កាលពីប៉ុន្មានថ្ងៃមុននេះ ក្រុមហ៊ុន OPPO បានទម្លាយអំពីការមកដល់នៃផលិតផលអូឌីយ៉ូថ្មីនៅលើបណ្តាញសង្គមរបស់ខ្លួននៅក្នុងប្រទេសចិន។ នៅថ្ងៃនេះ អង្គភាពផ្នែក Acoustics & Health របស់ក្រុមហ៊ុននេះ បានចែករំលែកនូវរូបភាពមួយចំនួនរបស់នាឡិកាថ្មី OPPO Smart Band និងកាសស្តាប់ឥតខ្សែ Enco W51។ នៅក្នុងការបង្ហោះថ្មីនេះចេញពីអង្គភាព Acoustics របស់ក្រុមហ៊ុន Oppo នៅលើបណ្តាញសង្គម Weibo នេះ គឺមានការបង្ហើបអំពីការមកដល់នៃកាសស្តាប់ Truly Wireless Earbuds ដែលមានឈ្មោះហៅថា Enco W51។
ម៉ូដែលថ្មីនេះ ត្រូវបានគេបញ្ជាក់ថា គឺជា upgrade version ចេញពី Enco W31។ នៅក្នុងរូបភាពនេះ គឺមានការបង្ហាញអំពីការឌីស្សាញរូបរាងដែលស្រដៀងគ្នាទៅនឹងកាសស្តាប់ W31 ដែលដាក់លក់មួយរយៈផងដែរ។ នៅក្នុងរូបភាពថ្មីនេះ ក៏មានការទម្លាយនូវមុខងារថ្មី Noise Cancellation ដែលនឹងប្រើប្រាស់នៅលើកាសស្តាប់នេះ។ កាសស្តាប់នេះគឺមានពណ៌ស និងពណ៌ខ្មៅ។
បន្ថែមពីនេះទៀតនោះ នៅក្នុងគណនីបណ្តាញសង្គម Health របស់ក្រុមហ៊ុន OPPO ក៏មានការចែករំលែកនូវរូបភាពមួយរបស់នាឡិកាថ្មី OPPO Smart Band ផងដែរ។ ដែលមានមានពីរម៉ូឌែលក្នុងការជ្រើសរើស។ ម៉ូឌែលមួយគឺមានខ្សែពណ៌ខ្មៅ ហើយអេក្រង់របស់វាអាចដោះចេញបាន។ វាមាន Sport Mode សម្រាប់តាមដានក្នុងការហាត់ប្រាណ និងមួយទៀតគឺមានខ្សែពណ៌ស។ អេក្រង់របស់វាក៏មានមុខងារ Sleep Mode ផងដែរ។ ផលិតផលទាំងពីរនេះ អាចនឹងបង្ហាញខ្លួននៅក្នុងខែតែមួយដូចគ្នា គឺនៅក្នុងខែមិថុនានេះ។ ទោះជាយ៉ាងណា មកទល់ថ្ងៃនេះ ក្រុមហ៊ុន OPPO មិនទាន់ទម្លាយអ្វីច្រើនជាងនេះទេ ប៉ុន្តែកាលបរិច្ឆេទនៃការប្រកាសបង្ហាញផលិតផលនេះគឺឆាប់ៗនេះហើយ៕
