កាលពីថ្ងៃទី 14 ខែមីនានេះ ក្រុមហ៊ុនផលិតរថយន្ត Toyota Motor របស់ប្រទេសជប៉ុន បានបង្ហាញនូវវត្តមានរបស់រថយន្តស៊េរីថ្មី Prius C ដែលប្រើប្រាស់នូវបច្ចេកវិទ្យា Petrol-Electric Hybrid នៅក្នុងប្រទេសកូរ៉េ ដែលមានគោលដៅនៅក្នុងការទាក់ទាញការចាប់អារម្មណ៍ពីសំណាក់អតិថិជនភាគច្រើនដែលជាយុវវ័យ។
លោក Nobuyuki Takemura ដែលជានាយកប្រតិបត្តិរបស់ក្រុមហ៊ុន តូយ៉ូតា នៅក្នុងប្រទេសកូរ៉េ បានបញ្ជាក់ នៅក្នុងសន្និសីទមួយនៅក្នុងទីក្រុងសេអ៊ូល បានអោយដឹងថា “រថយន្ត Prius C គឺជាម៉ូដែលស៊េរីថ្មី នៃរថយន្ត Hybrid របស់ក្រុមហ៊ុន តូយ៉ូតា ដែលមានភាពងាយស្រួលក្នុងការប្រើប្រាស់ និងផ្តល់នូវភាពរីករាយបំផុតសម្រាប់អ្នកបើកបរ។ យើងជឿជាក់ថា អតិថិជនជាពលរដ្ឋកូរ៉េនឹងស្រឡាញ់នូវម៉ូដែលនេះ។” លោកបន្ថែមថា ក្រុមហ៊ុនតូយ៉ូតាមគោលបំណងនៃការប្រកាសចេញម៉ូដែលនេះ គឺដើម្បីទាក់ទាញអតិថិជនជាយុវវ័យ និងការបង្ហាញនូវរូបភាពរថយន្ត Hybrid ប្រកបដោយភាពរស់រវើកជាមួយនឹងម៉ូដែលថ្មីរបស់ខ្លួនថែមទៀត។ ដើម្បីសម្រេចបានគោលដៅនេះ ក្រុមហ៊ុន បានចាប់ផ្តើមបង្ហាញនូវរថយន្ត Prius C ដែលមានពណ៌ចំនួន 12 ពណ៌ ដើម្បីទាក់ទាញចំណាប់អារម្មណ៍របស់អតិថិជននៅក្នុងវ័យចាប់ពី 20 ឆ្នាំឡើង និង 30 ឆ្នាំឡើងជាមួយនឹងតម្រូវការផ្សេងៗ។
ក្រុមហ៊ុន តូយ៉ូតា បានសង្កត់ធ្ងន់ថា ម៉ូដែលថ្មីនេះ ត្រូវបានគេបំពាក់មកជាមួយម៉ាស៊ីនស៊ីឡាំង Hybrid 1.5 លីត្រ និងប្រើប្រាស់ប្រេងឥន្ធនៈ នៅក្នុង Economy ត្រឹមតែ 19,4 គីឡូម៉ែត្រ ក្នុងមួយលីត្រ។ រថយន្ត Prius C មានតម្លៃ 24,9 លានវ៉ុន (234,060 ដុល្លារអាមេរិក) ហើយអតិថិជនអាចទិញរថយន្តនេះថោកជាង ដោយទទួលបានប្រាក់ឧបត្ថម្ភពីរដ្ឋចំនួន 500.000 វ៉ុនផងដែរ។ ម្ចាស់រថយន្ត Prius C ក៏អាចទទួលបានការបញ្ចុះតម្លៃពន្ធ 3,1 លានវ៉ុន សម្រាប់ធ្វើជាម្ចាស់រថយន្ត Hybrid នេះ។
លោក Kang Dae-hwan ដែលជានាយកប្រតិបត្តិផ្នែកលក់ និងទីផ្សារនៃក្រុមហ៊ុនតូយ៉ូតា បាននិយាយថា "យើងមានបំណងលក់រថយន្ត Prius C ចំនួន 800 គ្រឿងក្នុងមួយឆ្នាំ" ។ ក្រុមហ៊ុនក៏ចាប់ផ្តើមទទួលការទិញមុនពីថ្ងៃទី 26 ខែកុម្ភៈ ហើយខ្លួនក៏ទទួលបានការកក់ចំនួន 100 គ្រឿងរួចហើយ។ រថយន្ត Prius C ត្រូវបានដាក់លក់ជាលើកដំបូងនៅក្នុងឆ្នាំ 2011 ហើយលក់បានជាង 1,52 លានគ្រឿង នៅទូទាំងពិភពលោក។
អ្នកនាំពាក្យរបស់ក្រុមហ៊ុន បាននិយាយប្រាប់កាសែត The Investor ថា "បច្ចុប្បន្នតម្រូវការសម្រាប់រថយន្តខ្នាតតូចមានការកើនឡើងនៅក្នុងប្រទេសកូរ៉េ ដូច្នេះ យើងសម្រេចចិត្តបើកលក់រថយន្ត Prius C នៅទីនេះ" ។ ក្រៅពីម៉ូដែលថ្មីនេះ ក្រុមហ៊ុន Toyota នៅក្នុងប្រទេសកូរ៉េ ក៏លក់រថយន្តស្ព័រកូនកាត់ Hybrid Sedan ប្រភេទ Prius V និងរថយន្ត Hybrid ម៉ូដែល Prius Prime នៅទីនេះផងដែរ។ ក្រុមហ៊ុន Toyota Motor គឺជាក្រុមហ៊ុនផលិតរថយន្តធំជាងគេលំដាប់ទី 3 នៅទីនេះ ដែលលក់បានរថយន្ត 1,235 គ្រឿង កាលពីខែមុនបន្ទាប់ពីរថយន្ត Mercedes-Benz និង BMW ៕
