ក្រោយពីបានបែកធ្លាយព័ត៌មានចចាមអារាមជាច្រើនមួយរយះពេលកន្លងមកនេះ ពេលនេះក្រុមហ៊ុន Infinix បានប្រកាសចេញស្មាតហ្វូនជំនាន់ថ្មីម៉ូដែល Zero X របស់ខ្លួនផ្លូវការណ៍ហើយ។ ដោយក្នុងគ្រួសារ Zero X មានសមាជិកចំនួន 3 ស៊េរីគឺ Infinix Zero X, X Pro និង X Neo ហើយបងប្អូនស្មាតហ្វូនទាំងបីស៊េរីនេះគឺមានបំពាក់មកជាមួយលែន Periscope ដូចៗគ្នា។
Infinix Zero X Series ទាំងបីស៊េរីនេះបំពាក់នូវកញ្ចប់លែនកាមេរ៉ា 3 គ្រាប់ដូចគ្នា ប៉ុន្តែ មានសែនស័រ គោលទំហំផ្សេងពីគ្នាដោយក្នុងនោះម៉ូដែលកំពូល Zero X Pro មានសែនស័រគោលទំហំ 108MP មាន OIS, ម៉ូដែល Zero X មានសែនស័រគោលទំហំ 64MP មាន OIS ដូចគ្នា និងម៉ូដែល Zero X Neo មានសែនស័រគោលទំហំ 48MP គ្មាន OIS ទេ។ សម្រាប់កាមេរ៉ាពីរគ្រាប់ផ្សេងទៀតគឺមានទំហំ 8MP ដូចគ្នា គឺជាសែនស័រ Periscope និង Ultra-wide 120 ដឺក្រេ។
ចំពោះសែនស័រកាមេរ៉ាសែលហ្វីវិញគឺមានមួយគ្រាប់ទំហំ 16MP ស្ថិតក្នុងលែនទំលុះកណ្តាលថ្ងាសអេក្រង់។ សម្រាប់សែនស័រ Periscope ទំហំ 8MP របស់បងប្អូនស្មាតហ្វូន Infinix Zero X គឺមានសមត្ថភាពអាចពង្រីកប្លង់ថតបាន 5X Optical និងដល់ 60X Hybrid zoom។ បន្ថែមពីនេះប្រព័ន្ធកាមេរ៉ារបស់ស្មាតហ្វូនជំនាន់ថ្មីនេះក៏មានមុខងារ Super Moon Mode ដែលប្រើប្រាស់បច្ចេកវិទ្យា Galileo Engine ដើម្បីគ្រប់គ្រងលំនឹងរូបភាពនៅពេលថតរូបព្រះច័ន្ធដើម្បីឲ្យការផ្តិតយករូបភាពព្រះច័ន្ធបានច្បាស់ស្អាតគាប់ចិត្ត។
ស្មាតហ្វូនជំនាន់ថ្មីទាំង 3 ស៊េរីខាងលើនេះដំណើរការនៅលើបន្ទះឈីប MediaTek Helio G95 12nm មានអង្គគណនា 8-Core រត់នៅលើប្រព័ន្ធ Cortex-A76 ល្បឿន 2.05GHz និងប្រើអង្គក្រាហ្វិច Mali-G76 MC4។ Infinix Zero X Series មានរ៉េមទំហំ 8GB ជាមួយមុខងារ Memory Fusion 2.0 ដើម្បីពង្រីកទំហំរ៉េមបន្ថែម និងមានម៉េមូរីក្នុងម៉ាស៊ីនទំហំ 128GB ដល់ 256GB។
ស្មាតហ្វូនជំនាន់ថ្មីនេះប្រតិបត្តិការដោយ XOS7.6 គាំទ្រដោយ Android 11។ Zero X និង X Pro មានថ្មទំហំ 4,500mAh គាំទ្របច្ចេកវិទ្យាសាកភ្លើងល្បឿនលឿនកំលាំង 45W ដូចគ្នា។ រីឯម៉ូដែល Zero X Neo មានថ្មទំហំ 5,000mAh និងគាំទ្របច្ចេកវិទ្យាសាកភ្លើងកំលាំង 18W។
មកដល់អេក្រង់វិញ ម៉ូដែល Zero X និង X Pro បំពាក់មកជាមួយបន្ទះអេក្រង់ប្រភេទ AMOLED ទំហំ 6.67 អ៊ីញ មានល្បឿន refresh rate 120Hz និង touch sampling rate 240Hz រីឯម៉ូដែល Zero X Neo មានអេក្រង់ LCD ទំហំ 6.78 អ៊ីញមានល្បឿន refresh rate 90Hz ជាមួយ touch sampling rate 180Hz។
Infinix នឹងនាំយកទូរស័ព្ទស្មាតហ្វូនជំនាន់ថ្មីក្នុងគ្រួសារ Zero X Series ទៅប្រកាសចេញលក់នៅទីផ្សារ នីហ្សេរីយ៉ា ថៃ ឥណ្ឌូនេស៊ី អេហ្ស៊ិប និងទីផ្សារមួយចំនួនទៀត ប៉ុន្តែ សម្រាប់ទីផ្សារខាងប៉ែកអឺរ៉ុបខាងលិច និងសហរដ្ឋអាមេរិកក្រុមហ៊ុនមិនទាន់មានគម្រោងក្នុងការនាំស្មាតហ្វូនជំនាន់ថ្មីនេះទៅប្រកាសចេញលក់នៅឡើយទេ។
ហើយតម្លៃក៏ Infinix មិនទាន់ប្រកាសប្រាប់ឲ្យដឹងនោះដែរ ប៉ុន្តែ បើតាមការព្យាករណ៍ Infinix Zero X Series អាចនឹងមានតម្លៃខ្ទង់ $300 ឡើង៕