Zero Motorcycles ដែលជាក្រុមហ៊ុនអភិវឌ្ឍ និងផលិតកង់អេឡិចត្រូនិចដ៏ធំមួយរបស់សហរដ្ឋអាមេរិក ដែលមានបទពិសោធន៍ផលិតម៉ូតួអគ្គីសនី អស់រយៈពេលជាយូរឆ្នាំមកហើយនោះ បានបង្ហាញនូវម៉ូតូស៊េរីថ្មីរបស់ខ្លួនសម្រាប់ឆ្នាំ 2019 ខាងមុខនេះ។ ម៉ូតូស៊េរីថ្មីនេះ ត្រូវបានក្រុមហ៊ុនបញ្ជាក់ថា គឺមានកម្លាំងខ្លាំងក្លាជាងម៉ូដែលមុនៗ ដោយបានបំពាក់ជាមួយនឹងបច្ចេកវិទ្យាថ្មីៗ រូបរាងស្ទាយ៍កាន់តែអស្ចារ្យ រួមនិងបទពិសោធន៍នៃការបើកបរកាន់សំបូរបែប។
ក្រុមហ៊ុន Zero បាននិយាយថា សម្រាប់ឆ្នាំ 2019 នេះ ក្រុមហ៊ុនផ្តោតទៅលើម៉ូតូស៊េរីថ្មីចំនួនពីរម៉ូដែលដ៏អស្ចារ្យ សម្រាប់អតិថិជនរបស់ខ្លួន។ សម្រាប់ម៉ូតូស៊េរីថ្មី Zero DS ZF7.2 គឺមានថាមពលធំខ្លាំងក្លាជាងមុន។ សម្រាប់ម៉ូដែលនេះ មានកម្លាំងខ្លាំងជាងមុនដល់ទៅ 35% បើធៀបជាមួយនឹងម៉ូដែលជំនាន់មុន ហើយនិងមានល្បឿនលឿនជាងមុនដល់ទៅ 8%។
ម៉ូតូស៊េរីថ្មីនេះ មានទំងន់ 96 ផោនស្រាលជាងម៉ូដែល Zero DS ZF14.4 ដែលមានថាមពលដូចគ្នា ប៉ុន្តែវាមានកម្លាំងល្បឿនលឿនជាងមុនដល់ទៅ 10% បើធៀបទៅនឹងឆ្នាំមុននេះ។ ម៉ូតូស៊េរីថ្មីនេះ អាចធ្វើដំណើរបានចម្ងាយដល់ទៅ 204 ម៉ាយ៍នៅក្នុងទីក្រុង និង 97 ម៉ាយ៍នៅលើផ្លូវ Highway។ សម្រាប់ម៉ូដែល Zero DSR លំដាប់ខ្ពស់ជាងគេនោះ គឺមានកម្លាំងរមួលដល់ទៅ 116 lb-ft បំពាក់ជាមួយនឹងមុខងារថ្មីៗជាច្រើនទៀត។
ម៉ូតូស៊េរីថ្មី Zero S ZF 14.4 នេះ អាចធ្វើដំណើរបានចម្ងាយ 223 ម៉ាយ៍ នៅក្នុងទីក្រុង និង 112 ម៉ាយ៍ នៅក្នុងផ្លូវ Highway។ ចំនែកម៉ូដែល Zero S ZF 7.2 វិញមានសមត្ថភាពត្រឹមតែ 35% នៃម៉ូដែល Zero DS។ និយាយពីផ្នែកខាងក្រោយរបស់ម៉ូតូស៊េរីថ្មី Zero នេះគឺមានបំពាក់នូវធុងភ្លើង 6kW Charge Tank ដែលធ្លាប់បានប្រើប្រាស់តាំងពីឆ្នាំ 2015 មកម្ល៉េះ។ ថ្មទំហំប៉ុណ្ណេះ គឺអនុញ្ញាតឱ្យ Zero អាចធ្វើការបញ្ចូលថាមពលថ្មបានដល់ទៅ 6 ដងលឿន ជាងការប្រើប្រាស់ដោតបញ្ចូលថាមពលថ្ម ហើយវាអាចធ្វើដំណើរបន្ថែមបានដល់ទៅ 85 ម៉ាយ៍នៅក្នុងរយៈពេលមួយម៉ោង។
ជាមួយគ្នានេះ ក្រុមហ៊ុន Zero ក៏មានការបន្ថែមនូវមុខងារមួយដែលមានឈ្មោះថា Long Term Storage Mode សម្រាប់ម៉ូដែលឆ្នាំ 2019 រួមនិងការពង្រឹងទៅលើថាមពលថ្មកាន់តែខ្លាំងក្លាជាងមុនថែមទៀតផង។ ម៉ូតូស៊េរីថ្មីឆ្នាំ 2019 នេះ មានការធានាទៅលើថាមពលថ្មដល់ទៅ 5 ឆ្នាំ៕