នៅពេលនេះ ក្រុមហ៊ុនផលិតរថយន្តរបស់អាមេរិក Tesla កំពុងតែមានទីផ្សារយ៉ាងល្អសម្រាប់រថយន្តអគ្គិសនីនៅលើទីផ្សារសកល។ នៅក្នុងរបាយការណ៍ចុងក្រោយបំផុតនេះ គឺបានទម្លាយថា ក្រុមហ៊ុននេះ បាននាំចេញរថយន្តជិត 3 លានគ្រឿងនៅក្នុងរយៈពេល 10 ឆ្នាំមកនេះ។ គួរបញ្ជាក់ថា ក្រុមហ៊ុននេះ បានចាប់ផ្តើមនាំចេញរថយន្តដំបូងបំផុតរបស់ខ្លួននៅក្នុងឆ្នាំ 2012 រហូតមកដល់ពេលនេះ ក្រុមហ៊ុន Tesla បាននាំចេញរថយន្តអគ្គិសនីជិត 3 លានគ្រឿងនៅក្នុងរយៈពេលជិត 10 ឆ្នាំនេះគិតត្រឹមការបញ្ចប់នៅក្នុងត្រីមាសទី 2 ឆ្នាំ 2022 នេះ។
តាមការបញ្ជាក់នៅក្នុងរបាយការណ៍ជាច្រើន គឺបានបង្ហាញថា សម្រាប់ត្រីមាសទី 2 ឆ្នាំ 2022 នេះ ក្រុមហ៊ុននេះ បាននាំចេញរថយន្តអគ្គិសនីសរុបចំនួន 2,899,877 គ្រឿង។ ផ្អែកទៅលើនិន្នាការនាពេលថ្មីៗនេះ Bloomberg គឺបានរំពឹងថា ការនាំចេញរបស់ក្រុមហ៊ុននេះ ទៅលើរថយន្តអគ្គិសនីនឹងមានចំនួន 3 លានគ្រឿងត្រឹមចុងខែកក្កដា ឬដើមខែសីហានេះ។
ជាមួយគ្នានេះបើតាមរបាយការណ៍នៃការផលិតរថយន្តនៅក្នុងត្រីមាសទី 2 ឆ្នាំ 2022 និងការដឹកជញ្ជូនរបស់ក្រុមហ៊ុននេះបានបង្ហាញថា ក្រុមហ៊ុននេះ បានផលិតរថយន្តចំនួន 258,580 គ្រឿង និងដឹកជញ្ជូនរថយន្តបានចំនួន 254,695 គ្រឿងនៅក្នុងត្រីមាសទី 2 នេះ។ នៅក្នុងឆមាសទី 1 នៅក្នុងឆ្នាំនេះ ក្រុមហ៊ុន Tesla បាននាំចេញរថយន្តចំនួន 564,000 ដែលមានការកើនឡើងពីឆមាសទី 1 ឆ្នាំ 2021 ដែលមានចំនួនត្រឹមតែ 386,200 ប៉ុណ្ណោះ។ នៅក្នុងនោះ ក៏មានរបាយការណ៍ជាច្រើនដែលបញ្ជាក់ថា នៅក្នុងខែមិថុនាឆ្នាំនេះ គឺជាខែដែលមានការផលិតរថយន្តច្រើនបំផុតនៅក្នុងប្រវត្តិសាស្រ្តរបស់ក្រុមហ៊ុន Tesla ។
រថយន្តដែលមានការផលិតច្រើនបំផុតរបស់ក្រុមហ៊ុន Tesla នៅក្នុងឆ្នាំនេះ គឺចេញពីរោងចក្រ Tesla Shanghai។ រោងចក្រ Tesla Shanghai គឺផលិតរថយន្តបានចំនួន 70,000 គ្រឿង។ ថ្មីៗនេះ រោងចក្រនៅអាល្លឺម៉ង់របស់ក្រុមហ៊ុន Tesla គឺផលិតតែរថយន្ត Model Y ប៉ុណ្ណោះ។ ក្រុមហ៊ុននេះ ក៏មានគម្រោងក្នុងផលិតរថយន្ត Model 3 នៅក្នុងពេលអនាគតនៅក្នុងរោងចក្រនេះផងដែរ៕