OnePlus Nord 2 5G បង្ហាញខ្លួនហើយ គឺបំពាក់នូវបន្ទះឈីប Dimensity 1200 មានកាមេរ៉ាទំហំ 50MP-OIS និងបច្ចេកវិទ្យាសាកថ្មកំលាំង 65W WarpCharge

នេះគឺជាទូរស័ព្ទ 5G ជំនាន់ថ្មីរបស់ក្រុមហ៊ុន OnePlus ម៉ូដែល Nord 2 ដែលទើបបង្ហាញវត្តមានមកថ្មីៗនេះ។ ទូរស័ព្ទឆ្លាត 5G ជំនាន់ថ្មីនេះត្រូវបានក្រុមហ៊ុនបំពាក់មកជាមួយនូវបន្ទះឈីបខ្លាំងរបស់ MediaTek ស៊េរី  Dimensity 1200 AI 6nm SoC ជាមួយរ៉េមទំហំចាប់ពី 6GB ដល់ 8GB និងមានអង្គផ្ទុកទិន្នន័យក្នុងម៉ាស៊ីនស្រាប់ទំហំចាប់ពី 128GB ដល់ 256GB។

OnePlus Nord 2 5G មានបន្ទះអេក្រង់ជាប្រភេទ Fluid AMOLED Display កម្រិត 90Hz ទំហំ 6.43 អ៊ីញ ដែលមានលែនទំលុះអេក្រង់មួយគ្រាប់ស្ថិតនៅជិតគែមអេក្រង់ខាងឆ្វេងក្បែរកែងខាងលើ និងជាលែនកាមេរ៉ាសែលហ្វីទំហំ 32MP។ បន្ទះអេក្រង់របស់ Nord 2 5G ទ្រទ្រង់កម្រិតបង្ហាញ Full-HD+ 1080x2400px លើខ្នាត 20:9 ratio និងគាំទ្រមុខងារ HDR10+។ ស្មាតហ្វូនជំនាន់ថ្មីនេះស្រោបការពារផ្ទៃមុខក្រោយដោយកញ្ចក់ Corning Gorilla Glass 5 និងមានស៊ុមជុំវិញជាជ័រ Plastic។

សម្រាប់ប្រព័ន្ធកាមេរ៉ាផ្នែកខាងក្រោយដែលដំឡើងនៅលើ OnePlus Nord 2 5G មានចំនួន 3 គ្រាប់ ប្រើនូវសែនស័រគោលទំហំ 50MP ដែលជាសែនស័រ SONY IMX766 មានមុខងារទប់លំនឹង OIS។

សែនស័រនេះក៏ទ្រទ្រង់នូវមុខងារ Digital OverLap HDR ផងដែរ ក្នុងការជួយសម្រួលសម្រាប់ការកែតម្រូវកម្រិត exposure រូបភាពពីរប្លង់ច្របាច់បញ្ចូលគ្នាមកក្នុងប្លង់រូបភាពតែមួយ។ ចំនែកសែនស័រជំនួយពីរគ្រាប់ទៀត គឺមានសែនស័រ Ultra-wide ទំហំ 8MP និងសែនស័រ Monochrome ទំហំ 2MP អមដោយអំពូលភ្លើង LED Flash មួយគ្រាប់។

ទូរស័ព្ទឆ្លាត 5G ស៊េរីថ្មីនេះមានថ្មទំហំ 4500mAh ទ្រទ្រង់បច្ចេកវិទ្យាសាកភ្លើងល្បឿនលឿនកំលាំង 65W WarpCharge  តាមរយះរន្ធចម្លង USB-C ដែលមានសមត្ថភាពសាកបំពេញថាមពលថ្មពីកម្រិត 0% ដល់ពេល 100% ប្រើពេលប្រមាណជា 30 នាទីប៉ុណ្ណោះ។

OnePlus Nord 2 5G ប្រតិបត្តិការលើ Oxygen OS 11.3 ដែលគាំទ្រដោយ Android 11 ចេញពីប្រអប់ស្រាប់។ ហើយអ្វីដែលពិសេសគឺ OnePlus សន្យាថា ដាក់អោយទូរស័ព្ទឆ្លាតជំនាន់ថ្មីនេះអាចធ្វើបច្ចុប្បន្នភាពប្រព័ន្ធប្រតិបត្តិការ Android និងប្រព័ន្ធសុវត្ថិភាពដល់ទៅ 3 ឆ្នាំឯណោះ។

OnePlus នឹងនាំយកទូរស័ព្ទ Nord 2 5G របស់ខ្លួនទៅប្រកាសចេញលក់នៅទីផ្សារប៉ែកអឺរ៉ុប និងឥណ្ឌានៅថ្ងៃទី 28 ចុងខែកក្តដានេះ ជាមួយជម្រើស ពណ៌ខៀវ Blue Haze, ប្រផេះ Gray Sierra និងបៃតងGreen Wood ដែលពាសផ្ទៃក្រោយដោយស្បែក Vegan leather។

ចំពោះតម្លៃរបស់ Nord 2 5G វិញគឺខ្ទង់ប្រមាណ €399 ឬប្រហែល $469 សម្រាប់ម៉ូដែល 6GB/128GB៕