នៅពេលនេះ មានដំណឹងថា លោក Elon Musk កំពុងតែត្រូវបានស៊ើបអង្កេតលម្អិតទៅលើការទិញយកនូវក្រុមហ៊ុន Twitter ខណៈពេលដែលនិយតករសហព័ន្ធ បាននិយាយថា លោកមានភាពយឺតយ៉ាវក្នុងការបំពេញនូវទម្រង់សំខាន់ៗ ដើម្បីបញ្ចប់ការទិញនេះ នេះបើតាមការបញ្ជាក់របស់សារព័ត៌មាន Wall Street Journal។
នៅក្នុងរបាយការណ៍របស់ Wall Street Journal នេះ គណៈកម្មការមូលប័ត្រកំពុងតែធ្វើការស៊ើបអង្កេតទៅលើការបរាជ័យរបស់លោក Elon Musk ដើម្បីទិញអោយទាន់ពេលវេលាសម្រាប់ភាគហ៊ុន ដ៏ធំរបស់គាត់របស់ក្រុមហ៊ុន Twitter កាលពីខែមីនានេះ។ មហារូបសេដ្ឋីនេះ បានចំនាយពេលវេលាយ៉ាងយូរក្នុងការដាក់ពាក្យស្នើសុំជាសាធារណៈ ខណៈពេលដែលគាត់ស្ថិតនៅក្នុងដំណើរការនៃការទិញភាគហ៊ុនចំនួន 9.2% និងក្លាយជាម្ចាស់ភាគហ៊ុនធំបំផុតរបស់ក្រុមហ៊ុននេះ។
ភាពយឺតយ៉ាវនៅក្នុងការទិញភាគហ៊ុនបន្ថែមដែលមិនបានជូនដំណឹងទៅដល់ម្ចាស់ភាគហ៊ុនផ្សេងទៀតនោះ ក៏បណ្តាលអោយមានបញ្ហាប៉ះពាល់ដល់ទឹកប្រាក់យ៉ាងច្រើន។ នៅពេលនេះ លោក Musk ក៏ត្រូវបានប្តឹងដោយម្ចាស់ភាគហ៊ុនជាច្រើនរបស់ក្រុមហ៊ុនTwitter ហើយវាក៏មានការស៊ើបអង្កេតដាច់ដោយឡែកមួយទៀតពី FTC ទៅលើបញ្ហានេះផងដែរ។ សម្រាប់តម្លៃស្តុកពេលនេះ គឺមានការធ្លាក់ចុះមកនៅត្រឹម $45.08 ដែលមានការធ្លាក់ចុះ 10% បើធៀបទៅនឹងតម្លៃនៅថ្ងៃទី 17 ខែមេសាមានតម្លៃ $54.20។ តម្លៃទីផ្សារពេលនេះ គឺមានភាពខុសគ្នាដល់ទៅ 9 ពាន់លានដុល្លារអាមេរិក៕