គិតមកទល់នឹងថ្ងៃនេះ អាជីវកម្មផ្នែកស្មាតហ្វូនរបស់ក្រុមហ៊ុន Sony ត្រូវបានគេមើលឃើញថា គឺហាក់ដូចជាមានភាពស្ងប់ស្ងាត់មែនទែន ចាប់តាំងពីក្រុមហ៊ុននេះ បានប្រកាសបង្ហាញនូវស្មាតហ្វូន Xperia 1 III កាលពីចុងខែសីហាកន្លងនេះ ហើយបន្ទាប់មក ក្រុមហ៊ុននេះ ក៏បានចាប់ផ្តើមដាក់លក់ស្មាតហ្វូន Xperia 5 III នៅក្នុងហាងជាច្រើន ប៉ុន្តែហាក់នៅតែមិនសូវមានភាពកាក់កបសោះ។
គួរបញ្ជាក់ថា បើទោះស្ថិតក្នុងស្ថានភាពបែបនេះក៏ដោយ ក៏ក្រុមហ៊ុនបច្ចេកវិទ្យារបស់ជប៉ុនមួយនេះ នៅតែបន្តបង្ហាញវត្តមានរបស់ស្មាតហ្វូន Xperia 10 III Lite នៅក្នុងប្រទេសជប៉ុនដដែល។ ហើយពេលនេះ ក្រុមហ៊ុននេះ ក៏មានសកម្មភាពថ្មីផងដែរ។ ការបង្ហាញនូវស្មាតហ្វូន Xperia ថ្មីនឹងធ្វើឡើងនៅថ្ងៃទី 26 ខែតុលានេះ។ តើក្រុមហ៊ុន Sony នឹងប្រកាសចេញនូវផលិតផលអ្វីដែរ?
ស្មាតហ្វូនថ្មីនេះ ត្រូវបានគេរំពឹងថា គឺជា Mark IV Series។ នៅក្នុងរបាយការណ៍ជាច្រើនកាលពីពេលមុននេះ បានបញ្ជាក់ថា ក្រុមហ៊ុននេះ គឺមានការមមាញឹកមែនទែនជាមួយនឹងឧបករណ៍ថ្មីរបស់ខ្លួនដូច PlayStation, កាសស្តាប់, កាមេរ៉ា Mirrorless និងជាច្រើនថែមទៀត។ ប៉ុន្តែអ្វីដែលចាប់អារម្មណ៍នោះ គឺក្រុមហ៊ុននេះ នៅមិនមានការបញ្ជាក់អំពីស្មាតហ្វូនថ្មីនោះទេ៕