ក្រុមហ៊ុនផលិតរថយន្ត Hyundai បង្ហាញចេញនូវបច្ចេកវិទ្យាថ្មី អាចអោយរថយន្តចូលចតដោយស្វ័យប្រវត្តិ និងឆ្លាតវៃបំផុត

នៅថ្ងៃទី 28 ខែធ្នូនេះ Hyundai Motor Group ដែលជាក្រុមហ៊ុនមេធំរបស់ក្រុមហ៊ុន Hyundai Motor និង Kia Motors ប្រកាសបង្ហាញនូវវីដេអូប្រភេទ 3D មួយអំពីប្រព័ន្ធចតយានយន្តស្វ័យប្រវត្តិរបស់ខ្លួន Automated Valet Parking System ហើយនេះ គឺជាគំនិតដ៏អស្ចារ្យសម្រាប់បច្ចេកវិទ្យាចតរថយន្តដោយស្វ័យប្រវត្តិឆ្លាតវៃបំផុត។  ប្រព័ន្ធនេះត្រូវបានអភិវឌ្ឍដែលជាផ្នែកមួយនៃគ្រឿងបន្លាស់របស់ក្រុមហ៊ុន Hyundai Mobis ដែលកាលពីខែកុម្ភៈនោះបានធ្វើការអភិវឌ្ឍទៅលើប្រព័ន្ធជំនួយការទៅលើការចតរថយន្តស្វ័យប្រវត្តិនេះ Remote Smart Parking Assist ដែលអ្នកប្រើប្រាស់ជាច្រើនអាចធ្វើការចតរថយន្តរបស់ពួកគេដោយប្រើប្រាស់ឧបករណ៍បញ្ជាពីចម្ងាយបាន។ 

ស្របពេលដែលប្រព័ន្ធ RSPA នេះ ទាមទារអោយមានប្រើប្រាស់នូវ Remote Control ដោយប្រើប្រាស់នូវសោរឆ្លាតវៃ Smart Keys នោះ ប្រព័ន្ធ AVPS គឺជាបច្ចេកវិទ្យាកម្រិតខ្ពស់មួយទៀត ដែលអនុញ្ញាតឱ្យរថយន្តអេឡិចត្រូនិចអាចធ្វើការចត និងបញ្ចូលថាមពលដោយស្វ័យប្រវត្តិនោះ។ ក្រុមហ៊ុននេះ បានបញ្ជាក់ថា “យើងនឹងធ្វើការអិវឌ្ឍទៅលើបច្ចេកវិទ្យានៃការបើករថយន្តដោយស្វ័យប្រវត្តិនេះនៅក្នុងទំរង់ផ្សេងៗគ្នា ដូចនេះអ្នកប្រើប្រាស់ជាច្រើនអាចនឹងទទួលបាននូវបទពិសោធន៍ដ៏អស្ចារ្យជាមួយនឹងរថយន្តស្វ័យប្រវត្តិនេះ។ ការប្រើប្រាស់គឺកាន់តែងាយស្រួល និងសុវត្ថិភាពបំផុត។” នៅក្នុងវីដេអូដែលបង្ហោះដោយក្រុមហ៊ុននេះបង្ហាញអំពីរថយន្ត EV នេះស្វែងរកនូវកន្លែងចតរថយន្តដែលទំនេរ ហើយវាបញ្ចូលថាមពលថ្ម Wireless ដោយប្រើប្រាស់នូវម៉ាញេទិចប្រព័ន្ធ EV wireless charging system ក្រោយពេលដែលអ្នកធ្វើដំណើរចុះពីរថយន្ត។

តាមរយៈបច្ចេកវិទ្យា AVPS នេះ រថយន្តអេឡិចត្រូនិច EV ដែលបញ្ចូលថាមពលថ្មពេញនោះអាចធ្វើការបម្លាស់ទីដើម្បីស្វែងរកនូវកន្លែងចតរថយន្តដោយខ្លួនឯងបាន។ បន្ថែមពីនេះទៀតនោះ ប្រព័ន្ធចតរថយន្តដោយស្វ័យប្រវត្តិនេះអាចធ្វើការគ្រប់គ្រងតាមរយៈកម្មវិធី Apps នៅលើទូរស័ព្ទរបស់ពួកគេបានផងដែរ។ ជាមួយនឹងការកើនឡើងនៃរថយន្ត EVs នោះ ប្រព័ន្ធថ្មីនេះនឹងធ្វើឱ្យអ្នកប្រើប្រាស់កាន់តែមានភាពងាយស្រួលក្នុងការប្រើប្រាស់ និងការបញ្ចូលថាមពលថ្មទៅលើរថយន្តរបស់ពួកគេថែមទៀតដោយសារតែវាអាចស្វែងរកនូវកន្លែងបញ្ចូលថាមពលថ្ម និងកន្លែងចតដោយខ្លួនឯងបាន។

ប្រព័ន្ធថ្មីនេះ គឺផ្អែកទៅលើបច្ចេកវិទ្យានៃការតភ្ជាប់ទំនាក់ទំនងរវាងរថយន្ត កន្លែងចំណត កន្លែងបញ្ចូលថាមពលថ្ម និងអ្នកបើកបរ។ កន្លែងចតរថយន្តនឹងផ្ញើព័ត៌មាននៃកន្លែងចតដែលទទេរ ឬកន្លែងបញ្ចូលថាមពលថ្មទៅកាន់រថយន្តរបស់អ្នក ហើយអ្នកបើកបរក៏អាចដឹងព័ត៌មាននេះដូចគ្នា ដូចនេះវាមិនមានការព្រួយបារម្ភពីថាមពលថ្មដែលអស់នោះទេ។ ក្រុមហ៊ុនផលិតរថយន្តនេះក៏ពិចារណាទៅលើការផ្លាស់ប្តូរទៅលើមុខងារជាច្រើនសម្រាប់ប្រព័ន្ធចតរថយន្តដោយស្វ័យប្រវត្តិនេះសម្រាប់រថយន្តដែលអាចបើកបរដោយស្វ័យប្រវត្តិរបស់ខ្លួននៅត្រឹមឆ្នាំ 2025 នេះ៕