យោងតាមរបាយការណ៍ថ្មីមួយ ដែលបានចេញផ្សាយដោយប្រភពឧស្សាហ៍កម្មបច្ចេកវិទ្យានៅប្រទេសចិន គឺបានបញ្ជាក់ថា ក្រុមហ៊ុន Huawei គឺបានចាប់ផ្តើមសង្វាក់ផលិតកម្មទ្រង់ទ្រាយធំទៅលើស្មាតហ្វូន ដែលអាចបត់បានជំនាន់ក្រោយរបស់ខ្លួនហើយ គឺចាប់ពីខែវិច្ឆិកានេះទៅ។ សម្រាប់ស្មាតហ្វូនដែលក្រុមហ៊ុនផលិតស្មាតហ្វូនដ៏ធំរបស់ចិនមួយនេះ កំពុងតែដំណើរការនោះ គឺជាម៉ូដែលមួយដែលមកប្រកួតប្រជែងជាមួយ Galaxy Z Flip 3 ប៉ុន្តែមានតម្លៃទាបជាងផលិតផល Samsung មួយនេះ។
បើតាមរបាយការណ៍មួយដែលចេញដោយ Economic Times (តាមរយៈ IT Home) ដែលបាននិយាយនៅកិច្ចប្រជុំវិនិយោគថ្មីមួយដែលត្រូវបានគេធ្វើឡើងកាលពីថ្ងៃទី 25 ខែវិច្ឆិកាកន្លងទៅនេះ គឺបានបញ្ជាក់ថា ក្រុមហ៊ុន Zhaoli Technology គឺបានចាប់ផ្តើមការផលិតទ្រង់ទ្រាយធំទៅលើគន្លឺះស្មាតហ្វូនដែលអាចបត់បានសម្រាប់អតិថិជនរបស់ខ្លួនហើយ។ គន្លឺះថ្មីនេះ ត្រូវបានគេដឹងថា គឺមានតម្លៃថោកជាងមុន ប៉ុន្តែក្រុមហ៊ុន Zhaoli Technology មិនបានបញ្ជាក់ថា ការផលិតទៅលើគន្លឺះថ្មីនេះ គឺសម្រាប់ផ្គត់ផ្គង់អោយខាងណាឡើយ ខណៈដែលអ្នកសង្កេតការណ៍ក្នុងឧស្សាហកម្មនេះ គឺបានដឹងច្បាស់ហើយថា គឺសម្រាប់ក្រុមហ៊ុន Huawei ។
សូមជំរាបថា សម្រាប់ការផលិតស្មាតហ្វូនដែលអាចបត់បាននេះ បានក្លាយជាប្រធានបទដ៏លំបាកមួយ សម្រាប់ក្រុមហ៊ុនផលិតស្មាតហ្វូនធំៗជាច្រើន ដោយសារតែនិន្នាការថ្មីនេះ គឺមានលះបង់ធនធានដ៏ធំសម្រាប់ការអភិវឌ្ឍន៍របស់ពួកគេ នៅក្នុងការរចនាស្មាតហ្វូនប្រភេទ ពីព្រោះថា នេះគឺជារបត់ថ្មីមួយដែលទីផ្សារស្មាតហ្វូនកំពុងតែជួបប្រទះ។ ប៉ុន្តែដោយសារតែភាពជោគជ័យរបស់ Samsung Galaxy Z Flip3 នាពេលកន្លងមក បានធ្វើអោយមានការលើកទឹកចិត្តសម្រាប់ម៉ាកផ្សេងទៀតព្រោះថា ស្មាតហ្វូនរបស់ក្រុមហ៊ុនកូរ៉េខាងត្បូងមួយនេះ គឺជាភស្តុតាងមួយ ដែលបញ្ជាក់ថា ស្មាតហ្វូនបត់បានថ្មីនេះ គឺមិនត្រឹមតែជាឧបករណ៍អាចបត់ធម្មតាសម្រាប់ពួកគេនោះទេ គឺវាថែមទាំងផ្តល់នូវបទពិសោធន៍ថ្មីនៃការប្រើប្រាស់បច្ចេកវិទ្យានាពេលបច្ចុប្បន្ន និងអនាគតផងដែរ។
រហូតមកដល់ពេលនេះ តម្លៃសម្រាប់ស្មាតហ្វូនដែលអាចបត់បាននេះ គឺថ្លៃជាងពីរដងបើធៀបនឹងស្មាតហ្វូនធម្មតា។ ប៉ុន្តែជាមួយការប្រកាសចេញ Galaxy Z Flip3 ត្រឹមតែរយៈពេលត្រឹមតែ 40 ថ្ងៃប៉ុណ្ណោះ ស្មាតហ្វូននេះ គឺអាចលក់បានជាងមួយលានគ្រឿង ដោយសារតែតម្លៃរបស់ស្មាតហ្វូននេះ គឺធូជាងមុន។ ឆ្នាំនេះ ក្រុមហ៊ុន Samsung បានទទួលជោគជ័យមែនទែន ហើយ ឥឡូវនេះគ្រោងនឹងបង្កើនការនាំចេញទូរស័ព្ទដែលអាចបត់បានពី 7 លានទៅ 13 លានគ្រឿងនៅឆ្នាំ 2022 ដែលក្នុងនោះមាន Galaxy Z Fold នឹងផលិត 4 លានគ្រឿង និង Galaxy Z Flip ផលិតចំនួន 9 លានម៉ូដែល។ បច្ចុប្បន្ននេះ បើមើលទៅលើ Huawei ដែលជាគូប្រជែងដ៏សំខាន់របស់ Samsung នៅលើទីផ្សារស្មាតហ្វូនដែលអាចបត់បាននេះ គឺកំពុងដើរយឺតមែនទែន នេះគឺដោយសារការរឹតបន្តឹងពីសហរដ្ឋអាមេរិក។
