រូបភាពគំរូនៃការឌីស្សាញរូបរាង រួមជាមួយនឹងគុណសម្បត្តិផ្សេងៗរបស់ទូរស័ព្ទ iOS ជំនាន់ថ្មីគឺ iPhone 13 Series តែងតែត្រូវបានគេទម្លាយចេញមកហូរហែរមិនដាច់សោះឡើយពីមួយថ្ងៃទៅមួយថ្ងៃ។ ដូចជាថ្ងៃនេះអីចឹង នៅលើប្លុកទម្លាយព័ត៌មានមួយដែលមានឈ្មោះថា 91Mobiles បានទម្លាយចេញនូវរូបភាពគំរូបែប 3D render ថ្មី ដែលគេដឹងថាជារូបគំរូឌីស្សាញiPhone 13 Pro។
រូបភាពគំរូបែប 3D ថ្មីនេះបានបង្ហាញថា iPhone 13 Pro គឺមានការឌីស្សាញដូចជំនាន់ iPhone 12 Pro ដដែល ប៉ុន្តែ បើមើលទៅលើប្រព័ន្ធកញ្ចប់លែនកាមេរ៉ាខាងក្រោយរបស់វាគឺពង្រីកទំហំធំជាង ជាមួយនឹងឆកអេក្រង់រួមតូចជាង iPhone 12 Pro បន្តិច។ បើតាមរយះគេហទំព័រសារព័ត៌មាន MySmartPrice ដែលបានទម្លាយចេញកាលពីថ្ងៃម្សិលមិញនេះបានបញ្ជាក់ច្បាស់ថា iPhone 13 Pro គឺនៅរក្សាទំហំអេក្រង់ 6.1 អ៊ីញដូច iPhone 12 Pro ដដែល ប៉ុន្តែ ពង្រួមឆកអេក្រង់អោយរួមតូចជាងបន្តិច។
មិនមែនជារឿងថ្មីនោះទេសម្រាប់ព័ត៌មានដែលបាននិយាយពីការពង្រួមឆកអេក្រង់របស់ iPhone 13 Series ប៉ុន្តែ សម្រាប់ការពង្រីកប្រព័ន្ធកញ្ចប់លែនកាមេរ៉ាក្រោយទើបជារឿងថ្មី ព្រោះថាទើបត្រូវបានបង្ហាញចេញក្នុងពេលនេះ។ ប្រព័ន្ធកញ្ចប់លែនកាមេរ៉ាក្រោយរបស់ iPhone 13 Pro អាចនឹងមានទំហំធំដូចកញ្ចប់លែនរបស់ iPhone 12 Pro Max និង 13 Pro Max ដែរ។
ហើយការពង្រីកទំហំកញ្ចប់លែនរបស់ iPhone 13 Pro ដូចនេះត្រូវបានគេសង្ស័យថា Apple នឹងបង្កើនសមត្ថភាពប្រព័ន្ធកាមេរ៉ារបស់ iPhone 13 Pro ជាមួយនឹងការប្រើប្រាស់នូវសែនស័រធំជាងមុន និងប្រើ Sensor-Shift Stabilization ដូចប្រព័ន្ធកាមេរ៉ារបស់ iPhone 12 Pro Max បច្ចុប្បន្នដែរ។ប្រភពបានបញ្ជាក់ទៀតថា iPhone 13 Pro នឹងមានទំហំវិមាត្ររួម (បណ្តោយ/ទទឹក) ដូចគ្នានឹង iPhone 12 Pro ដែរគឺ 146.7mm x 71.5mm ជាមួយកម្រាស់ 7.6mm ក្រាស់ជាង iPhone 12 Pro ប្រមាណ 0.2mm។
ការបង្កើនកម្រាស់ក្រាស់ជាងជំនាន់មុនដូច្នេះ បើតាមរបាយការណ៍បញ្ជាក់របស់លោក Ming-Chi Kuo ដែលមានចុះផ្សាយកន្លងមកបានប្រាប់អោយដឹងថា Apple នឹងបង្កើនទំហំថ្មរបស់ iPhone 13 Pro ធំជាងថ្មរបស់ iPhone 12 Pro។ បើតាមរបាយការណ៍ជាច្រើនបានលើកឡើងដូចៗគ្នាថា iPhone 13 Pro និង 13 Pro Max នឹងបំពាក់នូវបន្ទះអេក្រង់ថ្មី LPTO-OLED មានទំហំ 6.1 អ៊ីង និង 6.7 អ៊ីង ដូចជាជំនាន់ iPhone 12 Pro Series ដែល ប៉ុន្តែមានកម្រិត refresh rate ខ្ពស់ជាងមុខឡើងមកដល់ 120Hz ចំនែក iPhone 13 និង 13 mini គឺបន្តប្រើប្រាស់បន្ទះអេក្រង់ដូចជំនាន់មុនដដែល ៕
