យោងទៅលើរបាយការណ៍របស់ក្រុមហ៊ុនស្រាវជ្រាវ Barclays បាននិយាយថា ក្រុមហ៊ុន Cirrus Logic ដែលជាដៃគូផ្គត់ផ្គង់គ្រឿងបន្លាស់ឲ្យក្រុមហ៊ុន Apple នឹងធ្វើការផ្គត់ផ្គង់នូវប្រព័ន្ធបញ្ជា Haptic សម្រាប់ដំណើរការប៊ូតុង Solid-state volume និង Power នៅលើ iPhone 15 Pro និង 15 Pro Max ដែលចេញឆ្នាំក្រោយនេះ។
នាយកប្រតិបត្តិ Cirrus Logic លោក John Forsyth បានថ្លែងបញ្ជាក់ថា សមាសធាតុថ្មី HPMS ដែលសំដៅលើបន្ទះសៀគ្វីដែលហៅថា Haptic Mixed-signal Chips នឹងមកដល់ទីផ្សារនៅពាក់កណ្តាលឆ្នាំក្រោយ ហើយសមាសធាតុថ្មីនេះនឹងត្រូវប្រើបំពាក់នៅលើម៉ូដែល iPhone 15 Pro Series ដែលត្រូវប្រកាសចេញនៅខែកញ្ញា ឆ្នាំ 2023។ ដោយឡែកនៅក្នុងកំណត់ត្រាវិនិយោគិនកាលពីសប្តាហ៍មុន អ្នកវិភាគរបស់ក្រុមហ៊ុន Barclays លោក Blayne Curtis និង Tom O'Malley បាននិយាយថាសមាសធាតុថ្មីដែល Cirrus Logic បានលើកឡើងទំនងជាជាផ្នែកមួយនៃ Taptic Engine ដែលត្រូវដាក់បន្ថែមសម្រាប់ប៊ូតុង Haptic Solid-state នៅលើម៉ូដែល iPhone 15 Pro និង 15 Pro Max/Ultra។
កាលពីអំឡុងខែតុលា អ្នកវិភាគផលិតផល Apple ដ៏ល្បីឈ្មោះ គឺលោក Ming-Chi Kuo បាននិយាយថា iPhone 15 Pro Series នឹងបំពាក់នូវប៊ូតុងសំឡេង និងប៊ូតុងបិទបើកពិសេសហៅថា Solid-state button ជំនួសឲ្យ Physical button ដែលមាននៅលើ iPhone 14 Pro Series។ លោក Kuo បាននិយាយថា ឧបករណ៍ទាំងនេះនឹងត្រូវបានបំពាក់បន្ថែមនូវម៉ាស៊ីន Taptic Engine ចំនួនពីរដែលផ្តល់នូវរំញ័រ Feedback haptic ដែលមានចលនាបញ្ជាដូចទៅគ្នានឹងប៊ូតុង Home នៅលើ iPhone SE ម៉ូឌែលថ្មីៗ ឬ Force Touch trackpad នៅលើ MacBooks ជំនាន់ថ្មីផងដែរ។
ចំពោះការប្រើប្រាស់ប្រព័ន្ធប៊ូតុង Haptic Solid-state នៅលើ iPhone 15 Pro និង 15 Pro Max/Ultra នឹងកាន់តែជួយធ្វើឲ្យ iPhone ម៉ូដែលកំពូលទាំងពីរនេះមានភាពធន់នឹងទឹកបានកាន់តែខ្លាំង ហើយកាន់តែមានភាពធន់ក្នុងការប្រើប្រាស់ និងមានអាយុកាលប្រើប្រាស់បានកាន់តែយូរធៀបនឹងប៊ូតុងធម្មតា។ យ៉ាងណាមិញសម្រាប់ម៉ូដេល iPhone 15 និង iPhone 15 Plus ត្រូវបានគេនិយាយថា នឹងនៅតែបន្តប្រើប៊ូតុងមេកានិចដូចនៅលើ iPhone 14 Series ដដែល៕