នៅក្នុងរយៈពេលប៉ុន្មានឆ្នាំនេះ ក្រុមហ៊ុនផលិតស្មាតហ្វូនជាច្រើន បាននិយាយថា ច្បាប់ Moore’s Law លែងដំណើរការទៀតហើយ។ ដូចអ្វីដែលអ្នកបានចាំនោះ គោលការណ៍នេះ គឺផ្តោតទៅលើការផលិតទៅលើបន្ទះឈីប Processor ដែលមានចំនួនទ្វេរដងជារៀងរាល់ 18 ខែ។ ហើយកន្លងទៅនេះ ក្រុមហ៊ុន Samsung ក៏បានក្លាយជានាំមុខនៅក្នុងការផលិតទ្រង់ទ្រាយធំទៅលើដំណើរការនៃបន្ទះឈីប 3nm ថែមទៀត។
ទន្ទឹមនឹងនេះផងដែរនោះ ក្រៅពីការចាប់ផ្តើមការផលិតទៅលើ Node ថ្មីនៅក្នុងខែមិថុនាឆ្នាំនេះ ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ បានប្រកាសអំពីគម្រោងផែនការជាច្រើនរបស់ខ្លួនសម្រាប់ដំណើរការបន្ទះឈីបថ្មីនេះ។ យើងអាចនឹងមើលឃើញនូវដំណើរការ 2nm នៅក្នុងឆ្នាំ 2025 នេះ។ នៅថ្ងៃនេះ ក្រុមហ៊ុននេះក៏និយាយថា ដំណើរការនៃបន្ទះឈីប 1.4nm នឹងចាប់ផ្តើមផលិតទ្រង់ទ្រាយធំនៅក្នុងឆ្នាំ 2027 នេះ។
លោក Cui Shirong ប្រធានផ្នែកអាជីវកម្មរបស់ក្រុមហ៊ុន Samsung បាននិយាយថា ពួកគេនឹងបន្តក្នុងការធ្វើការនៅលើដំណើរការថ្មីនេះ។ បន្ថែមពីនេះទៀតនោះ បន្ទះឈីបថ្មីនេះ គឺផ្អែកនៅលើរចនាសម្ព័ន្ធនៃ Next-Generation Transistor Structure Full-Around Gate (GAA) Technology។ គាត់បាននិយាយថា ក្រុមហ៊ុននេះ មានគម្រោងក្នុងការផលិតនូវបន្ទះឈីប 2nm នៅក្នុងឆ្នាំ 2025 និងដំណើរការ 1.4nm នៅក្នុងឆ្នាំ 2027 ខាងមុខផងដែរ។ បច្ចុប្បន្ននេះ យើងនៅមិនទាន់មានព័ត៌មានលម្អិតជាក់លាក់អំពីដំណើរការនៃ 1.4nm នោះទេ។ ដូចអ្វីដែលក្រុមហ៊ុន Samsung និយាយអំពីដំណើរការ 1.4nm នោះ វាបង្ហាញអំពីមហិច្ឆិតាដ៏ខ្លាំងក្លារបស់ក្រុមហ៊ុននេះ៕
