បើយោងទៅលើការបង្ហោះនៅលើ Power On ចុងក្រោយបង្អស់របស់លោក Mark Gurman បាននិយាយថាក្រុមហ៊ុន Apple មានភាពយឺតយ៉ាវជុំវិញការអភិវឌ្ឍន៍នូវបច្ចេកវិទ្យាបញ្ញាសិប្បនិម្មិត បើប្រៀបធៀបទៅនឹងក្រុមហ៊ុនដូចជា OpenAI និង Google។ ដោយបច្ចុប្បន្ននេះ បញ្ញាសិប្បនិមិ្មត ហៅថា AI ឬ Artificial Intelligence ត្រូវបានប្រើប្រាស់សម្រាប់ឧបករណ៍ដំណើរការដោយយប្រតិបត្តិការ Android និង Windows ស៊េរីខ្ពស់ជាច្រើនរួចមកហើយ។
បើតាមប្រភពរបាយការណ៍បាននិយាយថា នៅពេលនេះ Apple បាននឹងកំពុងពន្លឿនក្នុងអភិវឌ្ឍន៍បច្ចេកវិទ្យា AI សម្រាប់ប្រើនៅលើឧបករណ៍៍ជំនាន់ក្រោយរបស់ខ្លួន។ ដោយយកាលពីខែមុននេះ Apple បានទិញយកក្រុមហ៊ុន DarwinAI របស់កាណាដា ដើម្បីបន្តការអភិវឌ្ឍរបស់ខ្លួនឲ្យបានកាន់តែឆាប់រហ័ស។ ដោយឡែកបើតាមដំណឹងចុងក្រោយនេះវិញ បាននិយាយថា Apple បានទិញយកក្រុមហ៊ុន Start up ថ្មីមួយបន្ថែមទៀតរបស់បារាំងដែលមានឈ្មោះថា Datakalab។
Apple ត្រូវបានគេរាយការណ៍ថាកំពុងប្រើវិធីផ្សេងគ្នាទាក់ទងទៅនឹងការអភិវឌ្ឍន៍បច្ចេកវិទ្យា AI ជំនាន់ថ្មី។ ខណៈពេលដែលលក្ខណៈពិសេសនៃប្រព័ន្ធបច្ចេកវិទ្យា AI ទូទៅនៅលើឧបករណ៍បច្ចុប្បន្ន ត្រូវបានគាំទ្រដោយម៉ូដែលភាសាធំនៅខាងម៉ាស៊ីនមេរបស់ Apple ដែលដំណើរការដោយប្រព័ន្ធ LLMs នៅលើឧបករណ៍។ ប្រព័ន្ធនេះនឹងជួយឲ្យឧបករណ៍ធានាបាននូវភាពឯកជនរបស់អ្នកប្រើប្រាស់។ Apple ត្រូវបានបង្កើតម៉ូដែលដែលមានសមត្ថភាពសមរម្យ ប៉ុន្តែមានប្រសិទ្ធភាពខ្ពស់សម្រាប់ការប្រើប្រាស់។ ប៉ុន្តែ ការធ្វើបែបនេះ គឺនឹងត្រូវការពេលវេលាយូរបន្តិច។ ចំពោះការទិញយកក្រុមហ៊ុន Datakalab របស់បារាំង ដែលជាក្រុមហ៊ុនមានឯកទេសលើប្រព័ន្ធ power-efficient model ដែលមានប្រសិទ្ធភាពក្នុងលក្ខខណ្ឌនៃការប្រតិបត្តិ ការរក្សាសុវត្ថិភាពឯកជនភាព និងប្រតិបត្តិការទាំងស្រុងលើឧបករណ៍។
សូមបញ្ជាក់ថា Datakalab ត្រូវបានបង្កើតឡើងក្នុងឆ្នាំ 2016 ដោយបងប្អូនបង្កើតពីរនាក់ គឺលោក Xavier និង Lucas Fischer។ យោងតាមការបញ្ជាក់ពីគណៈកម្មការអឺរ៉ុប កិច្ចព្រមព្រៀងសម្រាប់ការទិញលក់រវាង Apple និង Datakalab ត្រូវបានចុះហត្ថលេខាកាលពីខែធ្នូឆ្នាំមុន។ យ៉ាងណាមិញដំណឹងនេះទើបតែត្រូវបានទម្លាយចេញក្នុងពេលនេះប៉ុណ្ណោះ តាមរយះទស្សនាវដ្ដីពាណិជ្ជកម្មបារាំងឈ្មោះថា Challenges។
Datakalab ត្រូវបានគេរាយការណ៍ថា មានបុគ្គលិកត្រឹមតែ 10 ទៅ 20 នាក់ប៉ុណ្ណោះ ហើយពួកគេជាច្រើននាក់ក៏ត្រូវ បានបញ្ជាក់ថាបានចូលរួមក្នុងក្រុមថ្មីនៅក្រុមហ៊ុន Apple ផងដែរ។ ទោះជាយ៉ាងណាក៏ដោយ ស្ថាបនិកក្រុមហ៊ុនដែលជាបងប្អូន គឺលោក Xavier និង Lucas Fischer ត្រូវបានគេរាយការណ៍ថាមិនបានចូលរួមជាមួយ Apple ទេ។ Datakalab គឺជាក្រុមហ៊ុនដែលបានធ្វើការជាមួយរដ្ឋាភិបាលបារាំងក្នុងអំឡុងពេល COVID-19 ក្នុងការដាក់ពង្រាយឧបករណ៍ AI នៅក្នុងប្រព័ន្ធដឹកជញ្ជូន ដើម្បីរកមើលថា តើមនុស្សពាក់ម៉ាសបានត្រឹមត្រូវ ដែរឬអត់ ថែមទៀតផង៕