ក្រុមហ៊ុន Xiaomi បានប្រកាសចេញកូនម៉ូតូអគ្គិសនីប្រភេទ Scooter ស៊េរីដំបូងម៉ូដែល MIJIA M365 កាលពីអំឡុងឆ្នាំ 2017 ហើយផលិតផលមួយនេះទទួលបានការចាប់អារម្មណ៍យ៉ាងខ្លាំងនៅពេលចេញលក់ លើទីផ្សារ។ ជាមួយនឹងការឌីស្សាញឡើងជាមួយរូបរាងតូចច្រឡឹងស្អាតទាក់ទាញ កូនម៉ូតូអគ្គីសនី Scooter របស់ Xiaomi ក៏មានតម្លៃធូរថ្លៃ និងល្អបំផុតសម្រាប់ការជិះលេងកម្សាន្តនៅក្នុងទីក្រុងដែលមានចរាចរណ៍ដ៏មមាញឹក។
បន្ទាប់ពីទទួលបានទីផ្សារល្អសម្រាប់ Electronic Scooter ជំនាន់ដំបូងរបស់ខ្លួន Xiaomi ក៏បានពង្រីកសែស្រឡាយផលិតផលមួយនេះបន្ថែមទៀតជាមួយនឹងការប្រកាសចេញនូវម៉ូដែល Edition មួយបន្ថែមទៀតដែលមានការបំពាក់នូវគុណសម្បត្តិ និងមុខងារប្រើប្រាស់កាន់តែប្រសើរជាងជំនាន់ដំបូង។ ដោយឡែកនៅពេលនេះ Xiaomi ក៏បានប្រកាសចេញ Electric Scooter ជំនាន់ថ្មីមួយទៀតម៉ូដែល Xiaomi MIJIA Electric Scooter 3 Lite ឬ Youth Edition ដែលមានតម្លៃខ្ទង់ប្រហែល $298 និងត្រៀមចេញដាក់លក់នៅទីផ្សារប្រទេសចិននៅថ្ងៃទី 05 ខែមេសាខាងមុខនេះ។ កូនម៉ូតូអេឡិចត្រូនិចជំនាន់ថ្មីនេះ គឺមានទំហំស៊ុមតួរខ្លួនស្តើងជាង MIJIA Electronic Scooter 1s ដែលចេញកាលពីឆ្នាំ 2020 ប្រមាណ 10mm ដែលផ្តល់ឲ្យការបើកបរមានស្ថិរភាពជាងមុន។
តួរទាំងមូលរបស់ Electronic Scooter ជំនាន់ថ្មីនេះត្រូវបានផលិតឡើងដោយសារធាតុអាលុយមីញ៉ូមដែលមានគុណភាពខ្ពស់ផ្តល់នូវភាពរឹងមាំដែលធ្វើឲ្យតួររបស់ម៉ូតូមានទំងន់ស្រាល និងងាយស្រួលប្រើជាងមុន និងងាយស្រួលក្នុងការបត់យកតាមខ្លួន។ បន្ថែមពីនៅនេះផ្នែកខាងមុខក៏មានបំពាក់នូវអេក្រង់ទំហំធំល្មមមួយសម្រាប់ផ្តល់នូវបទពិសោធន៍ក្នុងការបញ្ជាលើមុខងារមួយចំនួនថែមទៀតផង។
សម្រាប់សមត្ថភាពរបស់ Xiaomi MIJIA Electronic Scooter 3 Lite ក៏ខ្លាំងជាងជំនាន់មុនប្រមាណ 13% ជាមួយនឹងល្បឿនអតិបរមាប្រមាណ 25 គីឡូម៉ែត្រក្នុងមួយម៉ោងជាមួយនឹងកំលាំងផ្តល់នូវថាមពលអគ្គិសនី 250W។ សម្រាប់រយះចំងាយវិញ គឺរត់បានចំងាយប្រមាណ 20 គីឡូម៉ែត្រជាមួយការសាកភ្លើងពេញម្តង។ Xiaomi MIJIA Electronic Scooter 3 Lite មានជម្រើសពណ៌ស និងខ្មៅដែលមាន Highlight បន្ថែមសម្រស់ជាមួយនឹងពណ៌ក្រហមដើម្បីបន្ថែមសោភ័ណ្ឌភាពកាន់តែទាក់ទាញ៕