ក្រោយពីបានប្រកាសរៀបចំរចនាសម្ព័ន្ធក្នុងក្រុមហ៊ុនឡើងជាថ្មីដើម្បីធ្វើការផ្តោតទៅលើគម្រោងនៃការផលិតរថយន្តអគ្គិសនីនៅពេលអនាគត ក្រុមហ៊ុន Ford ត្រូវបានគេរាយការណ៍ថាអាចនឹងកាតបន្ថយបុគ្គលិកដល់ទៅ 8000 នាក់ដែលកំពុងបម្រើការនៅសហរដ្ឋអាមេរិក ដើម្បីសន្សំមូលធនធនធានរបស់ខ្លួនសម្រាប់ការផលិតរថយន្តអគ្គិសនីនៅពេលអនាគតខាងមុខនេះ។ ហើយរថយន្តអគ្គិសនីដំបូងរបស់ Ford ត្រូវបានគេដឹងថាជា Model E ដោយពេលនេះក្រុមហ៊ុនផលិតរថយន្តដ៏មានសក្តានុពលរបស់អាមេរិកមួយនេះ បាននឹងកំពុងធ្វើការពិភាក្សាដើម្បីស្វែងរកប្រភពផលិត និងផ្គត់ផ្គង់ថ្មសម្រាប់ប្រើនៅលើរថយន្តអគ្គិសនីថ្មីរបស់ខ្លួន។
បើតាមរបាយការណ៍បាននិយាយថា នៅចុងឆ្នាំ 2023 ក្រុមហ៊ុន Ford នឹងមានថ្មអគ្គិសនីគ្រប់គ្រាន់សម្រាប់ផ្គត់ផ្គង់ក្នុងការផលិតរថយន្តអគ្គិសនីម៉ូដែល Ford Mustang Mach-E ឲ្យបានចំនួន 27 ម៉ឺនគ្រឿង, Ford Transit EVs បានចំនួន 15 ម៉ឺនគ្រឿង, Ford F150- Lightning បានចំនួន 15 ម៉ឺនគ្រឿង និង 30 ម៉ឺនគ្រឿងសម្រាប់ midsize SUV ស៊េរីថ្មីទាំងអស់សម្រាប់ដាក់លក់នៅទីផ្សារអឺរ៉ុប។ ចំពោះការគម្រោងកាត់បន្ថយចំនួនបុគ្គលិក 8000 នាក់នៅពេលខាងមុខនេះ គឺនឹងមានការប៉ះពាល់ដល់បុគ្គលិកបម្រើការផ្នែក Ford Blue ដែលជាអ្នកទទួលខុសត្រូវចំពោះផ្នែកអាជីវកម្មផលិតម៉ាស៊ីនប្រើប្រាស់ប្រេងឥន្ធនៈដែលជាមូលដ្ឋានស្នូលក្នុងការផលិតរថយន្ត Ford ជាច្រើនទសវត្សរ៍មកហើយ។
ដោយឡែកក្នុងថ្ងៃនេះដែរ Ford បានបញ្ជាក់ផ្លូវការណ៍ថា ខ្លួននឹងប្រើប្រាស់ថ្មប្រភេទ lithium iron phosphate batteries (LFP) ដែលផលិតដោយក្រុមហ៊ុន Contemporary Amperex Technology ហៅកាត់ថា CATL សម្រាប់អនាគតរថយន្តអគ្គិសនី Ford Mustang Mach-E និង Ford F150-Lightning ស៊េរីឆ្នាំ 2024។ Ford និយាយថា សម្រាប់ថ្មនេះគឺប្រើនូវវិធីសាស្ត្រផលិតឡើងថ្មីដោយជំនូសជាមួយ nickel cobalt manganese (NCM) chemistry ដែលស្រដៀងគ្នានឹងវិធីសាស្រ្តផលិតថ្មរបស់ក្រុមហ៊ុន Tesla ដែរ។
Ford បាននិយាយថា ខ្លួនមានលទ្ធភាពផលិតជាលិកាថ្មអគ្គិសនីបាន 100% ដែលជាបរិមាណគ្រប់គ្រាន់សម្រាប់ការផលិតរថយន្តបានចំនួន 60 ម៉ឺនគ្រឿងនៅចុងឆ្នាំ 2023 ជាមួយនឹងបច្ចេកទេសវ៉ិចខ្ចប់ដោយក្រុមហ៊ុន LG Energy Solution ដែលមានមូលដ្ឋាននៅទីក្រុង Wroclaw ប្រទេសហូឡង់ និងក្រុមហ៊ុនផលិតអាគុយរថយន្តអគ្គិសនី SK Innovation របស់កូរ៉េខាងត្បូង។ ក្រុមហ៊ុន Ford គ្រោងផលិតរថយន្តអគ្គិសនីរបស់ខ្លួនឲ្យចំនួន 2 លានគ្រឿងសម្រាប់ទីផ្សារសកលនៅត្រឹមឆ្នាំ 2026។ ជាមួយគ្នានេះ Ford ក៏បានបញ្ជាក់ថា ខ្លួនបានធ្វើការទុនវិនិយោគក្នុងទំហំសាច់ប្រាក់ 50 ពាន់លានដុល្លារអាមេរិកសម្រាប់ឧស្សាហកម្មរថយន្តអគ្គិសនីរហូតដល់ចុងឆ្នាំ 2026៕
