នៅក្នុងព្រឹត្តិការណ៍ប្រកាសចេញ MacBook Pro ជំនាន់ថ្មីកាលពីយប់មិញនេះ Apple ក៏បានប្រកាសចេញកាសស្តាប់ត្រចៀកជំនាន់ថ្មីគឺ Apple AirPods 3 ផងដែរ ដើម្បីបញ្ចប់រាល់ព័ត៌មានទាំងឡាយដែលបានចុះផ្សាយពីកាសស្តាប់ឥតខ្សែជំនាន់ថ្មីនេះ។
កាសស្តាប់ឥតខ្សែជំនាន់ថ្មីនេះត្រូវបាន Apple បង្កើននូវថាមពលថ្មកាន់ប្រើប្រាស់បានយូរជាងមុន ភ្ជាប់ជាមួយសែនស័រ in-ear detection និង Adaptive EQ ក្នុងការកម្រិតសំឡេងបានច្រើនប្រភេទតម្រូវតាមត្រចៀក និងចំណូលចិត្តរបស់អ្នកប្រើ។ បន្ថែមពីនេះ AirPods 3 ក៏គាំទ្រនូវបច្ចេកវិទ្យាសំឡេង Spatial audio និង Dolby Atmos ដែលផ្តល់នូវកម្រិតសំឡេងលឺខ្លាំងច្បាស់ពិរោះរងំរណ្តំត្រចៀកពិសេសបំផុតសម្រាប់អ្នកចូលចិត្តស្តាប់តន្រ្តី។
ជាមួយនឹង in-ear detection sensor គឺវានឹងបញ្ឈប់ និងដំណើរការការចាក់តន្រ្តីដោយស្វ័យប្រវត្តិនៅពេលដែលយើងដក និងដាក់កាសចូលក្នុងត្រចៀកវិញ។ ជាមួយគ្នានេះ AirPods 3 នៅមានមុខងារ Beamforming mic ដើម្បីជួយក្នុងកាត់បន្ថយសំឡេងរំខាននៅអំឡុងពេលសន្ទនាទូរស័ព្ទដោយវានឹងផ្តោតតែទៅលើសំឡេងនិយាយរបស់អ្នកប៉ុណ្ណោះ ព្រមទាំងគាំទ្រនូវមុខងារ Hand-free Hey Siri ថែមផងដែរ។ មុខងារ Siri នៅលើកាស AirPods 3 គឺមានលទ្ធភាពអាចអានសារដំណឹងផ្សេងៗប្រាប់ទៅអ្នកប្រើដូចជាអានសារ ការក្រើនរំលឹកផ្សេង ប្រតិទិន និងការខលទូរស័ព្ទជាដើម។
និយាយដល់សមត្ថភាពថ្មវិញ Apple AirPods 3 គឺអាចប្រើបានដល់ 30 ម៉ោងដោយការសាកជាមួយប្រអប់របស់វាផ្ទាល់ដោយសារពេញម្តង។ ហើយអ្វីដែលកាន់តែពិសេសគឺ AirPods 3 បានគាំទ្របច្ចេកវិទ្យាសាកភ្លើងល្បឿនលឿនដែលសាកតែ 5 នាទីអាចកាន់ក្នុងការស្តាប់តន្ត្រីបានដល់ 1 ម៉ោង។ ជាមួយគ្នានេះ AirPods ជំនាន់ថ្មីនេះនៅគាំទ្រមុខងារ MagSafe ដែលអាចសាកថ្មចូលបានជាមួយបន្ទះសាក MagSafe Charger របស់ iPhone ថែមទៀតផង។ ទៅលើផ្នែកប្រព័ន្ធសុវត្ថិភាពវិញ Apple AirPods 3 ប្រើនូវមុខងារការពារទឹកកម្រិត IP4X ដែលមានភ្ជាប់ទាំងនៅលើប្រអប់ និងនៅលើគ្រាប់កាសផ្ទាល់តែម្តង។
ចូលមកតម្លៃវិញ Apple AirPods 3 ត្រូវបានក្រុមហ៊ុនប្រកាសដាក់លក់ក្នុងតម្លៃខ្ទង់ $179 និងអាចធ្វើការបញ្ជាទិញមុនបានចាប់ពីថ្ងៃនេះទៅ។ ជាចុងក្រោយកាសស្តាប់ឥតប្រើខ្សែជំនាន់ថ្មីនេះ នឹងមានចេញលក់ផ្លូវការណ៍នៅលើទីផ្សារចំនួនជាង 27 ប្រទេសនៅទូទាំងពិភពលោកចាប់ពីថ្ងៃទី 26 ខែតុលា សប្តាហ៍ក្រោយនេះទៅ៕