ក្រុមហ៊ុនបច្ចេកវិទ្យាខ្នាតយក្សរបស់កូរ៉េខាងត្បូង និងជាក្រុមហ៊ុននាំមុខគេនៅក្នុងឧស្សាហកម្មស្មាតហ្វូនពិភពលោក Samsung Electronics បានសហការជាមួយក្រុមហ៊ុន Zigbang ដើម្បីប្រកាសចេញបច្ចេកវិទ្យាសោរទ្វាសុវត្ថិភាពឆ្លាតវៃ ឬ Smart Door Lock ដែលដំណើរការជាមួយឈីប UWB ឬ Ultra-Wide Band Chip។ Zigbang SHP-R80 UWB Digital Key Door Lock គឺជាប្រព័ន្ធសោរទ្វាសុវត្ថិភាពឆ្លាតវៃដំបូងគេក្នុងលោកដែលដំណើរជាមួយប្រព័ន្ធ UWB ដែលអនុញ្ញាតិឲ្យធ្វើការបើកទ្វាដោយមិនទាមទារការប៉ះបញ្ជាភ្ជាប់ជាមួយស្មាតហ្វូន។ សោរទ្វាសុវត្ថិភាពឆ្លាតវៃ ឬ Smart Door Lock ស៊េរីថ្មីនេះ គឺជាសមត្ថិផលកកើតឡើងដោយការសហការគ្នារវាងក្រុមហ៊ុន Samsung និង Zigbang។
Smart Door Lock គឺជាបច្ចេកវិទ្យាកូនសោរ Digital Home Key ដែលមាននៅលើកម្មវិធី Samsung Wallet នៅលើស្មាតហ្វូន Samsung របស់លោកអ្នក ដោយអនុញ្ញាតិឲ្យយើងធ្វើការបើកទ្វាផ្ទះ ការិយាល័យ ក្រុមហ៊ុន សហគ្រាស ដោយមិនចាំបាច់ប៉ះលើអេក្រង់ទូរស័ព្ទម្តងទៀត ឬក៏បើកកម្មវិធីជាថ្មីម្តងទៀតឡើយ។ ដោយបច្ចេកវិទ្យា Ultra-Wide Band បានប្រើនូវរលកសញ្ញា Radio waves ដូចជាប្រព័ន្ធ Wi-Fi ឬ Bluetooth ក្នុងការភ្ជាប់ទំនាក់ទំនងក្នុងរយះចំងាយខ្លីមួយដោយវាមានភាពសុក្រិតត្រឹមត្រូវបំផុតនៅក្នុងការកំនត់ទិសដៅនៃសញ្ញាដែលត្រូវគ្នាក្នុងការតភ្ជាប់។
ជាមួយបច្ចេកវិទ្យា UWB គឺត្រូវបានក្រុមហ៊ុនអះអាងថាមានប្រព័ន្ធសុវត្ថិភាពខ្ពស់ពីការវាយប្រហារតាមមធ្យោបាយផ្សេងៗ (Hacking)។ ហើយមុខងារនៃបច្ចេកវិទ្យា UWB គឺត្រូវបានបើកដំណើរការតាមរយះ Digital Home Key ដែលលោកអ្នកបានដាក់បញ្ចូលនៅក្នុងកម្មវិធី Samsung Wallet នៅលើស្មាតហ្វូនរបស់លោកអ្នកផ្ទាល់តែម្តង។ ជាពិសេសជាងនេះជាមួយ Zigbang App ដែលធ្វើឲ្យ Smart Door Lock ប្រើនូវ UWB អាចធ្វើការកត់សំគាល់សមាជិកក្នុងគ្រួសាររបស់លោកអ្នកតាមរយះការកំនត់អត្តសញ្ញាណគ្រាប់គ្នាក្នុងការបើកទ្វារផ្ទះ។ ក្រុមហ៊ុនបានអះអាងថា ប្រសិនបើលោកអ្នកបានជ្រុះបាត់ស្មាតហ្វូនរបស់លោកអ្នក លោកអ្នកអាចធ្វើការបិតមុខងារ Digital Home Key បានតាមរយះមុខងារ Find My Mobile ហើយប្រសិនបើមិនដំណើរការទេ គឺអាចប្រើ Digital Home Key Card ដើម្បីបើកទ្វាចូលផ្ទះជំនូសបាន។
ចំពោះស្មាតហ្វូនអេក្រង់បត់ Samsung Galaxy Z Fold 4 និង Galaxy S22 Ultra គឺគាំទ្រមុខងារ UWB ហើយពួកវាអាចដំណើរការជាមួយ Smart Door Lock។ ហើយស្មាតហ្វូនទាំងពីរនេះក៏អាចប្រើកម្មវិធី Samsung Pay ដើម្បីបើកសោរ Zigbang Smart Lock ផងដែរ។ Zigbang SHP-R80 UWB Digital Key Door Lock ប្រកាសដាក់ចេញលក់នៅទីផ្សារប្រទេសកូរ៉េខាងត្បូង ប៉ុន្តែមិនទាន់មានការបញ្ជាក់ពីតម្លៃនៅឡើយទេ ហើយសោរទ្វាសុវត្ថិភាពឆ្លាតវៃនេះ ក៏នឹងនាំចេញទៅកាន់ទីផ្សារបណ្តាប្រទេសជាច្រើនទៀតក្នុងពេលឆាប់ៗខាងមុខនេះផងដែរ៕
