Samsung បានប្រកាសផ្លូវការណ៍រួចហើយសម្រាប់ថ្ងៃប្រកាសចេញផលិតផលថ្មីៗរបស់ខ្លួនគឺនៅថ្ងៃទី 11 ខែសីហា ឆ្នាំ 2021 នៅវេលាម៉ោង 10 AM ET តាមរយះការ Livestream នៅលើគេហទំព័រផ្លូវការណ៍របស់ក្រុមហ៊ុនផ្ទាល់។ នៅក្នុងព្រឹត្តិការណ៍ថ្ងៃនោះត្រូវបានគេដឹងថា Samsung នឹងប្រកាសចេញទូរស័ព្ទអេក្រង់បត់ជំនាន់ថ្មីគឺ Galaxy Z Fold 3 និង X Flip 3 រួមនឹងនាឡិកាដៃឆ្លាតវៃជំនាន់ថ្មី Galaxy Watch 4 Series និងកាសស្តាប់ឥតខ្សែ Galaxy Buds 2 ជាដើម។
ដែលផលិតផលទាំងអស់របស់ក្រុមហ៊ុនបច្ចេកវិទ្យាខ្នាតយក្សរបស់កូរ៉េខាងត្បូងមួយនេះគឺមានការបែកធ្លាយព័ត៌មានជាច្រើនដែលនិយាយពីគុណសម្បត្តិដែលនឹងមានមកជាមួយផលិតផលទាំងនោះ ដូចជាក្នុងពេលនេះអីចឹង គឺមានប្រភពទម្លាយព័ត៌មានតាមរយះបណ្តាញធ្វីស្ទ័រល្បីឈ្មោះមួយបានទម្លាយចេញពីចំនុចពិសេសមួយរបស់ទូរស័ព្ទអេក្រង់បត់ Galaxy Z Fold 3។
យោងតាមគណនីបណ្តាញធ្វីស័្ទរឈ្មោះថា @IceUniverse បានបញ្ជាក់នៅលើគណនីខ្លួនថា Samsung Galaxy Z Fold 3 គឺប្រើបន្ទះឈីប Snapdragon 888 ដែលមានការរៀបចំនៅប្រព័ន្ធខាងក្នុងម៉ាស៊ីនកាន់តែពិសេសជាងមុន។ ដែលក្នុងន័យនេះ គឺគេចង់សំដៅទៅលើប្រព័ន្ធបន្សាបកំដៅក្នុងម៉ាស៊ីនរបស់ Galaxy Z Fold 3 តែម្តង។ គណនីដដែលនេះ ក៏បានបញ្ជាក់ថា Galaxy Z Fold 3 គឺនឹងមានប្រព័ន្ធការពារការកើនឡើងកំដៅរបស់ម៉ាស៊ីនអំឡុងពេលលេងហ្គេមបានប្រសើរជាងកំពូលស្មាតហ្វូន Galaxy S21 Ultra បច្ចុប្បន្នទៅទៀត និងជួយធ្វើអោយអាយុកាលរបស់ថ្មកាន់ថាមពលប្រើប្រាស់បានយូរជាងថែមទៀតផង។
បើតាមការបញ្ជាក់នៅលើវិញ្ញាបនបត្ររបស់ស្ថាប័ន TENNA របស់ចិន Samsung Galaxy Z Fold 3 គឺមានថ្មទំហំ 4,400mAh ដែលជាទំហំតូចជាងថ្មរបស់ Galaxy Z Fold 2ប្រមាណ 100mAh។ ទូរស័ព្ទឆ្លាតអេក្រង់បត់ជំនាន់ថ្មីនេះ ត្រូវបានគេរំពឹងថា នឹងមានជម្រើសពីរម៉ូដែលសម្រាប់តម្រូវតាមទីផ្សារក្នុងតំបន់ផ្សេងៗគ្នាគឺម៉ូដែលប្រើឈីប Qualcomm Snapdragon 888 និងម៉ូដែលប្រើឈីប Samsung Exynos Series៕