ក្រុមហ៊ុន Samsung បានបញ្ចេញកំនែប្រែ One UI3.1.1 ដោយដំឡើងមកជាមួយ Galaxy Z Fold និង Z Flip 3 ចេញពីប្រអប់ស្រាប់តែម្តង។ កំនែប្រែ One UI ជំនាន់ចុងក្រោយនេះគឺបានបង្កើនផលិតភាពប្រើប្រាស់កាន់តែល្អប្រសើរជាងមុនសម្រាប់ទូរស័ព្ទអេក្រង់បត់ Galaxy Z Series ជំនាន់ថ្មីទាំងពីរ។ ទោះជាយ៉ាងណាក្រុមហ៊ុន Samsung ក៏បានបញ្ចេញកំនែប្រែថ្មី One UI3.1.1 សម្រាប់កំពូលស្មាតហ្វូនត្រកូល Galaxy S21 Series ផ្លូវការណ៍រួចហើយដែរកាលពីសប្តាហ៍មុននេះ។
ដោយឡែកនៅពេលនេះ Samsung ក៏បានដាក់អោយធ្វើបច្ចុប្បន្នភាព One UI3.1.1 នៅលើស្រឡាយកំពូលស្មាតហ្វូនមួយចំនួនទៀតរបស់ខ្លួនបន្ថែមទៀតក្នុងនោះរួមមាន Galaxy S10, S20, Note 10 និង Note 20 Series ជាដើម។ ចំពោះ Firmware សម្រាប់ការធ្វើបច្ចុប្បន្នភាព One UI3.1.1 នៅលើ Galaxy S10 Series មានលេខកូដ G97xFXXUCFUH3 ជាមួយទំហំ 733MB។ ចំនែក Firmware One UI3.1.1 សម្រាប់ Galaxy S20 Series មានលេខកូដ G98xBXXU9DUH2 មានទំហំ 623MB, សម្រាប់ Galaxy Note 10 Series មានលេខកូដ N97xFXXU7FUH3 មានទំហំ 927MB និងសម្រាប់ Galaxy Note 20 Series មានលេខកូដ N98xBXXU3DUH2 ជាមួយទំហំ 738MB។
ក្រោយការធ្វើបច្ចុប្បន្នភាព One UI3.1.1 កំពូលស្មាតហ្វូន Galaxy ទាំងអស់ខាងលើ គឺទទួលបានមុខងារថ្មីហៅថា Bedtime Mode, ជួយបង្កើនល្បឿនបើកដំណើរការកម្មវិធីលឿនរហ័សជាងមុន, ដំណើរការកាមេរ៉ាលឿនជាងមុន, មុខងារ Pop-Up Menu ដើរលឿនជាងមុន, ការស្កែនក្រយ៉ៅម្រាមដៃបានលឿនជាងមុន, កាត់បន្ថយការឡើងកំដៅម៉ាស៊ីនបានប្រសើរជាងមុន ការដំណើរការមុខងារកម្មវិធីផ្សេងទៀតដូចជា Clock, Samsung Internet, Contacts និងWeather ជាដើម ប្រតិបត្តិការលឿនជាងមុនផងដែរ។ បន្ថែមពីនេះក្រោយពីការធ្វើបច្ចុប្បន្នភាព One UI3.1.1 ទូរស័ព្ទក៏អាចនឹងធ្វើការផ្លាស់ប្តូររបៀបនៃការប្រើប្រាស់ថ្មីមួយចំនួនផងដែរ៕