នៅក្នុងកំឡុងពេលដែលរោងចក្ររបស់ក្រុមហ៊ុនផលិតរថយន្តជាច្រើន នៅជុំវិញពិភពលោក កំពុងតែធ្វើការបិទទ្វានោះ មានក្រុមហ៊ុនផលិតរថយន្តមួយចំនួន បានងាកមកប្រើប្រាស់នូវធនធានរបស់ពួកគេក្នុងការជួយសង្គ្រោះជីវិតមនុស្សជាច្រើននៅក្នុងអំឡុងនៃរោគរាតត្បាតកូរ៉ូណាវីរុសនេះ តាមរយៈការបង្កើតនូវសម្ភារៈឧបករណ៍វេជ្ជសាស្រ្ត។ តួរយ៉ាង ដូចជា ក្រុមហ៊ុន Ford ក៏ធ្វើការសហការគ្នាជាមួយនឹង GE Healthcare ក្នុងការផលិតនូវឧបករណ៍បំពង់ដកដង្ហើមនៅក្នុងទីក្រុង Michigan ផងដែរ។
បន្ទាប់ពីការប្រកាសអំពីកិច្ចសហប្រតិបត្តិការ កាលពីសប្តាហ៍មុននេះ ក្រុមហ៊ុន Ford ពេលនេះ ក៏បានធ្វើការជាមួយនឹងល្បឿនលឿនរបស់ខ្លួនជាមួយនឹងគោលដៅក្នុងការផលិតនូវឧបករណ៍បំពង់ខ្យល់ដង្ហើមចំនួន 50,000 គ្រឿងនៅក្នុងរយៈពេល 100 ថ្ងៃ និងការផលិតដល់ទៅ 30,000 ត្រឹមតែរយៈពេលមួយខែប៉ុណ្ណោះ។
សម្រាប់សមត្ថភាពក្នុងការផលិតរបស់ក្រុមហ៊ុនផលិតរថយន្ត Ford នេះ នឹងជួយក្នុងការបង្កើនទៅលើការផលិតដើម្បីបំពេញនូវតម្រូវការកើនឡើងនៅក្នុងសហរដ្ឋអាមេរិក ខណៈពេលដែលក្រុមហ៊ុន GE Healthcare នឹងធ្វើការផ្តល់នូវអ្នកជំនាញជាច្រើនរបស់ខ្លួន និងធ្វើការផ្តល់អាជ្ញាបណ្ណសម្រាប់ការឌីស្សាញទៅលើបំពង់ខ្យល់ពីក្រុមហ៊ុន Airon Corp។ សម្រាប់បំពង់ខ្យល់ដង្ហើម GE/Airon Model A-E ventilator ដែលធ្វើការផលិតដោយក្រុមហ៊ុន Ford នេះ គឺដើម្បីបំពេញនូវតម្រូវការរបស់អ្នកជំងឺមេរោគ Covid-19 ដែលពិបាកក្នុងការដកដង្ហើមនោះ។
លោក Jim Hackett ដែលជាអគ្គនាយក និងនាយកប្រតិបត្តិរបស់ក្រុមហ៊ុន Ford បាននិយាយថា “ក្រុមការងារ Ford និង GE Healthcare បានធ្វើការសហការជាមួយគ្នាប្រកបដោយភាពច្នៃប្រឌិត និងមិនមានការនឿយហត់នោះទេ ហើយយើងក៏រកឃើញនូវវិធីមួយនៅក្នុងការផលិតនូវឧបករណ៍បំពង់ខ្យល់នេះអោយកាន់តែបានលឿនជាងមុន និងមានអត្ថន័យបំផុត។ តាមរយៈការផលិតនូវឧបករណ៍បំពង់ខ្យល់នេះនៅក្នុងទីក្រុង Michigan នោះ ការសហការគ្នាយ៉ាងរឹងមាំជាមួយនឹងក្រុមហ៊ុន UAW យើងអាចជួយក្រុមការងារសុខភាពជាច្រើនអោយរក្សានូវអាយុជីវិត ហើយនោះគឺជាអាទិភាពទី ១ របស់យើង។”
ក្រុមហ៊ុន Ford នឹងធ្វើការចាប់ផ្តើមការងារជាមួយនឹងក្រុមហ៊ុន Airon ដើម្បីធ្វើការបង្កើនទៅលើផលិតកម្មរបស់ខ្លួននៅក្នុងរដ្ឋ Florida មុនពេលដែលចាប់ផ្តើមធ្វើការផលិតរបស់ខ្លួននៅក្នុងរោងចក្រ Rawsonville Components Plant នៅក្នុងតំបន់ Ypsilanti, Michigan នៅថ្ងៃទី 24 ខែមេសាខាងមុខនេះ។
ក្រុមហ៊ុន Ford រំពឹងថានឹងធ្វើការផលិតនូវឧបករណ៍ខ្យល់ដង្ហើមនេះចំនួន 1,500 ventilators នៅចុងខែមេសានេះ និងចំនួន 12,000 នៅចុងខែឧសភា និង 50,000 នៅថ្ងៃទី 4 ខែកក្កដា និងការជួយរដ្ឋាភិបាលសហរដ្ឋអាមេរិកក្នុងការសម្រេចបាននូវគោលដៅក្នុងការផលិតនូវ 100,000 ventilators នៅក្នុងរយៈពេល 100 ថ្ងៃ។ ក្រុមអ្នកធ្វើការងារស្ម័គ្រចិត្ត United Auto Workers ចំនួន 500 នាក់ក៏ត្រូវបានជួលអោយជួយក្នុងការបង្កើនទៅលើផ្នែកផលិតកម្ម និងការធ្វើការដល់ទៅ 3 វេនថែមទៀតផង។
បច្ចុប្បន្ននេះ ក្រុមហ៊ុន Airon ធ្វើការផលិតនូវឧបករណ៍ Airon pNeuton Model A ventilators បាន 3 ក្នុងមួយថ្ងៃ ប៉ុន្តែក្រុមហ៊ុន Ford ក៏មានគម្រោងក្នុងការផលិតនូវ 7,200 Airon-licensed Model A-E ventilators ក្នុងមួយសប្តាហ៍សម្រាប់ផលិតកម្មពេញលេញរបស់ខ្លួនផងដែរ។
ក្រុមហ៊ុន Ford ក៏មានគម្រោងក្នុងការបើកនូវរោងចក្រជាច្រើនរបស់ខ្លួនឡើងវិញ នៅថ្ងៃទី 14 ខែមេសានេះ ដែលមានរោងចក្រ Kentucky Truck Plant ដែលនឹងធ្វើការផលិតនូវរថយន្ត Ford Expedition និង Lincoln Navigator និង Kansas City ដែលធ្វើការផលិតនូវរថយន្ត Ford F-150 នៅទីនោះផងដែរ៕
