កាលពីក្នុងព្រឹត្តិការណ៍ CES2023 កន្លងទៅ ASUS បានធ្វើការប្រកាសចេញស្រឡាយម៉ាស៊ីនកុំព្យូទ័រស៊េរីថ្មីៗរបស់ខ្លួនជាច្រើនគ្រឿងច្រើនម៉ូដែលតម្រូវតាមទីផ្សាររបស់អ្នកប្រើប្រាស់។ ហើយនៅក្នុងថ្ងៃនេះដែរ Asus ក៏បានប្រកាសចេញកុំព្យូទ័រស៊េរីថ្មីដ៏ប្រណិតមួយម៉ូដែលទៀតដែលមានឈ្មោះថា Asus Vivobook S16 Flip OLED-TP3604។ កុំព្យូទ័រ Laptop ស៊េរីថ្មីនេះត្រូវបានក្រុមហ៊ុនធ្វើការរចនាឡើងប្រកបដោយភាពប្រណិត និងមានភាព Premium ខ្លាំង ហើយជាពិសេស Asus បានបំពាក់បច្ចេកវិទ្យាអេក្រង់ OLED និងឈីបជំនាន់ចុងក្រោយរបស់ Intel ទៀតផង។
Asus Vivobook S16 Flip OLED បានបំពាក់អេក្រង់ទំហំ 16-inch ប្រភេទ OLED Touchscreen Panel មានល្បឿន refresh rate 120Hz និងគាំទ្រកម្រិតបង្ហាញ 3.2K ឬ 3,200 x 2,000px។ បន្ទះអេក្រង់កុំព្យូទ័រ ស៊េថ្មីនេះមានស្រោបការពារដោយបច្ចេកវិទ្យាកញ្ចក់ Corning Gorilla Glass NBT និងបច្ចេកវិទ្យាចាក់ពណ៌កម្រិតស្តង់ដារ 100% DCI-P3 ព្រមទាំងគាំទ្រការចុចបញ្ជាជាមួយ Asus Stylus Pen កម្រិត 4096-level ថែមទៀតផង។
សម្រាប់កំលាំងអូសទាញការងារវិញ Vivobook S16 Flip OLED ត្រូវពឹងផ្អែកលើខួរក្បាលជំនាន់ចុងក្រោយគឺ Intel-13th Gen ស៊េរី Core i9-13900H Processor ភ្ជាប់ដោយរ៉េមទំហំ 16GB-3200MHz DDR4 និងមានថាសរឹងផ្ទុកទិន្នន័យប្រភេទ PCIe 3.0 SSD ទំហំ 1TB។ កុំព្យូទ័រស៊េរីថ្មីនេះគាំទ្រការដំឡើងមកជាមួយ Microsoft Windows 11 Home/Pro។ បន្ថែមពីនេះ Asus Vivobook S16 Flip OLED-TP3604 នៅមានភ្ជាប់មកជាមួយបច្ចេកវិទ្យា Wi-Fi 6E, Bluetooth 5.2, USB-C 3.2 Gen 2 ដែលអាចប្រើជា Power Delivery និង DisplayPort, USB-A 3.2 Gen 2, USB-A 2.0, HDMI 2.1, និង 3.5mm headphone jack។
Asus Vivobook S16 Flip OLED មានទំងន់សរុបស្រាលល្មម 1.9 គីឡូក្រាម។ កុំព្យូទ័រស៊េរីថ្មីនេះ មានផ្ទាំងក្តារចុចជាប្រភេទ chicklet keyboard with a 1.4mm key travel មានភ្លើង LED នៅក្រោមគ្រាប់ចុច, មានប្រព័ន្ធ Speaker Harman/Kardon ជាមួយបច្ចេកវិទ្យាសំឡេង Dolby Atmos និងមានថ្មទំហំ 70Wh។ ម៉ាស៊ីន Laptop ដ៏ប្រណិតនេះ ក៏ទទួលបានវិញ្ញាបនបត្របញ្ជាក់ពីគុណភាពផលិត និងភាពធន់កម្រិត MIL-STD-810H ថែមទៀតផង។ Asus មិនទាន់បង្ហាញពីតម្លៃរបស់ Asus Vivobook S16 Flip OLED ស៊េរីថ្មីរបស់ខ្លួននៅឡើយទេ៕
