រថយន្ត Land Cruiser Heritage Edition ឆ្នាំ 2020 ត្រូវបានតូយ៉ូតាផលិតឡើងចំនួន 1200 គ្រឿង ដើម្បីអបអរខួបលើកទី 60 ឆ្នាំរបស់ខ្លួន

នៅខែក្រោយនេះ នឹងមានព្រឹត្តិការណ៍ពិពរណ៍ Chicago Auto Show នៅសហរដ្ឋអាមេរិក ដែលគេដឹងថា នឹងមានការបង្ហាញនូវវត្តមានរថយន្តថ្មីៗជាច្រើនពីក្រុមហ៊ុនផលិតថយន្តនៅជុំវិញពិភពលោក។ ប៉ុន្តែនៅថ្ងៃនេះ ក្រុមហ៊ុន Toyota បានធ្វើការបង្ហាញនូវម៉ូដែលរថយន្តស៊េរីថ្មីរបស់ខ្លួនមួយនៃត្រកូលរថយន្ត SUVs ដ៏ពេញនិយមបំផុត គឺ Land Cruiser នៅមុនកម្មវិធីនោះទៅវិញ។ វត្តមានរថយន្តស៊េរីថ្មី  Land Cruiser Heritage Edition 2020 នេះ គឺមានចំនួនត្រឹមតែ 1200 គ្រឿងតែប៉ុណ្ណោះ ដោយក្រុមហ៊ុន Toyota ផលិតឡឿងដើម្បីអបអរខួបលើកទី៦០ ឆ្នាំរបស់ខ្លួននៃការផលិតរថយន្តនេះ។

សម្រាប់លក្ខណៈសម្បត្តិរបស់រថយន្តស៊េរីថ្មីម៉ូដែលពិសេស Heritage Edition នេះ ត្រូវបានគេមើលឃើញថា មានការរចនាបានយ៉ាងស្អាត និងមានភាពឥតខ្ចោះ ដោយមានការប្រើប្រាស់នូវកង់អាលុយមីញ៉ូមពណ៌សំរិទ្ធិលាយខ្មៅ ហើយពណ៌ខាងក្រៅរបស់រថយន្តភ្ជាប់ជាមួយនឹងតួអក្សរ “Toyota Land Cruiser” ហើយពណ៌ខាងក្រៅ គឺមានពណ៌ Midnight Black Metallic ឬ Blizzard Pearl  ដ៏ស្រស់ស្អាតបំផុត។ សម្រាប់ពណ៌ខាងក្នុងរបស់រថយន្តនេះគឺប្រើប្រាស់ពូកស្បែកពណ៌ខ្មៅដើម្បីអោយស៊ីគ្នាជាមួយនឹងកង់រថយន្តផងដែរ។

ផ្នែកខាងក្នុងនៃរថយន្តម៉ូដែលពិសេស Heritage Edition នេះគឺពិតជាស្រស់ស្អាតមែនទែន។ រថយន្តនេះ មិនមានកៅអីជួរទី 3 នោះទេ ដូចនេះ កន្លែងអង្គុយនៅលើរថយន្តនេះគឺមានតែ 5 កន្លែងតែប៉ុណ្ណោះ។ ផ្នែកខាងក្នុងរបស់វាមានភ្ជាប់ជាមួយនឹងប្រព័ន្ធគ្រប់គ្រងទៅលើធាតុអាកាស Smart Key អេក្រង់ផ្តល់ព័ត៌មាន 9-inch Touchscreen និងប្រព័ន្ធសំឡេង JBL Audio System ថែមទៀត។

អ្នកប្រើប្រាស់ដែលនិយមចូលចិត្តរថយន្ត Land Cruiser នេះ នឹងមានភាពរីរកាយដោយសារតែផ្នែកខាងក្នុងរបស់រថយន្តនេះ គឺមិនមានការផ្លាស់ប្តូរនោះទេ។ កម្លាំងម៉ាស៊ីនរបស់រថយន្ត Heritage Edition នេះគឺមានទំហំ 5.7-liter V8 engine ជាមួយនឹងចង្កឹះលេខ 8 វគ្គស្វ័យប្រវត្តិ និងប្រព័ន្ធ 4 -wheel drive system ដែលមានកម្លាំងដល់ទៅ 381 សេះ និងកម្លាំងរមួលដល់ទៅ 401 lb-ft ថែមទៀត។

ក្រុមហ៊ុន Toyota បានបញ្ជក់ថា រថយន្ត SUV ម៉ូដែលពិសេសនេះ នឹងទៅដល់ហាងចែកចាយជាច្រើនរបស់ខ្លួននៅចុងរដូវក្តៅនេះ ហើយតម្លៃរបស់វានៅមិនទាន់ទមា្លយនោះទេ។