កាលពីប៉ុន្មានសប្តាហ៍មុននេះ ក្រុមហ៊ុន Apple បានប្រកាសជាផ្លូវការណ៍នូវវត្តមានរបស់ស្មាតហ្វូន iPhone 13 Series។ នៅមុនព្រឹត្តិការណ៍មួយនេះ មានរបាយការណ៍ជាច្រើន ក៏បានលើកឡើងអំពីការបង្ហាញខ្លួនរបស់ស្មាតហ្វូន iPhone 14 Series ផងដែរ។ ថ្មីៗនេះ ក៏វត្តមានរូបរាងគំរូរបស់ស្មាតហ្វូន iPhone 14 Pro series ដែលមានការបន្តចែកចាយនៅលើអនឡាញផងដែរ។ រូបរាងថ្មីនេះ គឺមានការបង្ហាញថា ស្មាតហ្វូន iPhone ថ្មីនេះពិតជាមានរូបរាងប្លែកមែនទែន។
ស្មាតហ្វូន iPhone 14 Pro series នេះ នឹងបោះបង់ចោលនូវការប្រើប្រាស់ notch។ នៅទីបំផុត ស្មាតហ្វូននេះអាចនឹងប្រើប្រាស់នូវកាមេរ៉ា punch-hole ដូចទៅនឹងស្មាតហ្វូន Android ជាច្រើន ដែលបានប្រើប្រាស់អស់រយៈពេលជាច្រើនឆ្នាំមកហើយ។ ប្រសិនបើនេះ គឺជាការពិតមែននោះ ស្មាតហ្វូន iPhone 14 Pro series នឹងមានអេក្រង់ punch-hole រូបរាងដូចជាគ្រាប់ថ្នាំនៅកណ្តាលអេក្រង់តែម្តង។
គួរបញ្ជាក់ថា អស់រយៈពេលជាច្រើនឆ្នាំមកហើយ ក្រុមហ៊ុន Apple គឺមិនធ្លាប់ប្រើប្រាស់នូវរន្ធ punch-hole នៅកណ្តាលអេក្រង់របស់ស្មាតហ្វូន ដូចទៅនឹងស្មាតហ្វូន Android នោះទេ។ បន្ថែមពីនេះទៀតនោះ ការឌីស្សាញទៅលើអេក្រង់ថ្មីនេះអាចនឹងបង្កើនទៅលើកម្រិត screen-to-body ratio ផងដែរ។ ស្មាតហ្វូននេះនឹងមានការប្រើប្រាស់នូវ Face ID ដែលជាដំណោះស្រាយនៃប្រព័ន្ធសុវត្ថិភាពស្កែនមុខផងដែរ។
ស្មាតហ្វូន iPhone 14 និង iPhone 14 Pro នឹងមានអេក្រង់ 6.06-inch ខណៈពេលដែលស្មាតហ្វូន iPhone 14 Max និង iPhone 14 Pro Max នឹងមានអេក្រង់ទំហំ 6.68 inches ។ ស្មាតហ្វូន iPhone 14 និង iPhone 14 Max នឹងមានអេក្រង់ LTPS ខណៈពេលដែលស្មាតហ្វូន iPhone 14 Pro និង iPhone 14 Pro Max គឺមានអេក្រង់ LTPO ៕