នៅក្នុងព្រឹត្តិការណ៍Galaxy Unpacked កាលពីយប់មិញនេះ ក្រុមហ៊ុន Samsung បានប្រកាសចេញនូវផលិតផលជាច្រើនក្នុងនោះក៏មានវត្តមានរបស់ស្មាតហ្វូន Galaxy Z Fold 2 ផងដែរ។ សម្រាប់ស្មាតហ្វូនដែលមានអេក្រង់បត់បាននេះគឺមានការឌីស្សាញរូបរាងថ្មី និងអេក្រង់ធំជាងមុនថែមទៀតផង។
នៅមុនពេលដែលយើងនិយាយអំពីការឌីស្សាញរបស់ស្មាតហ្វូននេះ យើងអាចដឹងថាឈ្មោះផ្លូវការរបស់ស្មាតហ្វូននេះគឺ Galaxy Z Fold 2 មិនមែន Galaxy Fold 2 នោះទេ។ ឈ្មោះនេះគឺមានការបញ្ជាក់ថា គ្រប់ស្មាតហ្វូនដែលអាចបត់បានទាំងអស់របស់ក្រុមហ៊ុន Samsung នឹងស្ថិតនៅក្រោមឈ្មោះ Galaxy Z series ។
ជាមួយនឹងការឌីស្សាញរូបរាងរបស់ស្មាតហ្វូននេះ រឿងដំបូងគេដែលយើងអាចធ្វើការកត់សម្គាល់នោះគឺផ្នែកអេក្រង់ខាងលើរបស់វា។ ស្មាតហ្វូននេះមានអេក្រង់ទំហំ 6.2-inch ដែលពិតជាធំមែនទែនបើធៀបទៅនឹង Galaxy Fold ដែលមានអេក្រង់ទំហំត្រឹមតែ 4.6-inch ប៉ុណ្ណោះ។ ស្មាតហ្វូននេះគឺជាប្រភេទ edge-to-edge Infinity-O ។ អេក្រង់គោលរបស់ស្មាតហ្វូននេះគឺពិតជាធំមែនទែនក្នុងពេលនេះដែលមានទំហំដល់ទៅ 7.6-inches ដែលធំជាងអេក្រង់ជំនាន់មុនដែលមានទំហំត្រឹមតែ 7.3-inch ប៉ុណ្ណោះ។
ស្មាតហ្វូននេះមានអេក្រង់ប្រភេទ Infinity-O ជាមួយនឹងរន្ធប្រហោងនៅគែមផ្នែកខាងស្តាំរបស់អេក្រង់នេះ។ ក្រុមហ៊ុននេះនិយាយថា វាប្រើប្រាស់នូវអេក្រង់ Ultra-Thin Glass ដែលផ្តល់នូវភាពងាយស្រួលក្នុងការបត់បែននេះ។ សម្រាប់ផ្នែកខាងក្រោយវិញនោះ ក្រុមហ៊ុន Samsung ខ្ចីនូវការឌីស្សាញរបស់ស្មាតហ្វូន Galaxy Note20 ។
ស្មាតហ្វូននេះ មានកាមេរ៉ា 3គ្រាប់ និងភ្លើង LED Flash មួយដូចទៅនឹងស្មាតហ្វូន Galaxy Note20 ផងដែរ ប៉ុន្តែវាមិនមានកាមេរ៉ា laser focus module នោះទេ។ សម្រាប់ត្រចៀកបត់របស់ស្មាតហ្វូនេះគឺមើលទៅល្អជាង Galaxy Fold ផងដែរ។ ស្មាតហ្វូន Galaxy Fold នេះមាន ២ ពណ៌នោះគឺ Mystic Black និង Mystic Bronze ។ វានឹងមានប្រភេទ Galaxy Z Fold 2 Thom Browne Edition ផងដែរ។
ក្រុមហ៊ុនបច្ចេកវិទ្យា Samsung នៅមិនទាន់ប្រកាសបង្ហាញនូវព័ត៌មានលម្អិតនៃលក្ខណៈសម្បត្តិរបស់ស្មាតហ្វូននេះនៅក្នុងការប្រកាសបង្ហាញវត្តមានជាផ្លូវការនេះនៅឡើយទេ។ ដូចគ្នាទៅនឹងលក្ខណៈសម្បត្តិផងដែរ សម្រាប់តម្លៃ និងកាលបរិច្ឆេទនៃការដាក់លក់ស្មាតហ្វូននេះនៅមិនទាន់ដឹងនៅឡើយទេ។ វាអាចនឹងបង្ហាញខ្លួននៅក្នុងខែកញ្ញាខាងមុខនេះ៕
