ក្រុមហ៊ុន OPPO បានបង្ហាញចេញទូរស័ព្ទអេក្រង់រមូល ឬ Rollable Phone កាលពីដើមឆ្នាំ 2021 ដែលជាការបង្ហាញពីបច្ចេកវិទ្យាដ៏ទំនើបបែបថ្មីជំនួសឲ្យទូរស័ព្ទដែលមានអេក្រង់បត់ ឬ Foldable Phones ដែលកំពុងមានវត្តមាននៅលើទីផ្សារបច្ចុប្បន្ន។ ទោះជាយ៉ាងណាក៏មានព័ត៌មានលេចលឺល្ហៀងៗថា OPPO ក៏បាននឹងកំពុងសង្ងំធ្វើការអភិវឌ្ឍន៍ផលិតទូរស័ព្ទអេក្រង់បត់ផងដែរ។ ហើយដំណឹងនេះគឺកាន់តែបង្ហាញតម្រុយច្បាស់មែនទែនហើយដោយមានប្រភពថ្មីចុងក្រោយបានបង្ហោះនៅលើអនឡាញដែលបានបង្ហើបពីគុណសម្បត្តិសំខាន់មួយចំនួនដែលនឹងមាននៅលើ OPPO Foldable Phone។ ហើយដំណឹងថ្មីនេះគឺគ្មានចេញពីប្រភពណាក្រៅពីគណនី Weibo ទម្លាយព័ត៌មានបែកធ្លាយដ៏ល្បីល្បាញរបស់ប្រទេសចិនឈ្មោះថា Digital Chat Station នោះទេ។
បើតាមការបង្ហោះនៅលើគណនី Weibo Digital Chat Station បានប្រាប់ឲ្យដឹងថា ទូរស័ព្ទឆ្លាតអេក្រង់បត់ដំបូងរបស់ OPPO នឹងបំពាក់អេក្រង់បត់ទំហំ 7.8 ទៅ 8 អ៊ីញ ជាបន្ទះបង្ហាញ OLED Display 120Hz និងគាំទ្រកម្រិតបង្ហាញចេញ 2K ឬ QHD+។ បន្ថែមពី OPPO Foldable Phone ក៏បំពាក់កំពូលឈីប Qualcomm Snapdragon 888 និងប្រើសែនស័រកាមេរ៉ាគោលទំហំ 50MP ដែលជា SONY IMX766 Sensor និងកាមេរ៉ាសែលហ្វីទំហំ 32MP។ ប្រភពដដែលបានបញ្ជាក់បន្ថែមទៀតថា OPPO Foldable Phone នឹងមានប្រព័ន្ធសែនស័រស្កែនក្រយ៉ៅម្រាមដៃដោះសោរសុវត្ថិភាពជ្រកកោនជាមួយប៊ូតុង Power ស្ថិតនៅលើស៊ុមខាងស្តាំដៃ និងដំឡើងមកជាមួយប្រតិបត្តិការ Color OS12 នៅលើ Android 11 ចេញពីប្រអប់។
Digital Chat Station បានឲ្យដឹងទៀតថា OPPO Foldable Phone នឹងមានការរចនារបៀបបត់ដូចគ្នានឹង Huawei Mate X2 និង Samsung Galaxy Fold Series ដែរ ជាជាងរបៀបបត់បែប Clamshell ដូច Galaxy Z Flip Series។ OPPO Foldable Phone ត្រូវបានគេព្យាករណ៍ថានឹងមានអេក្រង់ទំហំធំជាង Samsung Galaxy Z Fold 3 ដែលមានទំហំ 7.6 អ៊ីញ ប៉ុន្តែមានកម្រិត Aspect ratio ដូចគ្នា។ ហើយសម្រាប់សែនស័រ SONY IMX766 ទំហំ 50MP គឺដូចគ្នានឹងកំពូលស្មាតហ្វូន OPPO Find X3 ដែលជាសែនស័រគុណភាពខ្ពស់សម្រាប់ស្មាតហ្វូន និងមានសមត្ថភាពផលិតសាច់វីដេអូបានកម្រិត 8K ដូច Samsung Galaxy Fold Series ដែរ។
ទោះជាយ៉ាងណាមិនមានប្រភពជាក់លាក់ណាមួយបានបង្ហើបពីថ្ងៃដែល OPPO ដាក់ចេញទូរស័ព្ទឆ្លាតអេក្រង់ដំបូងរបស់ខ្លួននោះទេ ប៉ុន្តែ បើតាមប្រភពព័ត៌មានចចាមអារាមចុងក្រោយបានបង្ហើបថា OPPO Foldable Phone នឹងមកដល់ផ្លូវការណ៍នៅអំឡុងឆមាសដំបូងក្នុងឆ្នាំ 2022 ខាងមុខ៕
