នៅទីបំផុតស្មាតហ្វូនដែលតំណាងពីការចាប់ដៃគូសហការរវាងក្រុមហ៊ុន OPPO និង Kodak បានបង្ហាញវត្តមានផ្លូវការណ៍ហើយ ដោយស្មាតហ្វូនថ្មីនេះគឺត្រូវបាន Customs ពីលើម៉ូដែល Find X3 Pro ដែលចេញកាលពីដើមឆ្នាំ។ សម្រាប់ស្មាតហ្វូន Customs មកថ្មីដែលទើបបង្ហាញចេញមកនេះត្រូវបាន OPPO ដាក់ឈ្មោះឲ្យថា Find X3 Pro Photographer Edition។
សម្រាប់ផ្នែកផ្សេងៗទៀតដូចជាបន្ទះអេក្រង់ កំលាំងម៉ាស៊ីន ប្រព័ន្ធកាមេរ៉ា ទំហំថ្ម បច្ចេកវិទ្យាសាកថ្មីនៅលើស្មាតហ្វូនម៉ូដែលពិសេសថ្មីនេះគឺមិនមានអ្វីខុសគ្នាពី Find X3 Pro ស្តង់ដារនោះទេ ប៉ុន្តែចំនុចដែល Photographer Edition បានកែប្រែនោះ គឺការរចនាលើផ្ទៃខ្នងផ្នែកខាងក្រោយផ្ទាល់តែម្តង។ សម្រាប់ផ្ទៃខ្នងខាងក្រោយរបស់ Find X3 Pro Photographer Edition គឺផ្សំឡើងពីកញ្ចក់ពាក់កណ្តាលផ្នែកខាងលើ និងស្បែកពណ៌ខ្មៅនៅពាក់កណ្តាលខាងក្រោម ដែលទម្រង់នៃការរចនាបែបនេះគឺយកលំនាំចេញពីម៉ាស៊ីតថតស៊េរី Kodak 35 Classic។
ចំនែកប្រអប់វ៉ិចខ្ចប់ទៀតសោធន៍គឺមានរាងពងក្រពើស្រដៀងនឹងប្រអប់កាមេរ៉ា Kodak 35 Classic ផងដែរ។ ដោយនៅក្នុងប្រអប់គឺមានដាក់មកជាមួយរបស់គ្រប់តែម្តងមានដូចជា ដុំឆ្នាំងសាក ខ្សែសាក កាសខ្សែ ម្ជុលចាក់ទ្រនាប់ស៊ីន ខ្សែសម្រាប់ព្យួរ និងស្រោបការពារដែលមានរចនាបថដូចគ្នាជាមួយទូរស័ព្ទជាដើម។ មិនខុសពីម៉ូដែល Find X3 Pro ស្តង់ដារនោះទេ ដោយស្មាតហ្វូនម៉ូដែលពិសេសនេះគឺបំពាក់មកជាមួយសែនស័រកាមេរ៉ាទំហំ 50MP ចំនួនពីរគ្រាប់ (Main + Ultra-wide) ជាមួយសែនស័រជំនួយពីរគ្រាប់ផ្សេងទៀត (Telephoto + Microscope)។ ស្មាតហ្វូនកំពូលនេះបំពាក់អេក្រង់ LTPO-AMOLED 120Hz កម្រិត Quad-HD+ ទំហំ 6.7 អ៊ីញុ, ប្រើបន្ទះឈីប Snapdragon 888, មានថ្មទំហំ 4,500mAh គាំទ្របច្ចេកវិទ្យាសាកភ្លើងល្បឿនលឿនកំលាំង 65W wired charge និង 30W wireless charge។
ចំនុចពិសេសរបស់ Find X3 Pro Photographer Edition គឺបានស្រោបស្បែកមុខកម្មវិធីដោយ ColorOS ដែលមានការកែប្រែថ្មីដោយបានដាក់បញ្ចូល Theme មានពណ៌ទឹកប្រាក់ជាមួយ Wallpaper ពណ៌ខ្មៅ ក៏ដូចជា icon កម្មវិធីឲ្យស៊ីគ្នាទៅនឹងទូរស័ព្ទថែមទៀតផង។ ទោះជាយ៉ាងណា OPPO មិនទាន់ប្រកាសពីតម្លៃ និងកាលបរិច្ឆេទចេញលក់សម្រាប់ Find X3 Pro ម៉ូដែលពិសេស Photographer Edition នេះនៅឡើយទេ៕
