Galaxy S23 Series ដែលជាស្មាតហ្វូនជំនាន់ថ្មីស្ថិតនៅក្នុងត្រកូលស្មាតហ្វូនថ្នាក់ប្រណិតរបស់ក្រុមហ៊ុន Samsung ត្រូវគេដឹងថា នឹងបង្ហាញវត្តមាននៅលើទីផ្សារនាឆ្នាំក្រោយនេះហើយ។ នៅពេលនេះ ស្មាតហ្វូននេះ ក៏ត្រូវបានគេប្រទៈឃើញថា បានឆ្លងកាត់ការចុះបញ្ជីនៅលើ 3C របស់ប្រទេសចិនរួចហើយផងដែរ។ នៅលើបញ្ជីនេះ គឺបានបង្ហាញថា ស្មាតហ្វូនថ្មីដែលមានលេខម៉ូដែល SM-S9180 គឺជាស្មាតហ្វូនស៊េរីថ្មីតរបស់ Samsung ម៉ូដែល Galaxy S23 Ultra ហើយនៅក្នុងបញ្ជីនោះក៏មានការបញ្ជាក់ទៀតថា ស្មាតហ្វូនថ្មីនេះ នឹងប្រើប្រាស់នូវឆ្នាំងសាកដែលមានកម្លាំងត្រឹមតែ 25W charging (11V @ 2.25A) ប៉ុណ្ណោះ។
ប្រភពខាងលើនេះ បានបញ្ជាក់ថា កម្លាំងសាកនេះ គឺមានកម្លាំងខ្សោយជាងម៉ូដែលមុន Galaxy S22 Ultra ដែលមានការប្រើប្រាស់ដល់កម្លាំង 45W charger។ សូមជំរាបថា សម្រាប់ការប្រើប្រាស់ឆ្នាំងសាកនៅលើ S22 Ultra កម្លាំង 45W charging គឺមិនបានធ្វើអោយល្បឿនសាកខុសគ្នាខ្លាំងជាងឆ្នាំ 25W charging នៅលើស្មាតហ្វូន Galaxy S21 Ultra នោះទេ។
បើតាមការធ្វើតេស្តនោះ គឺបានបង្ហាញថា S22 Ultra ដែលប្រើប្រាស់ជាមួយកម្លាំង 45W charging គឺមានល្បឿនសាកលឿនមែន។ដូច្នេះដោយសារតែក្រុមហ៊ុនចង់អោយថ្មនៅតែអាចប្រើប្រាស់បានយូរនោះ ក៏សម្រេចប្រើប្រាស់ 25W charging វិញ ដែលធ្វើអោយថ្មមានសមត្ថភាពអាចកាន់បានជាងមុន។ ជាមួយគ្នានេះ ក៏មានការបញ្ជាក់ កម្លាំង 25W charging នេះ អាចប្រើប្រាស់សម្រាប់តែ S23 Ultra ដែលនឹងចេញលក់នៅប្រទេសចិនតែប៉ុណ្ណោះ។
យោងតាមពាក្យចចាមអារ៉ាមកន្លងមក បាននិយាយថា ស្មាតហ្វូន S23 Ultra នឹងមានការឌីស្សាញដូចគ្នាជាមួយនិងម៉ូដែលមុន S22 Ultra អញ្ចឹងដែរ ខុសត្រង់តែម៉ូដែលថ្មីនេះ គឺនឹងប្រើប្រាស់កាមេរ៉ាទំហំ 200MP sensor ហើយនិងបំពាក់នូវបន្ទះឈីបជំនាន់ថ្មី Snapdragon 8 Gen 2 តែប៉ុណ្ពោះ។ បន្ថែមពីនេះក៏មានរបាយការណ៍ថា ក្រុមហ៊ុន Samsung នឹងប្រើប្រាស់ឈីប Qualcomm នៅលើស្មាតហ្វូននេះទាំងអស់ទៀតផង។