នៅក្នុងខែមិថុនានេះ ក្រុមហ៊ុន Honor បានប្រកាសថា ខ្លួននឹងបង្ហាញនូវកុំព្យូទ័រលេងហ្គេម notebook របស់ខ្លួន។ អ្នកទម្លាយព័ត៌មាននេះ បានអះអាងថា ផលិតផលថ្មីនេះ អាចនឹងប្រកាសបង្ហាញខ្លួននៅក្នុងខែនេះផងដែរ។ ប៉ុន្តែថ្មីៗនេះ គាត់ក៏បង្ហោះបន្ថែមថា សម្រាប់កុំព្យូទ័រលេងហ្គេម Honor Gaming Notebook នឹងបង្ហាញខ្លួននៅក្នុងខែសីហានេះ។
កាលពីម្សិលមិញនេះក្រុមហ៊ុន AMD និង Honor ក៏បានបង្ហាញនូវរូបភាពមួយចំនួននៅលើ Weibo ដែលមានការបញ្ជាក់ថា កុំព្យូទ័រលេងហ្គេម Honor gaming notebook ថ្មីនេះនឹងមានភ្ជាប់ជាមួយនឹងបន្ទះឈីបចុងក្រោយបំផុតរបស់ក្រុមហ៊ុន AMD។ នៅពេលនេះ ការបង្ហាញវត្តមានរបស់កុំព្យូទ័រនេះនៅក្នុងខែសីហាគឺកាន់តែកៀកហើយ ដូចនេះ ក្រុមហ៊ុន Honor ច្បាស់ជាទម្លាយនូវព័ត៌មានជាច្រើនបន្ថែមទៀតរបស់កុំព្យូទ័រនេះជាក់ជាមិនខានមុនការប្រកាសបង្ហាញជាផ្លូវការនោះ។
ក្រុមហ៊ុននេះ ប្រហែលជាបង្ហាញនូវកុំព្យូទ័រជាច្រើនម៉ូឌែល ដែលប្រើប្រាស់នូវបន្ទះឈីប AMD នៅក្នុងសីហាខាងមុខនេះ។ សម្រាប់កុំព្យូទ័រ Honor MagicBook Pro 2020 ដែលប្រកាសបង្ហាញខ្លួននៅក្នុងខែមិថុនានេះគឺមានបន្ទះឈីប Intel ជំនាន់ទី 10។ក្រុមហ៊ុននេះទម្លាយថា ខ្លួនមានគម្រោងក្នុងការបង្ហាញនូវ AMD Version សម្រាប់កុំព្យូទ័រ Honor MagicBook Pro 2020 នេះផងដែរ។ ក្រុមហ៊ុនបច្ចេកវិទ្យារបស់ចិននេះ ប្រហែលជាប្រកាសបង្ហាញកុំព្យូទ័រនេះជាមួយនឹងកុំព្យូទ័រលេងហ្គេមមួយទៀតនៅខែក្រោយនេះ។
អគ្គនាយករបស់ក្រុមហ៊ុន Honor លោក George Zhao កាលពីពេលមុននេះ បានប្រកាសថា ក្រុមហ៊ុនមានគម្រោងក្នុងការប្រកាសបង្ហាញនូវកុំព្យូទ័រលេងហ្គេម។ ដូចនេះ វត្តមានរបស់កុំព្យូទ័រ Notebook នេះគឺកាន់តែកៀកមែនទែនហើយ។ ប្រភពដដែលបាននិយាយថា ក្រុមហ៊ុន Huawei ក៏នឹងបង្ហាញនូវកុំព្យូទ័រលេងហ្គេមរបស់ខ្លួន បន្ទាប់ពីក្រុមហ៊ុន Honor បង្ហាញនូវកុំព្យូទ័រដែលប្រើប្រាស់នូវបន្ទះឈីប AMD នេះរួច។
Honor MagicBook Pro 2020 នេះ ប្រើប្រាស់នូវបន្ទះឈីប Intel Core i7 និង Core i5 ជំនាន់ទី 10។ ផលិតផលថ្មីនេះ មានអេក្រង់ទំហំ 16-inch រ៉េមទំហំ 16 GB DDR4 RAM និង PCIe SSD 512 GB storage៕