ដំណើរការផលិតរថយន្តអគ្គិសនីដែលផ្សារភ្ជាប់ជាមួយនឹងបច្ចេកវិទ្យាស្មាតហ្វូនបាននឹងកំពុងបន្តកើនមានឡើងជាបន្តបន្ទាប់។ ដោយបច្ចុប្បន្ននេះយើងឃើញមានក្រុមហ៊ុនផលិតស្មាតហ្វូនជាច្រើននៅក្នុងពិភពលោកដូចជា Apple, Huawei និង Xiaomi ជាដើម បានចាប់ផ្តើមហក់ចូលប្រឡូកក្នុងឧស្សាហកម្មផលិតរថយន្តអគ្គិសនីបន្ថែមពីលើឧស្សាហកម្មស្មាតហ្វូនដែលពួកគេមានស្រាប់។
ផ្ទុយពីក្រុមហ៊ុនធំៗទាំងបីខាងលើនេះ ក្រុមហ៊ុន Nio ដែលត្រូវបានគេស្គាល់ថាជាក្រុមហ៊ុនផលិតរថយន្តអគ្គិសនីដ៏ល្បីឈ្មោះមួយក្នុងប្រទេសចិន បែបជាប្រកាសចូលប្រឡូកនៅក្នុងឧស្សាហកម្មផលិតស្មាតហ្វូនបន្ថែមទៀត។ ហើយក្រុមហ៊ុនផលិតរថយន្តអគ្គិសនីនេះ ក៏បានត្រៀមខ្លួនរួចជាស្រេចហើយជាមួយនឹងការបង្កើតក្រុមហ៊ុនផលិតស្មាតហ្វូនរបស់ខ្លួនដោយដាក់ឈ្មោះផ្លូវការណ៍ថា Nio Mobile Technologies Co.,Ltd។
ដោយក្រុមហ៊ុនថ្មីនេះត្រូវបានគ្រប់គ្រងទាំងស្រុងដោយក្រុមហ៊ុន Nio ដែលបានបោះទុកសម្រាប់ការវិនិយោគក្នុងចំនួនទឹកប្រាក់ប្រមាណជា 100 លានដុល្លារអាមេរិក។ ហើយអ្នកដែលជាដំណាងក្រុមហ៊ុនបច្ចេកវិទ្យាថ្មីរបស់ Nio គឺលោក Qin Lihong ដែលជាសហស្ថាបនិក និងជានាយកក្រុមហ៊ុនបច្ចុប្បន្ន។ សម្រាប់អាស័យដ្ឋានក្រុមហ៊ុន Nio Mobile Technologies Co.,Ltd គឺមានមូលដ្ឋាននៅតំបន់ Anting ក្នុងទីក្រុងសៀងហៃ។ ហើយក្រុមហ៊ុនបច្ចេកវិទ្យាថ្មីនេះក៏មានអ្នកអភិវឌ្ឍន៍បង្កើត Software និង AI Hardware ផ្លូវការណ៍ហើយដែរ។ Nio Mobile Technologies Co.,Ltd គឺជាក្រុមហ៊ុនបុត្រស័ម្ពន្ធរបស់ Nio ដែលនឹងធ្វើការផ្តោតទៅលើអាជីវកម្មបច្ចេកវិទ្យាទូរស័ព្ទ។
ទន្ទឹមនឹងនេះ ក៏មានព័ត៌មានចចាមអារ៉ាមនិយាយថា ទូរស័ព្ទស្មាតហ្វូនដំបូងចេញពីក្រុមហ៊ុន Nio ត្រូវបានគេប៉ាន់ប្រមាណថានឹងមកដល់នៅឆ្នាំក្រោយនេះ។ នាយកប្រតិបត្តិក្រុមហ៊ុន Nio ត្រូវបានគេដកស្រង់សម្តីមុននេះថា ក្រុមហ៊ុន Nio កំពុងរៀបចំផែនការអភិវឌ្ឍទូរស័ព្ទចល័តដែលនឹងចេញលក់ម្តងក្នុងមួយឆ្នាំ។ Nio មានសមត្ថភាពជាច្រើនរួចទៅហើយក្នុងបច្ចេកវិទ្យាទូរស័ព្ទចល័តតាមរយៈរថយន្ត Nio EVs ដែលមានការតភ្ជាប់កម្រិតខ្ពស់របស់ខ្លួន។ ដោយម៉ូដែលទាំងនេះអាចទាញយកអត្ថប្រយោជន៍បានពេញលេញពីបច្ចេកវិទ្យាទំនើប ដើម្បីផ្តល់នូវបទពិសោធន៍ដ៏អស្ចារ្យដោយប្រើនៅលើ Nio EVs។ ដែលវាត្រូវបានគេរំពឹងថាទូរស័ព្ទរបស់ក្រុមហ៊ុន Nio នៅពេលមកដល់នឹងសមស្របនឹងប្រព័ន្ធអេកូ Nio ដែលផ្តល់នូវបទពិសោធន៍ក្នុងការបើកបរកាន់យ៉ាងរលូន។ មិនទាន់មានសេចក្តីថ្លែងការណ៍ផ្លូវការច្បាស់លាស់ណាមួយពី Nio នៅឡើយទេ អំពីគម្រោងផលិតស្មាតហ្វូនរបស់ខ្លួន។
ក្រុមហ៊ុន NIO មិនមែនជាក្រុមហ៊ុនផលិតរថយន្ត EV របស់ចិនដំបូងគេដែលបានព្យាយាមចូលទៅក្នុងវិស័យផ្សេងទៀតនៃទីផ្សារបច្ចេកវិទ្យានោះទេ។ ដោយកាលពីឆ្នាំមុននេះក្រុមហ៊ុនផលិតរថយន្តអគ្គិសនី BYD ក៏ធ្លាប់បានដាក់បង្ហាញជាមួយនាឡិកាឆ្លាតវៃ ដែលអាចប្រើដើម្បីដោះសោរថយន្តរបស់ខ្លួនផងដែរ៕
