យោងតាមការបញ្ជាក់នៅក្នុងព្រឹត្តិការណ៍ Huawei Global Analyst Conference 2021 ដែលបានធ្វើឡើងនៅក្នុងទីក្រុង Shenzhen នោះ លោក Xu Zhijun ដែលជាប្រធានរបស់ក្រុមហ៊ុន Huawei បាននិយាយថា ក្រុមហ៊ុន Huawei បានធ្វើការសហការជាមួយនឹងក្រុមហ៊ុនផលិតចំនួន 3 ដើម្បីបង្កើតនូវក្រុមហ៊ុនម៉ាកយីហោរថយន្តចំនួន 3 របស់ខ្លួន។ លោកបបន្តថា ចាប់ផ្តើមពីត្រីមាសទី 4 នៅក្នុងឆ្នាំនេះ គ្រប់គ្នានឹងបានឃើញនូវរថយន្តជាច្រើនរបស់ក្រុមហ៊ុន Huawei ដែលនឹងបង្ហាញខ្លួននៅក្រោមម៉ាកយីហោរបស់រថយន្តទាំង 3 នេះ ហើយ។
លោក Xu Zhijun បានបន្ថែមថា ការសម្រេចចិត្តរបស់ក្រុមហ៊ុន Huawei ក្នុងការមិនបង្កើតនូវរថយន្ត និងការជួយក្រុមហ៊ុនផលិតរថយន្តជាច្រើនក្នុងការបង្កើតនូវរថយន្តដ៏ល្អៗនោះ គឺជាការពិភាក្សាអស់រយៈពេលជាច្រើនឆ្នាំរបស់ក្រុមហ៊ុននេះ។ យុទ្ធសាស្រ្តនេះ មិនទាន់មានការផ្លាស់ប្តូរនៅឡើយទេ។ ក្រុមហ៊ុន Huawei បានធ្វើការសហការជាមួយនឹងក្រុមហ៊ុនសហការចំនួន 3 ហើយនឹងប្រកាសបង្ហាញនូវម៉ាកយីហោរថយន្តឆ្លាតវៃចំនួន 3។ ក្រុមហ៊ុនរថយន្តទាំងនេះ នឹងក្លាយជាការសហការរវាងក្រុមហ៊ុន Huawei និងដៃគូរបស់ខ្លួន។
កិច្ចសហការដំបូង គឺរវាងក្រុមហ៊ុន Huaweiនិង BAIC New Energy។ ពួកគេនឹងធ្វើការផលិតនូវរថយន្តនៅក្រោមម៉ាកយីហោ ARCFOX Polar Fox។ នៅក្នុងត្រីមាសទី 4 ឆ្នាំនេះ រថយន្តជាច្រើន នឹងប្រកាសបង្ហាញខ្លួននៅលើទីផ្សារ។ ក្រុមហ៊ុនចំនួន 2 ផ្សេងទៀតនោះ គឺក្រុមហ៊ុន Chongqing Changan និង Guangzhou Automobile។ សម្រាប់ឈ្មោះរបស់ក្រុមហ៊ុនម៉ាកយីហោ 2 ទៀតនៅមិនទាន់បានកំណត់នៅឡើយទេ។
លោក Xu Zhijun បាននិយាយទៀតថា ផលិតផលរថយន្តឆ្លាតវៃនេះ គឺនឹងមានការប្រកាសដោយក្រុមហ៊ុន Huawei និងការប្រើប្រាស់នូវឡូហ្គោរបស់ក្រុមហ៊ុន Huawei នៅខាងក្នុង។ ប៉ុន្តែមិនមែនគ្រប់រថយន្តទាំងអស់ប្រើប្រាស់វានោះទេ។ គួរបញ្ជាក់ថា រថយន្តទាំងនេះ នឹងប្រើប្រាស់នូវដំណោះស្រាយនៃការបើកបរឆ្លាតវៃរបស់ក្រុមហ៊ុន Huawei ៕