ក្រោយពីទទួលបានជោគជ័យនៅក្នុងការផ្លាស់ប្តូរយុទ្ធសាស្រ្តទៅលើការលក់ស្មាតហ្វូន iPhone នាពេលកន្លងមក នៅពេលនេះ មានការលើកឡើងថា ក្រុមហ៊ុន Apple ប្រហែលជានូវប្រើប្រាស់នូវយុទ្ធសាស្រ្តដែលខ្លួន បានប្រើប្រាស់នៅលើស្មាតហ្វូន iPhone នោះ ទៅធ្វើសម្រាប់អាជីវកម្មរថយន្តរបស់ខ្លួននាពេលខាងមុខនេះដូចគ្នា។ យុទ្ធសាស្រ្តនេះ គឺមានការឌីស្សាញទៅលើផលិតផលរបស់ក្រុមហ៊ុននេះ រួមទាំងការនាំចូលនូវសមាសភាគជាច្រើនរបស់ខ្លួន ហើយនិងការធ្វើការជាមួយនឹងក្រុមហ៊ុនផលិតដែលជាប់កុងត្រាក្នុងការតម្លើងសម្រាប់ការលក់ចេញនៅលើទីផ្សារ។
តាមការបញ្ជាក់នៅក្នុងរបាយការណ៍ចេញពី Bloomberg គឺបានអោយដឹងថា ក្រុមហ៊ុនបច្ចេកវិទ្យាយក្សនេះ ក៏ប្រហែលជាប្រើប្រាស់នូវយុទ្ធសាស្រ្តរបស់ iPhone សម្រាប់ការផលិតទៅលើរថយន្តដំបូងបំផុតរបស់ខ្លួនផងដែរ។ ក្រុមហ៊ុននេះ អាចនិងធ្វើការជាមួយនឹងក្រុមហ៊ុនដែលកុងត្រាច្បាស់លាស់នៅក្នុងការផលិតទៅលើរថយន្ត Apple Car របស់ខ្លួន។ ក្រុមហ៊ុននេះ គឺមានជម្រើស 3 ក្នុងការផលិតទៅលើរថយន្តនេះ គឺការសហការជាមួយនឹងក្រុមហ៊ុនផលិតរថយន្តដែលមានស្រាប ការបង្កើតនូវរោងចក្រផ្ទាល់ខ្លួន ឬការសហការជាមួយនឹងក្រុមហ៊ុនកុងត្រាដូចជា Foxconn ជាដើម។
សូមជំរាបថា ក្រុមហ៊ុន Apple ថ្មីៗនេះ ក៏បានពិភាក្សាជាមួយនឹងក្រុមហ៊ុនផលិតរថយន្ត Hyundai នៅក្នុងការផលិតរថយន្តដំបូងបំផុតរបស់ខ្លួនផងដែរ។ ក្រុមហ៊ុននេះ ក៏បានធ្វើការអភិវឌ្ឍទៅលើប្រព័ន្ធរថយន្តស្វ័យប្រវត្តិសម្រាប់រថយន្តនេះ ជាមួយនឹងការឌីស្សាញខាងក្រៅ និងខាងក្នុងនិងបច្ចេកវិទ្យា Board សម្រាប់រថយន្តនេះផងដែរ ខណៈពេលដែលក្រុមហ៊ុនផលិតរថយន្តនឹងធ្វើការនៅលើការផលិតចុងក្រោយសម្រាប់រថយន្តនេះ។
ក្រុមហ៊ុន Apple អាចនឹងស្នើអោយក្រុមហ៊ុនដៃគូនេះ ធ្វើការដកចេញនូវម៉ាកយីហោរបស់គេ។ នេះ គឺជាអ្វីដែលក្រុមហ៊ុនជាច្រើនស្នើទៅកាន់ក្រុមហ៊ុន Samsung ក្នុងការផលិតនូវស្មាតហ្វូនរបស់ខ្លួន ប៉ុន្តែមិនមានឡូហ្គោរបស់ក្រុមហ៊ុនផលិតនេះ។ ក្រុមហ៊ុន Apple នឹងផ្តោតទៅលើកៅអីអង្គុយក្នុងរថយន្ត តួខ្លួនរថយន្ត និងសមាសភាគជាច្រើនទៀតនៃរថយន្តនេះផងដែរ៕
