Rockley Photonics ដែលជាក្រុមហ៊ុនដ៏ធំរបស់ចក្រភពអង់គ្លេស បានត្រៀមខ្លួនក្នុងការចូលទៅក្នុងផ្សារភាគហ៊ុន New York Stock Exchange នៅក្នុងពេលដ៏ខ្លីខាងមុខនេះហើយ។ យោងតាមខ្លឹមសារនៅក្នុងឯកសារ ដែលក្រុមហ៊ុននេះ បានដាក់ទៅកាន់គណៈកម្មការមូលបត្រអាមេរិក SEC នោះ គឺមានបង្ហាញថា ក្រុមហ៊ុននេះ ក៏មានទំនាក់ទំនងជាមួយនឹងក្រុមហ៊ុន Apple ផងដែរ។ ក្រុមហ៊ុនេះ ត្រូវបានគេដឹងថា នឹងផ្តល់នូវបច្ចេកវិទ្យាក្នុងការវាស់ទៅលើជាតិក្លូកូសនៅក្នុងឈាមរបស់ខ្លួន ទៅអោយ Apple សម្រាប់ប្រើប្រាស់នៅលើនាឡិកា Apple Watch Series 7 នៅក្នុងឆ្នាំ 2022 ខាងមុខនេះថែមទៀតផង។
សូមជំរាបផងដែរថា កាលពីខែមករាកន្លងទៅនេះ មានរបាយការណ៍ជាច្រើនបានបញ្ជាក់ថា នាឡិកា Watch Series 7 អាចធ្វើតេស្តទៅលើជាតិស្ករនៅក្នុងឈាមបាន។ ក្រុមហ៊ុន Rockley Photonics ដែលមានទីស្នាក់ការកណ្តាលនៅក្នុងចក្រភពអង់គ្លេស ក៏បានធ្វើការឌីស្សាញ និងអភិវឌ្ឍទៅលើបច្ចេកវិទ្យា ដែលប្រើប្រាស់នូវ infrared ដើម្បីធ្វើការត្រួតពិនិត្យមើលទៅលើឈាមនៅក្នុងមនុស្សទៀតផង។ ក្រុមហ៊ុននេះបានបន្ថែមថា សេនស័រនេះ មិនត្រឹមតែអាចធ្វើការវាស់ទៅលើកម្រិតបេះដូង កម្រិតអុកស៊ីសែននៅក្នុងឈាមប៉ុណ្ណោះទេ គឺថែមទាំងអាចវាស់ទៅលើកម្រិតជាតិស្ករនៅក្នុងឈាម និងកម្រិតជាតិអាកុលថែមទៀត។
តាមការបញ្ជាក់នៅក្នុងឯកសាររបស់ SEC នេះ បានអោយដឹងថា ក្រុមហ៊ុន Rockley បានបង្ហាញនូវព័ត៌មានហិរញ្ញវត្ថុដែលមានការអះអាងថា ក្រុមហ៊ុន Apple គឺជាក្រុមហ៊ុនមួយនៅក្នុងចំណោមអតិថិជនរបស់ខ្លួនផងដែរ។ អតិថិជនកំពូលចំនួន 2 របស់ក្រុមហ៊ុននេះ គឺស្មើទៅនឹងប្រាក់ចំណូល 99.6% របស់ក្រុមហ៊ុននេះ នៅក្នុងឆ្នាំ 2019 និង 100% នៅក្នុងឆ្នាំ 2020 នេះ។ នៅពេលនេះ នៅមិនទាន់ច្បាស់នោះទេថា ក្រុមហ៊ុន Apple នឹងលក់បានចំនួនប៉ុន្មានគ្រឿងនោះទេ។
បន្ថែមពីនេះទៀតនោះ ឈ្មោះរបស់អតិថិជនរបស់ក្រុមហ៊ុនមួយនោះ ក៏មិនទាន់មានការទម្លាយផងដែរ។ តាមរបាយការណ៍ជាច្រើន គឺបាននិយាយថា ក្រុមហ៊ុននេះ មានកិច្ចព្រមព្រៀងក្នុងការផ្គត់ផ្គង់ និងអភិវឌ្ឍជាមួយនឹងក្រុមហ៊ុន Apple ។ នៅក្នុងពេលអនាគតនោះ ប្រាក់ចំណូលរបស់ក្រុមហ៊ុននេះ គឺផ្អែកទៅលើក្រុមហ៊ុន Apple និងអតិថិជនកំពូលៗមួយទៀត៕
