ថ្មីៗនេះក្រុមហ៊ុនផលិតកញ្ចក់ការងារអេក្រង់ស្មាតហ្វូនដ៏មានប្រជាប្រិយភាពឈ្មោះថា Corning ទើបតែបានបញ្ចេញកញ្ចក់ការពារគុណភាពខ្ពស់ជំនាន់ថ្មីហៅថា Corning Gorilla Glass Victus 2 ដែលជាជំនាន់ទីពីរបន្ទាប់ពី Gorilla Glass Victus ដែលបានប្រកាសចេញកាលពីឆ្នាំ 2020។ ជាមួយកញ្ចក់ការពារជំនាន់ថ្មីចុងក្រោយនេះ គឺមានការបង្កើនភាពធន់ខ្លាំង និងមានសុវត្ថិភាពក្នុងការការពារពីការធ្លាក់បានប្រសើរជាងជំនាន់មុន។
បើតាមការអះអាងពី Corning បានឲ្យដឹងថា Gorilla Glass Victus 2 បានបង្កើនសមត្ថភាពសពីការធ្លាក់បានក្នុងរយះកម្ពស់ដល់ទៅ 1 ម៉ែត្រនៅលើផ្ទៃរឹងខ្លាំងដូចជាធ្លាក់លើផ្ទៃសាបបេតុង និងអាចការពារបានដល់រយះកម្ពស់ដល់ទៅ 2 ម៉ែត្រឯណោះប្រសិនបើធ្លាក់នៅលើផ្ទៃថ្នល់កៅស៊ូ។ ជាងនេះទៅទៀតបើតាមការធ្វើតេស្តនៅក្នុង Corning Lab បានបង្ហាញថា GGV2 មានសមត្ថភាពការពារលើការកកិតឆ្កូតទ្វារដងធៀបនឹងជំនាន់មុន និង 4 ដងធៀបនឹងកញ្ចក់ការពារអេក្រង់ដទៃ។
ទោះជាយ៉ាងក្រុមហ៊ុន Corning មិនបានធ្វើការបញ្ជាក់ពីវត្តមាន Gorilla Glass Victus 2 នៅលើឧបករណ៍ណាមួយ ឬក៏មានវត្តមាននៅលើទីផ្សារក្នុងពេលណានោះទេ ប៉ុន្តែ បើតាមការព្យាការណ៍កញ្ចក់ការពារអេក្រង់ជំនាន់ថ្មីនេះ អាចនឹងមានប្រើនៅលើកំពូលស្មាតហ្វូន នាឡិកាដៃ Tablet Notebook PCs កាមេរ៉ា និងឧបករណ៍ជាច្រើនទៀតដែលនឹងបង្ហាញវត្តមានចាប់ពីដើមឆ្នាំ 2023 ទៅ។ បន្ថែមពីនេះ គេមិនទាន់មានដំណឹងថា ឧបករណ៍ណាមួយរបស់ក្រុមហ៊ុនណានឹងប្រើបច្ចេកវិទ្យាកញ្ចក់ការពារអេក្រង់ជំនាន់ថ្មីនេះនៅឡើយទេ ប៉ុន្តែ មានការប៉ាន់ស្មានថា Samsung Galaxy S23 Series ដែលចេញនៅដើមឆ្នាំ 2023 ខាងមុខនេះ អាចនឹងប្រើកញ្ចក់ Corning Gorilla Glass Victus 2 នេះ។
សូមបញ្ជាក់ថា បើតាមរបាយការណ៍របស់ Corning បានឲ្យដឹងថា មកទល់នឹងពេលបច្ចុប្បន្ននេះកញ្ចក់ការពារ Gorilla Glass Series របស់ខ្លួន ត្រូវបានប្រើបំពាក់នៅលើឧបករណ៍ចំនួន 8 ពាន់លានគ្រឿងជាមួយដៃគូក្រុមហ៊ុនសហការល្បីចំនួន 48 នៅទូទាំងពិភពលោក ក្នុងនោះមានចំនួន 85% ត្រូវបានបញ្ជាទិញដោយក្រុមហ៊ុនផលិតក្នុងប្រទេសចិន ឥណ្ឌា និងសហរដ្ឋអាមេរិក ដែលភាគច្រើន គឺប្រើសម្រាស់ការផលិតស្មាតហ្វូនរបស់ពួកគេ៕