យោងតាមព័ត៌មានថ្មីនៅថ្ងៃនេះ បានសេសេរថា Xiaomi ដែលជាក្រុមហ៊ុនផលិតស្មាតហ្វូនរបស់ចិន បានទម្លាក់ក្រុមហ៊ុនបច្ចេកវិទ្យាយក្ស Samsung របស់ប្រទេសកូរ៉េខាងត្បូង នៅក្នុងការនាំមុខនៅក្នុងទីផ្សារស្មាតហ្វូននៅក្នុងប្រទេសអេស្ប៉ាញ ជាលើកដំបូងបំផុតនៅក្នុងខែមីនា ឆ្នាំ 2021 នេះ បើតាមការទម្លាយនៅក្នុងរបាយការណ៍ថ្មីចេញពីក្រុមហ៊ុន Counterpoint។
នៅក្នុងរបាយការណ៍នេះ បានបង្ហាញថា ក្រុមហ៊ុន Xiaomi គឺមានចំនែកទីផ្សារប្រហែលជា 35% នៅក្នុងប្រទេសអេស្ប៉ាញ ដែលមានការតាមពីក្រោយយ៉ាងប្រកៀកប្រកិតដោយក្រុមហ៊ុន Samsung ជាមួយនឹងចំណែកទីផ្សារចំនួន 34%។ របាយការណ៍នេះ បានបន្តថា ក្រុមហ៊ុន Apple គឺបានជាប់ចំណាត់ថ្នាក់លេខ 3 ដែលមានចំណែកទីផ្សារចំនួន 14% ហើយក្រុមហ៊ុនជាច្រើនទៀត គឺមានចំនែកទីផ្សារចំនួន 18%។
សូមជំរាបថា ចំណែកទីផ្សាររបស់ក្រុមហ៊ុន Xiaomi នៅក្នុងប្រទេសអេស្ប៉ាញ កាលពីត្រីមាសទី 3 ឆ្នាំ 2020 កន្លងទៅនេះ គឺមានចំនួនត្រឹមតែ 24% ប៉ុណ្ណោះ ហើយពេលនេះ ក្រុមហ៊ុននេះ ធ្វើបានយ៉ាងល្អបំផុត ដោយអាចបង្កើននូវតួរលេខបានចំនួន 35% នៅក្នុងខែមីនាឆ្នាំ 2021 នេះ ដែលវាពិតជាមានកំណើនលឿនខ្លាំងមែនទែន។ ឆ្នាំមុននេះ ក្រុមហ៊ុន Samsung ក៏មានការកើនឡើងពី 25% ផងដែរ គឺនៅក្នុងខែមីនា ឆ្នាំ 2020 កន្លងទៅនេះ ហើយឆ្នាំនេះ ក៏ធ្វើបានល្អដូចគ្នាគឺបាន ចំនួន 34% នៅក្នុងខែមីនាឆ្នាំនេះ។
របាយការណ៍ Counterpoint បានបញ្ជាក់បន្ថែមថា ការលក់របស់ក្រុមហ៊ុន Xiaomi គឺមានការកើនឡើងចំនួន 3% ពីមួយខែទៅមួយខែ ហើយផលិតផលរបស់ក្រុមហ៊ុននេះ គឺមានការពេញនិយមខ្លាំងទៅលើស្មាតហ្វូន Redmi 9A និង Redmi K40 Series។ មកដល់ថ្ងៃនេះ ក្រុមហ៊ុន Xiaomi ដែលជាម៉ាកយីហោរបស់ចិន គឺមានគម្រោងក្នុងការពង្រីកប្រតិបត្តិការរបស់ខ្លួនទៅកាន់ទីផ្សារសកលផងដែរ។ អ្វីដែលពិសេសនោះ គឺបន្ទាប់ពីក្រុមហ៊ុន Huawei មានការធ្លាក់ចុះ គឺមានក្រុមហ៊ុនជាច្រើនមានដូចជា Xiaomi, vivo និង OPPO បានទាញយកនូវប្រយោជន៍ជាច្រើនពីក្រុមហ៊ុន Huawei និង Honor៕
