បើនិយាយអំពីបន្ទះឈីប Exynos ប្រហែលជាមានអ្នកប្រើប្រាស់មួយចំនួន មិនមានការពេញចិត្តនោះទេ ហើយអ្នកទាំងនោះក៏បានជម្រុញអោយក្រុមហ៊ុន Samsung ប្រើប្រាស់នូវបន្ទះឈីប Qualcomm ថែមទៀតផង។ ប៉ុន្តែទោះជាមានការលើកឡោះងបែបនេះក្តី ក៏ក្រុមហ៊ុន Samsung មិនបានបោះបង់ទៅលើបន្ទះឈីបរបស់ខ្លួននោះទេ ផ្ទុយទៅវិញ ក្រុមហ៊ុននឹងបង្កើនទៅលើចំនួនស្មាតហ្វូនដែលប្រើប្រាស់នូវបន្ទះឈីបនេះទៀតផង។
សូមជំរាបថា កាលពីខែតុលាកន្លងទៅនេះ មានការបញ្ជាក់ថា ក្រុមហ៊ុន Samsung នឹងបង្កើនការផលិតទៅលើបន្ទះឈីប Exynos សម្រាប់ស្មាតហ្វូនប្រហែលជា 50-60% នៃម៉ូឌែលដែលខ្លួនមាន។ ដូចនេះ ចំនួនស្មាតហ្វូនរបស់ក្រុមហ៊ុន Samsung ដែលប្រើប្រាស់នូវបន្ទះឈីប Exynos នឹងកើនឡើងទ្វេដង ឬ 3 ដងនៅឆ្នាំក្រោយនេះ។ ក្រុមហ៊ុន Samsung ក៏ចង់កាត់បន្ថយទៅលើការពឹងផ្អែករបស់ខ្លួនទៅលើក្រុមហ៊ុនផលិតបន្ទះឈីបភាគីទី 3 ផងដែរនៅឆ្នាំក្រោយនេះ។
នៅក្នុងឆ្នាំ 2022 ខាងមុខនេះ ក្រុមហ៊ុន Samsung នឹងបញ្ចេញនូវស្មាតហ្វូន និងថេប្លេតដល់ទៅ 64 ម៉ូដែល ហើយប្រហែលជា 20 ម៉ូដែលនឹងប្រើប្រាស់នូវបន្ទះឈីប Exynos នេះ។ គួរបញ្ជាក់ផងដែរថា ស្ថាប័ន IDC ទើបតែបង្ហាញនូវទីផ្សារស្មាតហ្វូនសកលនៅក្នុងត្រីមាសទី 3 នៅក្នុងឆ្នាំនេះ។ ការនាំចេញស្មាតហ្វូនគឺមានការធ្លាក់ចុះ៕
