ក្រុមហ៊ុនផលិតរថយន្ត ArcFox របស់ប្រទេសចិនបានប្រកាសចេញលក់រថយន្តអគ្គិសនីដំបូងរបស់ខ្លួនដែលបំពាក់ប្រព័ន្ធដំណើរការពេញលិញរបស់ក្រុមហ៊ុន Huawei ឬហៅថា Huawei Inside Full Smart Car solution។ ជាមួយប្រព័ន្ធ Huawei Inside នឹងបញ្ជាទៅលើប្រព័ន្ធសែនស័រទាំងអស់ដែលបានបំពាក់នៅលើ AlphaS ខណៈដែលផ្នែកកាប៊ីនខាងមុខបានដំឡើងជាមួយប្រតិបត្តិការ Huawei HarmonyOS។ ArcFox AlphaS នឹងចាប់ផ្តើមដាក់លក់នៅក្នុងទីផ្សារប្រទេសចិនជាមួយតម្លៃខ្ទង់ 397,000 យ័ន្ត ឬខ្ទង់ប្រហែល $5,9000 ដុល្លារអាមេរិក។
ArcFox គឺជាក្រុមហ៊ុនផលិតរថយន្តដែលស្ថិតនៅក្រោមការគ្រប់គ្រងដោយក្រុមហ៊ុនមេឈ្មោះថា BAIC បានរំពឹងសង្ឃឹមក្នុងចិត្តថា ខ្លួនអាចនឹងជម្រុញការលក់រថយន្តអគ្គិសនីរបស់ខ្លួនដែលបំពាក់បច្ចេកវិទ្យា Huawei Inside និង Huawei Harmony OS បានចំនួនច្រើននៅទីផ្សារក្នុងស្រុក។ ArcFox AlphaS គឺជារថយន្តអគ្គិសនីប្រណិតដំបូងគេក្នុងលោកដែលបំពាក់ប្រព័ន្ធប្រតិបត្តិការ Harmony OS រួមជាមួយការបំពាក់នូវប្រព័ន្ធដ៏ឆ្លាតវៃបំផុត។ ជាមួយប្រព័ន្ធបច្ចេកវិទ្យា Huawei Inside គឺជាបច្ចេកវិទ្យាឆ្លាតវៃបំផុតសម្រាប់រថយន្តបើកបរដោយស្វ័យប្រវត្តិ ឬ autonomous driving ដោយបច្ចេកវិទ្យាថ្មីនេះគាំទ្រការធ្វើប្រតិបត្តិការជាមួយប្រព័ន្ធចាប់សញ្ញាស្វ័យប្រវត្តិ LiDar Sensor, radar module ជាមួយនឹងប្រព័ន្ធកាមេរ៉ាចំនួន 9 គ្រាប់ដែលជា Assisted-driving system camera ដែលបានបំពាក់នៅលើ ArcFox AlphaS។
ArcFox AlphaS ជាន់សន្ទុះល្បឿនពី 0 ទៅ 100 គីឡូម៉ែត្រប្រើពេលប្រមាណ 3.5 វិនាទី។ រថយន្តអគ្គិសនីប្រណិតមួយនេះមានបំពាក់មកជាមួយម៉ូទ័រអគ្គិសនីផ្តល់នូវថាមពលបាន 473kW និងប្រព័ន្ធរមូលកំលាំង 655Nm។ រថយន្តនេះអាចបើកបរបាន 200 គីឡូម៉ែត្រ និងគាំទ្របច្ចេកវិទ្យាសាកថ្មកំលាំង 800v ដែលមានលទ្ធភាពអាចសាកថាមពលថ្ម 187kW ដល់ 50% ចំនាយពេលប្រមាណជា 15 នាទី។ ទោះជាយ៉ាងណា មិនទាន់មានការបញ្ជាក់ផ្លូវការណាមួយទាក់ទងនឹងការនាំចេញ AlphaS ចេញក្រៅទីផ្សារប្រទេសចិននៅឡើយទេ។ បន្ថែមពីនេះ AlphaS ក៏មានជម្រើស Premium មួយទៀតផងដែរ ដែលមានតម្លៃខ្ទង់ 429,000 យ័ន្ត ឬប្រហែលខ្ទង់ $63,000៕