យោងតាមការទម្លាយនូវព័ត៌មាននាពេលមុននេះ ធ្លាប់មានការទម្លាយថា ក្រុមហ៊ុន Samsung នឹងមានការបញ្ចេញនូវស្មាតហ្វូនបត់បានជំនាន់ថ្មី “Galaxy Z Fold7 Ultra” ដែលពេលនោះបានធ្វើអោយអ្នកគាំទ្រជាច្រើន មានការរំភើបជាមួយនឹងវត្តមានរបស់ស្មាតហ្វូននេះ។ ប៉ុន្តែអ្វីៗបានស្ងាត់ទៅវិញ ដោយអ្នកទម្លាយដ៏ល្បីឈ្មោះមួយរូបបានបញ្ជាក់ថា វត្តមានរបស់ស្មាតហ្វូន “Ultra” ដែលជាម៉ូដែលប្រណិតរបស់ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងគ្រាន់តែជាការបំភ្លើសប៉ុណ្ណោះ។
ថ្មីៗនេះ អ្នកទម្លាយ Max Jambor បានធ្វើការបង្ហោះនៅលើបណ្តាញសង្គម X ដោយបានបញ្ជាក់ថា ក្រុមហ៊ុននេះ នឹងមិនមានការបង្ហាញវត្តមានស្មាតហ្វូន Ultra នោះទេ នៅក្នុងព្រឹត្តិការណ៍ Galaxy Unpacked នៅក្នុងខែកក្កដាខាងមុខនេះ។ ប្រភពខាងលើនេះបន្តថា ស្មាតហ្វូនអេក្រង់បត់បាន Fold7 នឹងមានផ្តល់នូវបទពិសោធន៍សម្រាប់អ្នកប្រើប្រាស់កម្រិតដូច Ultra អញ្ចឹង។ នៅក្នុងឆ្នាំនេះ ក្រុមហ៊ុន Samsung អាចនឹងមានការប្រកាសចេញនូវស្មាតហ្វូនអេក្រង់បត់បាន 3 ម៉ូដែល ក្នុងនោះមានដូចជា Galaxy Z Fold7, Galaxy Z Flip7 និង Galaxy Z Flip7 FE ហើយស្មាតហ្វូនទាំងនេះ ក៏បានបង្ហាញវត្តមាននៅលើវិញ្ញាបនបត្រ RKDN ផងដែរ។
សូមជំរាបថា ស្មាតហ្វូនបត់បាន Z Fold7 ថ្មីនេះ ត្រូវបានគេទម្លាយថា គឺនឹងមានរូបរាងស្លីមជាមួយនឹងកម្រាស់ត្រឹមតែ 3.9mm នៅពេលដែលបើក ខណៈដែលបិទមានកម្រាស់ 8.9mm។ ស្មាតហ្វូននេះ នឹងមានភ្ជាប់ជាមួយនឹងកាមេរ៉ាគោលទំហំ 200MP និងមានអេក្រង់ខាងក្នុងទំហំ 8.2-អ៊ីង រួមនិងការបំពាក់នូវបន្ទះឈីប Snapdragon 8 Elite ទៀតផង។ សម្រាប់ស្មាតហ្វូន Z Flip7 និង Flip7 FE វិញ អាចនឹងប្រើប្រាស់នូវបន្ទះឈីប Exynos ហើយនឹងប្រើប្រាស់នូវ One UI 8 នៅលើ Android 16 ដែលផ្តល់នូវភាពរលូនក្នុងការប្រើប្រាស់ និងមុខងារ AI ជាច្រើនទៀតផង។
ខណៈពេលដែលកាលបរិច្ឆេទជាក់លាក់នៃព្រឹត្តិការណ៍ Unpacked នៅមិនទាន់ដឹងនៅឡើយទេនោះ ព្រឹត្តិការណ៍នេះ អាចនឹងធ្វើឡើងនៅខែកក្កដានេះ នៅទីក្រុងញ៉ូវយ៉ក៕
