ដែលមានទំហំ 8.02 អ៊ីញផងដែរ។ ទោះជាយ៉ាងណាបើតាមឯកសារដែល Xaiomi បានដាក់ស្នើរសុំប៉ាតង់ផលិតស្មាតហ្វូនអេក្រង់បត់របស់ខ្លួនកន្លងមក បានបញ្ជាក់ថា ក្រុមហ៊ុននេះនឹងផលិតស្មាតហ្វូនអេក្រង់បត់ដែលមានអេក្រង់ពន្លាចេញទំហំ 6.38 អ៊ីញប៉ុណ្ណោះ។ សូមបញ្ជាក់ថា ក្រុមហ៊ុន CSOT និង BOE របស់ចិនគឺជាអ្នកផលិត និងផ្គត់ផ្គង់បន្ទះអេក្រង់បត់ទៅអោយក្រុមហ៊ុន Motorola ប្រើនៅលើទូរស័ព្ទ Motor Razr 2019។
ចំពោះក្រុមហ៊ុន Google វិញ ត្រូវបានប្រភពរាយការណ៍ថា បានស្នើរអោយ Samsung ធ្វើការផលិតនូវអេក្រង់បត់ប្រភេទ OLED អោយខ្លួនដែលមានទំហំប្រមាណ 7.6 អ៊ីញ។ ហើយក្រុមហ៊ុនអាមេរិកនេះគឺចាប់ដៃសហការតែជាមួយ Samsung ប៉ុណ្ណោះ សម្រាប់ការផលិតបន្ទះអេក្រង់បត់ប្រើនៅលើអនាគតស្មាតហ្វូន Pixel Foldable Phone របស់ខ្លួន។ នាពេលបច្ចុបប្បន្នក្រុមហ៊ុន Samsung គឺជាក្រុមហ៊ុនតែមួយគត់ដែលមានទីផ្សារឈានមុខគេនៅក្នុងឧស្សាហកម្មទូរស័ព្ទអេក្រង់បត់ ក៏ដូចជាការផលិត និងផ្គត់ផ្គង់បន្ទះអេក្រង់បត់។ ហើយក្នុងឆ្នាំ 2021 នេះក្រុមហ៊ុនបច្ចេកវិទ្យាយក្សរបស់កូរ៉េខាងត្បូងមួយនេះត្រូវបានគេព្យាករណ៍ថា នឹងបញ្ចេញទូរស័ព្ទអេក្រង់បត់ជំនាន់ថ្មីចំនួន 3 ស៊េរី ដោយក្នុងនោះក៏មាន Galaxy Z Flip 2 ដែលមានតម្លៃទាបផងដែរ៕
