ថ្មីៗនេះ ក្រុមហ៊ុន LG Electronics បានប្រកាសអំពីការចាកចេញរបស់ខ្លួនពីទីផ្សារស្មាតហ្វូនដោយសារតែលទ្ធផលនៃអាជីវកម្មស្មាតហ្វូនរបស់ខ្លួនហើយ ដោយមិនអាចប្រកួតប្រជែងនៅលើទីផ្សារនេះបានទៀត។ មានការរាយការណ៍ថា នៅក្នុងពេលនៃការសម្រេចចិត្តចាកចេញពីទីផ្សារស្មាតហ្វូននេះ ស្មាតហ្វូនមួយចំនួនរបស់ក្រុមហ៊ុននេះត្រូវដាក់លក់អោយបុគ្គលិកជាច្រើនរបស់ខ្លួននៅក្នុងតម្លៃយ៉ាងពិសេសបំផុត។
នៅពេលនេះ របាយការណ៍ជាច្រើន បានបញ្ជាក់ថា ក្រុមហ៊ុន LG Electronics នឹងចាប់ផ្តើមដាក់លក់ iPhones នៅក្នុងហាង LG ជាង 400 កន្លែងរបស់ខ្លួននៅក្នុងប្រទេសកូរ៉េខាងត្បូងហើយ។ បើទោះបីជាក្រុមហ៊ុន LG បានប្រឈមមុខទៅនឹងបញ្ហាប្រតិកម្មជាច្រើនពីក្រុមហ៊ុនចែកចាយរបស់ខ្លួននោះ ក្រុមហ៊ុននេះ នឹងពិភាក្សាជាមួយនឹងសមាគមន៍ចែកចាយ (Distribution Association) ដើម្បីលក់ស្មាតហ្វូន iPhones។
គួរបញ្ជាក់ផងដែរថា កាលពីប៉ុន្មានសប្តាហ៍មុននេះ ក្រុមហ៊ុន LG បានទទួលរងនូវការប្រតិកម្មជាច្រើនពីអ្នកចែកចាយនៅក្នុងស្រុករបស់ខ្លួន។ យ៉ាងណាមិញ ក្រុមហ៊ុននេះ នៅតែបន្តក្នុងការលក់ស្មាតហ្វូន LG នៅក្នុងហាង LG ទាំងអស់របស់ខ្លួននៅក្នុងប្រទេសកូរ៉េ។ ការសម្រេចចិត្តនេះ គឺបានបង្ហាញថា ក្រុមហ៊ុន LG និង Apple បានឈានដល់កិច្ចព្រមព្រៀងគ្នាហើយក្នុងការលក់ស្មាតហ្វូន iPhones នៅក្នុងហាង LG នៅទូទាំងប្រទេសកូរ៉េខាងត្បូងតែម្តង៕
